1 'Auvea i 'abitonoviku nika 'Anu'anununa i ageku i vagavaiku i naweku tamu laube'u lulu'ava i luvaia 'waineye. 2 I 'edakumeseku bega i naweku lulu 'awasasadiamo, a 'isedi lalaotogidi wata fueotogidi 'awasasa i luvaia. 3 I velutolieku i vo, 'Omu tomia fwayafwaya, 'u da 'asetai, 'ana fata de'e lulunidi i na yawasa?”

A tutula a vo, 'Auvea Yaubada, 'omu taunimu 'u 'asetai.”

4 I voneku i vo, Yaku vona 'u na lu'ivoneyeni de'e lulunidi 'waidie 'u na vo, 'Omi lulu lalami 'Auvea yana vona 'wa na nogai. 5 I vo, Yau 'Auvea Yaubada a na veifufu 'waimie 'wa na vainenega. Yawai a na velemi 'wa na yawasa. 6 Tubwa 'adi walowaloga 'waidiega a na luveakoakovimi wata vigo a na yatodi, i na 'a'avana bunu 'wainega a na baniumami. Yawai a na velemi nika 'wa na yawasa bega 'wa na 'asetaku yau 'Auvea.”

7 Valanina 'Auvea i velekuga a lu'ivoneyeni lulunidi 'waidie nika a nogai vetalakwesakwesala bwaikina, a 'isanago nika lulu a 'isedi 'aitamogana 'aitamogana taunidi i luluveakoakovidi. 8 A 'isa'isa nika tubwa 'adi walowaloga vigo taiadi i souyedi lulu 'waidie, i 'a'avana bunu vigonidi i baniumadi. Siwe yawai kebu.

9 Yaubada i voneku i vo, 'Omu tomia fwayafwaya, kaukau 'waidie 'u na veifufu 'u na vo, 'Auvea Yaubada i veveifufu 'waimuye i vo, Yawai 'u miamiaga 'awalawa tulina tulina 'waidie, towafa de'e yawaidi 'u na veledi nika ma yawaidi i na tovoi.”

10 Ve 11:11Valanina i vonekuga a lu'ivoneyedi nika yawai i luku towafa 'waidie, matatabudi i yawasa i tovoi i vetolugavia fueotogidi.

11 Yaubada i voneku i vo, 'Omu tomia fwayafwaya, me Isileli 'wa da vo lulunidi bani'odi. Tauni'avadi i vonavona i vo, 'Ida lalada, aitoi i na 'ivaiseda, 'ada 'aila'a i 'a'ava.’ 12 Begaidi bonaku 'u na lu'ivoneyeni 'waidie 'u na vo, 'Auvea Yaubada i vonavona i vo, 'Omi yaku tomotoga, 'ami gaviavo 'waidiega a na 'ita'ita'iemi. A na vevilami yami 'awalawa Isileli 'waineye, 'wa da vo bani'odi 'ami taumata a da ala-vaituganidi ma yawaimi a da sivetovoimi. 13 Tutuyanina naninidi i na souyedi, nika 'wa na 'asetai yau 'Auvea. 14 'Anu'anunuku i na agemi nika 'wa na mia-vaitugana, wata a na vevilami 'ami tuvadeye bega 'wa na 'asetaku yau 'Auvea. E'e, naninidi a voneyediga, yau 'Auvea, a na 'idewadi.”