1 Mulieta 'Auvea Mosese i voneni i vo, 2 Weta'i kumekumetana 'ana 'aiata kumekumetana 'waineye 'Auvea yana Vadavada Tabutabuna 'u na sivetovoia. 3 Veakutagona 'ana Didiwaka 'u na lukuveni 'u na yatoi nageotogineye, wata kaleko badubaduna 'wainega 'u na sibodai. 4 Talalia 'u na mieni i na 'a'avana 'ana kukua 'u na yatodi tabwaneye. Mageta 'ana 'eba yato 'u na lukuvedima 'u na vetovoia, mulieta 'ana mageta 'u na yatodewadewadi. 5 'Eba velomu golida vane 'anikabu faifaina 'u na lukuvedima bega 'u na vetovoia Veakutagona 'ana Didiwaka manawaneye. Wata tamu kaleko 'wainega Vadavada Tabutabuna 'ana 'awa 'u na sibodai. 6 We'e 'eba velomu bei 'aisaya i na kabukabunidiga 'u na yatoi 'eba luku 'ana 'awa bwaikina lilivaneye. 7 'Aivoe 'u na vetovoia vadavada wata 'eba velomu kamwadie, i na 'a'avana ufa 'u na iwagi. 8 Vadavada Tabutabuna matatabuna 'u na kalieni i na luvivili, i na 'a'avana 'eba luku 'ana kaleko 'wainega 'u na sibodai.

9 Bunama magaina 'atumaina*Wata 'wa na 'iseni Souyagi 30:22-30. Bunama olive i wanadi vane taiadi 'Auvea yana veimea bani'odiga bega naninidi i iwagidiga i vetabudi. 'u na 'ewai, Vadavada Tabutabuna wata 'ana kukua matatabuna 'u na iwagidi, bega 'u na yato'idiedi yau 'Auvea faifaiku nika naninidi tabutabudi. 10 I na 'a'avana, 'eba velomu 'aisaya bei i na kabukabunidiga wata 'ana 'eba vefolova 'u na iwagidi bunamanina 'wainega bega 'u na yato'idiedi faifaiku, we'e 'eba velomunina yayato'idina mogitana. 11 Bunamanina 'wainega 'aivoe 'eba 'ilekoa 'ana 'eba yato taiadi 'u na iwagidi, bega 'u na yato'idiedi faifaiku. 12 Mulieta Eloni ma natunavo iavetadi 'u na miedi Vadavada Tabutabuna 'ana 'eba luku 'waineye 'u na vetoadi ufayega. 13 We'e Eloni 'u na 'ivivigavuya talauma tabutabudi 'waidiega, bunamanina 'wainega 'u na iwagi bega 'u na yato'idieni i na vetovelomu i na folofolova faifaiku. 14 Wata natunavo iavetadi 'u na miedi 'adi talauma 'waidiega 'u na ve'wesenedi. 15 Bunamanina 'wainega 'u na iwagidi bani'odi tamadi 'u iwagi bega natunavonidi i na vetovelomu i na folofolova faifaiku. 'Adi iwaganina 'wainega Eloni natunavo iavetadi wata tubunavo iavetadi i na vevetovelomu faifaiku, kebu i na 'a'avaga i na 'eno-vagata.” 16 Ava'ai 'Auvea i veimeyeniga, matatabuna Mosese i 'idewadi.

17 Bega weta'i kumekumetana 'ana 'aiata kumekumetana malamala 'ana veluga 'waineye, Vadavada Tabutabuna i sivetovoia. 18 Mosese lukalikali 'adi 'eba yato ma ovudi i yatodi, lukalikali†'Ana mogitana lukalikali 'ailuga 'ailuga i sivetovoidi we'e folova 'ale'usadi 'waidiega i tubwadi nika vadavada i fa'ali. 'adi ovu nagedie i silukuvedi i vetovoidi, mulieta uyauya toketokedi i yatodi folova 'ifwaidi taiadi. 19 Folovanidi i sivetovoidi wata i kiafwasedi i 'a'avana, Vadavada Tabutabuna i velu'uvai tamu kaleko 'atumaina 'wainega, mulieta tabwana i umai 'aisaya bunudiega, bani'odi 'Auvea Mosese i voneniga, matatabuna i 'idewadi.

20 Mosese kileu 'adi 'ailuga bei 'Auvea yana veakutagona i kilumiga, i dodogidi Veakutagona 'ana Didiwaka nageneye. 'Eba eva i silukuvedi didiwaka 'ana nimanimana ovudiamo wata 'ana kudu i 'ewai i kuduya, kudunina bei 'Auvea tomotoga yadi sakona i na 'u'u'umidi. 21 Didiwakanina i 'ewai i lukuveni Vadavada Tabutabuna nageneye, i 'a'avana kaleko badubaduna i 'ewai i sibodai bega kebu tamu aitoi Veakutagona 'ana Didiwaka i na 'iseni, ava'ai 'Auvea i voneyeniga bani'odi.

22 Mosese talalia i lukuveni bega i vetovoia Vadavada nageneye yavalatayega, kalekonina manawanega we'e didiwaka vi'ainega. 23 'Ani'ani beledi i 'ewadi i yatodi talalia tabwaneye 'Auvea mataneye, bani'odi 'Auvea Mosese i voneniga.

24 Wata mageta 'adi 'eba yato 7 we'e lamuna 'aitamogana i vetovoia Vadavada nageneye bolimanayega we'e talalia vi'ainega, 25 bei 'Auvea mataneye mageta i kabunidi bani'odi 'Auvea Mosese i voneniga.

26 Mosese 'eba velomu vane 'anikabu faifaina, golidayega i 'idewaiga, i lukuveni saiboda badubaduna manawanega i vetovoia. 27 Nika bei vane magaina 'atumaina i kabuni tabwaneye bani'odi 'Auvea Mosese i voneniga. 28 I 'a'avana tamu kaleko 'atumaina 'wainega Vadavada Tabutabuna matatabuna i sibodai.

29 'Eba velomu bei 'aisaya i kabukabunidi i lukuveni, kali 'ana 'awa bwaikina lilivaneye i vetovoia, 'aisaya wata falawa i velomuyedi bani'odi 'Auvea Mosese i voneniga.

30 Bega Mosese 'aivoe 'eba 'ilekoa i yatoi vadavada wata 'eba velomu 'awasasadie, we'e ufa i iwagi 'wainega tovelomu i na 'ilekoa. 31 Mosese, Eloni ma natunavo iavetadi ufanina 'wainega nimadi wata 'agedi i na lekolekoadi. 32 'Ai'edi nuanuadi i na le'wa 'eba velomu lilivaneye 'alo Vadavada Tabutabuna nageneye nagami i na 'ilekoa, bani'odi 'Auvea Mosese i voneniga.

33 Bega Vadavada Tabutabuna wata 'eba velomu matatabuna i kaliedi kaleko 'ana 'isa 'atumaina 'wainega, wata tamu kaleko i lutalauleni bega 'eba luku 'awana i sibodai. Nika bei Mosese folova matatabuna i ve'a'avai.

34 1 Kin 8:10,11; Ais 6:4; Isi 43:4,5; Ve 15:8Tutuya 'ifwaidi i 'a'avana, 'Auvea yana waowa Vadavada Tabutabuna i umai, we'e yana mageta mataududulina Vadavadanina nagena matatabuna i veadagi. 35 Mosese kebu 'ana fata i na luku Vadavada Tabutabuna nageneye fai waowa matatabuna i umai wata 'Auvea yana mageta mataududulina i veadagi. 36 Me Isileli yadi nago matatabuna 'waidie, 'ai'edi waowanina i na 'anilakai Vadavada Tabutabuna 'wainega, nika bei me Isileli i na 'idewadewa i na 'a'ava i na tauya. 37 We'e 'ai'edi waowa bola i na 'eno'enoga, kebu i na tauyaga 'ana tugusa waowanina i na 'anilakai. 38 'Aiaseye me Isileli matatabudi 'Auvea yana waowa i 'ise'iseni Vadavada Tabutabuna tabwaneye, we'e lovane waowa nageneye 'ai i 'ala'alata i 'ise'iseni. Yadi nago matatabuna 'waidie waowanina wata 'ai-'ala'alata i 'ise'iseni.