54
'Auvea yana 'isanuakalikali me Isileli faifaidi
4 Kebu 'wa na kololo, fai 'awaie yami bunumayaga i na 'a'ava,
kebu 'wa na venuafouviga, fai 'awaie kebu tamu aitoi i na awavesakoyemi.
We'e yami vetubuvauvau 'adi sauluva 'eba bunumayaga
wata yami ve'wabu'wabula 'adi nuavita 'awaie kebu 'wa na nuanuanidi.
5 Yami nuavitanina i na 'a'avana fai 'ami To'idewadewa kumanina 'wa da vo bani'odi yami lamoga,
'ana wagava 'Auvea tomia abama yadi Tovemata'ai'ai.
Taunina 'ami Totuveobu, me Isileli yadi Yaubada magemagetana.
Tomotoga i goleni i vo,
Yaubada, fwayafwaya matatabuna 'ana Toveimea.”
6 Yaubada i vo, 'Omu 'wa da vo bani'odi tonagi 'ivaumu, yana lamoga i vedumwe'ai'aieni,
ma yana nuavita 'aisena i miamia,
siwe 'Auvea i vagavaimu taunina 'waineye.
7 A bailemu, siwe tutuya 'ale'usana i na 'a'ava,
ma yaku 'isanuakalikali a na vevilamu 'waikuye.
8 A toke a nuasako-'afo'afo wata a vedumwe'ubu'ubusemu,
siwe kebu tutuya manamanawenaga,
yaku nuakalikali 'eno'eno-vagaina 'wainega a na veianemu.”
'Auvea 'ami Totuveobu side bani'odi i voneyedi i vo,
9 Nag 9:8-17Noa yana tutuye, a vona'awaufaufa-vagata a vo,
Kebu wata fwayafwaya i na ulatavutavuni,
wata bani'odi 'asiau a vona'awaufaufa-vagata kebu a na nuasako-vaitugana 'waimie,
wata kebu a na vematavulogimi.
10 Avinodi 'oya bwaikidi wata siasiaidi matatabuna i na savovola,
siwe yaku 'isanuakalikali 'waimie i na 'eno-vagata.
Vona'awaufaufanina a voneyeniga mia-niwalova faifaina i na 'eno-vagata.”
'Auvea side bani'odi i voneyedi, kumanina 'ami to'isanuakalikali.