53
'Auvea yana Tofolova 'ada vita i tovoiedi
1 Lom 10:16; Ion 12:38'Auvea valana 'a lulu'ivoneyeni siwe kebu tamu aitoi i da ve'awamogitana 'waineye.
Tomotoga yana toketokena i 'iseni, siwe kebu i da 'asetai wata i da vetumagana.
2 'Auvea yana Tofolova i taulai mataneye,
'wa da vo bani'odi waifei kabuna i da 'etofiala,
'alo walaminega i da veluilili fwayafwaya lalana 'wainega.
'Ana 'isa 'wa da vo bani'odi nani-'avo'avovo, kebu ma 'ana magisisi,
bega kebu 'ana fata nuada i na 'ewai ta na nago 'waineye.
3 Tomotoga kebu i da ve'ililibuyeniga, i vedumwe'ai'aieni.
Vita fuedi i veveluagadi wata veviga bwaikidi taiadi.
Tomotoga i vedumwe'ubu'ubuseni, i sidibidibieni,
we'e 'ida ta vo 'ako tamu tomogo-'avo'avovo.
4 Mad 8:17Siwe ma yana tokemaiga 'ada vita wata yada veviga i tovoiedi.
'Ada vitanidi i tovoiediga, ta vo 'ako Yaubada i vematavulogi taunina yana sakona faifaina.
5 1 Fit 2:24Siwe yada sauluva sakoidi faifaidi i loveni,
yada vedumwe'ai'ai faifaidi i 'ivekokovi.
'Ada vematavuloga i tovoieni, 'wainega mia 'atumaina ta veluagai,
'ana kini'ona 'waidiega ta ve'atumai.
6 1 Fit 2:25'Ida bani'odi sifi ta vuyo, matatabuda yada 'eda tulina tulina 'waidiamo ta nunagoi,
we'e 'Auvea yada sakona matatabuna i ve'avalavedamanidi yana Tofolova 'waineye.
I tokemaigeni 'wa da vo bani'odi 'aisaya sifi siaina i da naweni 'eba luvewafa 'waineye,
'alo tutuyanina sifi vutuvutuna i boboboi i veve'wadamo.
Wata bani'odi Tofolovanina kebu i da vetafewa wata kebu i da 'we'wela, i ve'wadamo.
8 I 'ive'avini i vevita-maimaigi sakona faifaina siwe kebu tamu aitoi i da 'ivaiseni veimea tonovina 'wainega.
Kebu tamu aitoi yana wafa faifaina i da nuanua,
'alo i da 'asetai yaku tomotoga yadi sakona faifaina i luvewafai.
9 1 Fit 2:22Kebu tamu yana sakona,
vekali kebu tamu 'awanega i da souyeni.
Tosakona 'ana taumata faifaina i 'idewai,
we'e mogitana tove'ai'aiwabu 'ana taumaseye i ve'ufai.
10 Naninidi i souyediga fai 'Auvea yana nuanua 'atumaina i na 'ivekokovi bega vita i na veluagai.
Yana wafanina 'asa'aiana velomu sakona 'ana nuatavuna faifaina,
nika 'wainega tubunavo fuedi i na souyedi i na 'isedi.
Ma yana sosoana yana mia i na vemanawe,
'Auvea yana nuanua 'atumaina i na 'idewai nika 'ana mogitana i na souyeni.
11 Mogitana veviga i veluagai, siwe tutuyanina vuagina taunina i na 'iseni i na 'asetai kebu i da veviga-maimaiga
'Auvea i vona i vo,
Yaku Tofolova magemagetana yana veviga 'wainega
tomotoga fuedi yadi sakona i na tovoiedi bega nuatavuna i na veluagai,
nika yadi sauluva matatabuna tonovidi matakuye.
12 Mak 15:28; Luk 22:37Taunina i tauyeni wafa 'waineye,
we'e tomotoga i vo 'ako tamu tosakona.
Tomotoga fuedi yadi sakona i tovoiedi,
wata tovedumwe'ai'ai faifaidi i velu'ui.
Begaidi a na silakai,
ma 'ana ve'ililibu tomotoga toketokedi 'awasasadie.”