8
1-3 Fol 22:4-5,26:9-11Tomotoganidi Sitiveni i lukileuya i wafa Saulo i 'ise'iseni, i awave'atumaieni. Tomotoga 'ifwaidi Yaubada 'ana tovematayakayaka Sitiveni i mogaia, i 'ewai i nagoi i ve'ufai.
Keliso yana 'Aila'a vita bwaikina i veluagai bega i yavula
'Aiatanina 'waineye Sitiveni i wafaga, Iesu 'ana tovedumwe'ai'ai i velamu tovetumaganavo Ielusalema 'waineye veviga bwaikaotogina i veleveledi. Saulo i nago vanuga 'aitamogana 'aitamogana 'waidie, 'ai'edi bei tovetumaganavo vevine wata iaveta i veveluagadi, i yo'eyo'edi i nunawedi vanuga yogona nageneye. Bani'odi i munegidi igodi tovetumaganavo 'adi 'aila'a i da leo'a'avadi. Begaidi tovetumaganavonidi i yavula i nagoi 'awalawa fuedi 'waidie, Iudia wata Samelia nagedie. Tomata'aulelevo 'aisedi i miamiani Ielusalema.
Filifi i lau'age Samelia 'waineye
4 Tovetumaganavonidi i yavulaga i nagoi 'awalawa matatabuna 'waidie Iesu Valana i lulu'ageyeni. 5 We'e Filifi i nago tamu 'atamana bwaikina 'waineye 'awalawa Samelia nageneye, bei i lau'age Yaubada 'ana Venua'ivina Keliso faifaina. 6 Wata bei 'eba nuavogana wata 'eba nua'ewa i 'idewadi begaidi yana vona i vinenegeni 'atumaina. 7 Filifi 'eba nuavogananidi i 'idewadi side bani'odi. Tomotoga yaiaina i agediga i veugeugedi, nika ma yadi vebwaubwau i 'awa'a'idi 'waidiega. Bwalobwaloko wata tomotoganidi 'agedi sinunumidi fuedi i 'ive'atumaidi. 8 Begaidi tomotoga fuedi i sosoana bwaikina.
9 'Atamananina 'waineye tamu tomogo 'afo'afo'ana i miamia 'ana wagava Saimoni, taunina i awa'ai'aia i vo, Yau tomogo bwaikiku, yami 'eba 'isa.” Me Samelia fuedi nuadi i voganidi 'ana 'afo'a faifaina. 10-11 Fai tutuya fuedi 'eba nuavogana wata 'eba nua'ewa i 'i'idewadi, tomotoga bwaikidi wata tomotoga-'avo'avovo nuadi i 'ewai i ve'ililibuyeni igodi i vo, Tomogo de'e yana toketokena bwaikina Yaubada 'wainega.” 12 Siwe tutuyanina Filifi i le'wa i lalau'age Vala 'Atumaina faifaina, Yaubada yana veimea tomotoga 'waidie wata Yaubada 'ana Venua'ivina Iesu faifaina. Yana lau'agenina 'wainega fuedi i vetumagana, bega vevine wata iaveta i bafitaiso. 13 Wata Saimoni i vetumagana i bafitaiso, begaidi Filifi i yogo'wai'waili fai yana folova toketokedi i 'isedi nuana i 'ewai.
14 Tomata'aulelevo i miamianiga Ielusalema, vala i nogai me Samelia fuedi Yaubada yana Vona i vetumaganeni, bega Fita wata Ioni i vetunedi i na nagoi i na fogedi. 15-16 Tutuyanina i le'wai i 'asetai 'akonadi i bafitaiso 'Auvea Iesu 'ana wagavayega siwe 'Anu'anunu Magemagetana kebu i da agedi. 17 Begaidi Fita wata Ioni nimadi i yatodi 'unu'unudie, i velu'ui faifaidi nika 'Anu'anunu Magemagetana i agedi.
18-19 Tutuyanina Yaubada 'Anu'anunu Magemagetana i tauyeni tomotoganidi i agedi, Saimoni i 'iseni i nago Fita wata Ioni 'waidie igodi mani i da veledi i vo, Toketokenanina 'wa da veleku bega yau wata 'ai'edi nimaku a na yatodi tomotoga 'waidie, 'Anu'anunu Magemagetana i na agedi.” 20 Fita ma yana nuasako Saimoni i voneni i vo, 'Omu igodi Yaubada yana nuakalikali 'u da kimwanei maniega. Nuanuaku yamu maninina taiadi 'wa da luku 'ai-'ala'alase i da 'alaimu. 21 'Omu yamu folova wata 'ima yama folova kebu i da vesala. Kebu i da lubwainemu 'u na 'ivaisema fai yamu nuanua kebu tonovinaga Yaubada mataneye. 22 Sakonanina faifaina 'u nuanua, 'u na nuavilamu 'u na velu'ui 'Auvea 'waineye. Voke i na nuatavunimu. 23 A 'asetamu 'u ve'unumagigiema wata sakona i yogonimu.” 24 Saimoni i vona Fita wata Ioni 'waidie i vo, 'Wa da velu'ui faifaiku 'Auvea 'waineye, bega veviganidi 'wa voneyediga kebu i na sousouyedi 'waikuye.” 25 Fita wata Ioni i lulu'ivona 'Auvea faifaina mulieta i viladi i nunagoi Ielusalema, 'atamana fuedi Samelia nageneye 'waidiamo i nago, Iesu Valana 'Atumaina 'waidie i lau'age.
Filifi wata to'edakumeta Itiofia 'wainega
26 Tamu 'aiata 'Auvea yana anelose i souyeni Filifi 'waineye i voneni i vo, 'U na 'idewadewa nika 'u na nago yavalatayega, 'edeamo 'u na nunago tamu 'eda 'u na 'iseni Ielusalemayega i obuobu Gasa sali'avu'avu 'waineamo.” 27-28 Bega Filifi i 'idewadewa i tauya, i nunago 'edeye 'awalawa Itiofia 'ana toveimea tamu i veluagai. Toveimeanina tomogo bwaikina, Itiofia 'ana Kwini 'adi wagava Kanidesa yadi mani 'ana to'isave'avina. Tomogonina basenadi i luku Ielusalema, Yaubada 'waineye i 'odu, i 'a'ava i vilai i nunago yana salioti*Salioti tamu fwayafwaya 'ana waka, osi i luluyo'ei. 'wainega. I nunago 'edeye Yaubada yana Buki basenadiotoga Aisea i kilumi i lulu'iawawai. 29 'Anu'anunu Magemagetana Filifi i voneni i vo, 'U vaganago waka lilivaotogineye.” 30 Filifi i lilide i nago tomogonina lilivaneye, i nogai i lulu'iawawaga bega i velutolieni i vo, Bukinina 'u lulu'iawawaiga 'u 'asetai 'alo kebu?” 31 Tomogonina Itiofiayega i vo, Bani'odi a na munega a na 'asetai? 'Ai'edi aitoi i da kiavemagetai 'waikuye 'aku fata a da 'asetai. 'Ai'edi 'u da 'asetaiga 'u da lakama lilivakuye 'u da miabui 'u da kiavemagetai 'waikuye.” 32 Ais 53:7-8Vonanina Yaubada yana Buki nageneye i lulu'iawawaiga side bani'odi.
I 'ivekokoviga, siwe kebu tamu vona 'awanega i da souyeni.
I tokemaigeni 'wa da vo bani'odi sifi siaina i da naweni 'eba luvewafa 'waineye,
'alo tutuyanina sifi vutuvutuna i boboboi i veve'wadamo.
Wata bani'odi, Tofolovanina kebu i da vetafewaga wata kebu i da 'we'welaga, i ve'wadamo.
33 Tomotoga i awaobubouyeni wata veviga bwaikina i veleni,
siwe kebu tamu aitoi i da 'ivaiseni veimea tonovina 'wainega.
Kebu 'ana fata tubunavo ta na luveseveseseledi,
fai yana mia fwayefwayeye i daba-matayo'oi yana 'aila'a kebu.
34 Itiofia 'ana toveimea Filifi i velutolieni i vo, Nuanuaku a na 'asetai aitoi faifaina i vonavona, taunina 'alo tamu tomogo?” 35 Bega Filifi vonanina 'wainega i velamu, Vala 'Atumaina Iesu faifaina i kiavemagetai.
36 I nunago 'edeye ufa i 'iseni toveimeanina Filifi i voneni i vo, Ufa sino. I lubwaineku 'u na bafitaisoku.” 37 †De'e kilumanina kebu i da 'eno'eno buki tuatuaiotogidi 'ifwaidi nagedie.Filifi i voneni i vo, 'Ai'edi yamu nuanua matatabuna 'u na tauyeni Iesu 'waineye 'u na vetumaganeni a na bafitaisomu.” Toveimeanina i vo, A vetumagana Iesu Keliso taunina Yaubada Natuna wata 'ana Venua'ivina 'waineye.” 38 Waka i 'ailove, 'adi 'ailuga i obu i tovi'utuva ufeye, Filifi toveimeanina i bafitaisoi. 39 Tutuyanina i lakama 'avale Filifi i 'awafa'wani fai 'Auvea 'Anu'anununa i vagavaia i naweni, we'e toveimeanina kebu i da 'asetai ava'aiamo i nago kebu wata i da 'iseni, siwe ma yana sosoana i tauya i nago yana vanuge. 40 We'e Filifi i souyeni 'atamana Asota, i nago 'atamana bwaikidiamo Iesu Valana 'Atumaina i lu'ageyeni i nago i le'wa Sisalia.