Veimea
Livai 'ana wauma yadi folova ifuifufudi
'Eba kiavemageta
Buki de'e 'ana wagava Leviticus Vona Dimudimu 'wainega fai bukinina nageneye i lulu'ivona Livai 'ana wauma yadi folova faifaina. De'e 'aila'anidi kumanidiavo tovelomu 'adi to'aivaita wata 'Auvea yana Vadavada Tabutabuna 'ana to'isave'avinavo. Mulieta Vanuga 'eba Velu'ui i yogoniga wata bei 'waineye i folofolova.
Awave'eda'eda wata veimea buki de'e nageneye Yaubada i 'anivelenedi me Isileli 'waidie, i na miamia wata i na 'odu'odu, bani'odi yana tomotogavo magemagetadi yadi sauluva. 'Eba 'isa, i na vevelomu, 'aiata 'aitamogana 'aitamogana sauluva tonovidi i na 'i'idewadi, i na 'i'ivevunavunagidi wata veawai 'alo lusakali 'waidie yadi veimea i na veve'ililibuyedi. Yaubada awave'eda'eda tamu Livai 'ana wauma i veledi, velomu wata yana veimea 'adi folova faifaidi.
Buki Veimea 'ana 'idi
1) Velomu 'ana awave'eda'eda. (1:1-9)
2) 'Anivelena-maimaiga 'ana awave'eda'eda. (3:1-5)
3) Veimea viga faifaina. (13:1-3, 45-46)
4) Mia 'atumaina 'ana veimea. (17:10-11, 18:1-6, 19-24, 19:1, 17-18, 20:6)
5) Mewa 'ana veimea. (24:19-22)
1
Velomu 'anikabu 'ana awave'eda'eda
1 'Auvea Mosese i goleni, Vadavada Tabutabuna 'wainega i veifufu 'waineye. 2 I vo, Me Isileli 'u na vonedi 'u na vo, 'Ai'edi aitoi i na 'anivelena-maimaiga yau 'Auvea 'waikuye, tamu yana bulumakau, sifi 'alo goti i na venua'ivineni yana 'aisayavo 'waidiega. 3 'Aisayanina i lubwaineni iavetana, kebu ma 'ana vigaga 'alo lumalumanaga. I na mieni Vadavada Tabutabuna 'ana 'eba luku 'waineye bega yau 'Auvea a na awave'atumaieni. 4 Tomogonina nimana i na yatoi 'aisayanina 'unu'ununeye nika yana wafa a na awave'atumaieni, tomogonina tutulina yana sakona 'ana 'u'uma faifaina. 5 Tomogonina bulumakau 'odona i na boboi i na wafa yau 'Auvea matakuye, we'e Eloni natunavo iavetadi, kumanidiavo tovelomu, 'aisayanina dayagina i na koia i na naweni 'awa bwaikina 'eba luku 'waineye, bei 'eba velomu lilivana i na luitaitali. 6 To'anivelenanina 'aisaya bununa i na 'a'ia i na 'a'avana i na lubaibaia. 7 Eloni natunavo 'ai i na yatodi 'eba velomu tabwaneye wata i na levai i na 'ala'alata. 8-9 Wata Eloni natunavo, kumanidiavo tovelomu, 'aisaya i na lubaibaiaga i na 'idewadewai, du'u inagena wata 'agena i na lekoadi ufayega, mulieta 'unu'ununa wata yafana taiadi i na yato-dewadewadi 'ai 'ala'alata 'waineye 'eba velomu tabwaneye bega 'aisayanina matatabuna i na 'ala'a'avai. Velomu kabukabunina i na 'aniveleneni yau 'Auvea 'waikuye, magaina 'atumaina wata 'iwanina yaku 'eba sosoana.”
Wata 'Auvea Mosese i voneni tomotoga 'adi fata i na velomu 'aisaya 'ifwaidi 'waidiega bani'odiga sifi, goti, bunebune 'alo kabututula natudi i na kabunidi velomu faifaina.