16-17 'Auvea i voneku i vo, 'Omu tomia fwayafwaya a na vonemu. Me Isileli yadi fwayafwaya i 'iveyokei wata i 'ivesakoi yadi sauluva sakoidi 'waidiega 'wa da vo bani'odi kaleko dibulakata yokeyoke-otogina. 18 Nimadi dayadayagidi wata kumaea 'waidie i 'odu'odu. Sauluvanidi 'waidiega fwayafwaya i 'iveyokei wata i 'ivesakoi. A toke a nuasakoyedi bega yaku nuasako 'ana yauyauta i vebaedi. 19 A luveyavulidi bega i mia-ve'eve'e'elagi mali 'awalawa 'waidie, bega 'adi vematavuloga i veluagai yadi sauluva sakoidi faifaidi. 20 Siwe tutuyanina i mia-ve'eve'e'elagi mali 'awalawa 'waidie, yau i 'ivebunumayagiku, 'aku wagava magemagetana i venani-'avo'avovoyeni. Tomotoga 'awalawa 'ifwaidi 'waidiega i vo, De'e 'aila'anidi 'Auvea yana tomotoga, i lubwaineni i da 'i'isave'avinidi taunidi yadi 'awalawa 'waineye siwe 'adi gaviavo i yogonidi i nawedi tamu 'awalawa 'waineye.’ 21 Nuanuaku me Isileli 'aku wagava magemagetana i da ve'ililibuyeni, siwe 'awalawanidi 'waidie i nagoiga i 'i'ivebunumayagiku.

22 Faifainanina me Isileli 'u na vonedi 'u na vo, Yau 'Auvea Yaubada, yaku veifufu 'waimie side bani'odi. Avinodi kebu i da lubwainemi siwe a na vevilami 'ami tuvadeye, 'aku wagava magemagetana 'ana ve'ililibu faifaina. Fai 'awalawa tulina tulina taiadi 'wa miamiaga, 'aku wagavanina 'wa venani-'avo'avovoyeni. 23 'Aku wagava magemagetana wata toketokena a na sivemageseni 'awalawa tulina tulina 'waidie 'omi me Isileli 'waimiega nika i na 'asetai yau 'Auvea.

24 'Atamana bwaikidi wata 'awalawa tulina tulina 'waidiega a na vevilami 'ami tuvadeye. 25 Ufa masi'atana 'wainega a na luitaitalimi nika 'wa na vevunavunaga. 'Ami yoke wata yaubada-vekavekali 'ana 'odu'odu a na lekoa-yavuledi. 26 Isi 11:19,20Yami nuanua a na luve'ivaudi wata 'Anu'anunuku i na agemi i na 'ive'ivaumi. Nuami tabodadi 'wa da vo bani'odi kileu, a na 'ewayavuledi ma'itufa nuanua bikadi a na velemi nika 'wa na vevematayakeyakeku. 27 'Anu'anunuku i na agemi bega yaku awave'eda'eda 'wa na ve'ililibuyedi wata ma yami nuaobu yaku veimea 'wa na vematayakeyakedi.