34
Kileu beabeadi 'ailuga 'ivaudi
1 'Auvea Mosese i voneni i vo, Kileu 'ailuga 'ivaudi 'u na yadalidi kileu nagami 'adi 'isa'isa bani'odi. Kileunidi bagase a velemuga 'u tawedi i tubakabakaledi, bega yaku veimea a na kiluma-vaituganidi kileu 'ivaudi 'waidie. 2 'U na 'idewadi i na 'a'avana, awa'awaiogose 'u na lakama 'Oya Sainai deba'aineye bei ta na veluaga.”
4 Bega 'Auvea yana voneye, Mosese kileu 'ailuga i 'ewadi i yadalidi kumekumetadi 'adi 'isa'isa bani'odi. 'Awa'awaiogose i tovoi kileunidi 'adi 'ailuga i evadi i laka 'Oya Sainai. 5 'Auvea i obuma waowa nageneye Mosese taiadi i tovotovoi, mulieta taunina 'ana wagava YAHWEH*'Ana wagava mogitana vona Ibeliu 'waineye YHWH, i kiluma-vetonovi nika YAHWEH i souyeni. Malamala fuedi i 'a'avana yadi 'eba 'ainana Jehovah, 'ana saivila the LORD vona Dimudimu 'waineye we'e 'ida'e 'Auvea. i 'inanai. 6 Sou 20:5,6; Sal 14:18; VeL 5:9,10; 7:9,10'Auvea Mosese maigineamo i nago bega bonana bwaikinega i lu'ivona i vo,
Yau YAHWEH, Yau kumaniku 'Auvea.
Yaubada to'isanuakalikali,
ma yaku nuakalikali a vevesauluva-'atumaiemi,
kebu a da nuasako-matayo'oga, we'e mogitana
yaku nuakalikali-motoina kebu i na 'a'avaga i na 'eno-vagata.
7 Yaku nuakalikalinina nunago-vagaina kebu i na 'a'avaga,
Sauluva sakoidi, veimea 'ana togeu wata tosakona-vebogi, yau 'adi tonuatavuna.
We'e kebu 'ana fata tovesauluva-sako a na ve'ise'isedi a na vematavulogidi i na damana natudiavo, tubudiavo wata aisediavo 'waidie.
Yadi 'aila'a matatabuna vitanina i na veluagai, i na nagoga lakata 'ana vetonu wata 'ana ve-4 'waidie.”
8 Tutuyanina 'Auvea i vona'a'ava Mosese ma yana nuaobu wata ma yana ve'ililibu i lumata'afufu 'Auvea i subiai. 9 Bega i velu'ui 'Auvea 'waineye i vo, 'Ai'edi 'u na sosoanekuga, 'omu taiadi ta na nago. Avinodi de'e tomotoganidi nuafoudi fa'alidi siwe yama sakona wata yama vesauluva-sako 'u da nuatavunidi. A vevelu'ui 'u da vagavaima 'ima yamu tomotogavo mogitana.”
10 Mulieta 'Auvea Mosese i voneni i vo, 'U ve'wada a na vonemu. 'Asiau yaku veakutagona a 'i'idewai me Isileli matatabuna 'waidie. Matadie 'eba nuavogana wata 'eba nua'ewa a na 'i'idewadi, kebu tamu tutuya basenadi bani'odi a da 'idewai fwayafwaya matatabuna 'waineye 'alo tomotoga 'adi 'aila'a tulina tulina 'awasasadie. 'Ifwaidi tomotoga lilivamie i na miamiaga, naninidi yau 'Auvea a na 'idewadi faifaimi i na 'isedi nika nuadi i na voganidi.”
28 Mosese 'Auvea taiadi i miamia 'aiata 40 wata lovana 40, we'e kebu tamu 'ani'ani i da 'aniga 'alo ufa i da yemu. Tutuyanina 'waineye 'Auvea yana veakutagona i kilumidi kileunina 'waidie, 'asa'aiana yana Veimea 10.
Mosese maigina i 'awaaiaia
29 2 Kol 3:7-16Mosese 'Oya Sainai 'wainega i obuma, kileu 'adi 'ailuga bei 'Auvea yana veakutagona i kilumiga, i 'ewadi i kiave'avinidi we'e maigina i 'awaaiaia fai Yaubada taiadi i veifufu, siwe kebu i da 'asetaiga. 30 Tutuyanina Eloni wata me Isileli Mosese maigina i 'iseni i 'awaaiaia i kololo-'afo'afo, kebu i da nagoi lilivaneye. 31 Bega Mosese bonana bwaikinega Eloni wata me Isileli yadi to'edakumetavo i goledi, i maia Mosese 'waineye taiadi i veifufu. 32 I 'a'avana me Isileli matatabudi i maia Mosese 'waineye, veimeanidi 'Auvea i lu'ivoneyediga 'Oya Sainai 'waineye, matatabuna i veifufuyedi 'waidie.
33 Tutuyanina Mosese i veifufu'a'ava maigina i baniumai kaleko yalayalanega. 34 We'e tutuyanina i na lukuluku 'Auvea 'waineye taiadi i na veifufu, kalekonina i na ta'ita'ia. Mulieta i na sousouyeni 'Auvea yana veimea i na lulu'ivoneyedi me Isileli 'waidie. 35 Me Isileli matatabudi i 'iseni maigina i 'awaaiaia bega maigina i babaniumai i na nagoga i na luku i na veifufu 'Auvea taiadi, bei i na ta'ia.