55
'Auvea yana vona ma vuagina
Egavo 'wa veufa'ani'anigokuga,
'wa na maia 'waikuye, 'anigomi a na 'ivebikadi.
Wata bani'odi, egavo i vewekowekomaga,
'wa na maia 'waikuye nonogina 'wa na 'ewadi 'wa na 'ani.
'Wa maia, oine wata bulumakau susudi 'wa na 'ewadi 'wa na yemu,
siwe kebu 'wa na tutulidi.
2 Kebu yami mani 'wa na ve'amubwadodoyeni 'ani'ani-'a'a'avidi 'waidie,
wata kebu 'wa na toke 'wa na folova nani-'avo'avovo faifaidi,
i na nunago kebu 'ana 'atumaina 'wa na veluagai.
Bonaku 'wa na vinenegeni bega 'wa na nogai,
nika 'wa na 'ani-'atumai wata ma yami sosoana 'ani'ani 'iwanidi 'wa na 'ani.
3 Fol 13:34'Wa na maia a na vonemi, yaku vona 'wa na nogaidi
nika 'ami fata yami mia 'atumaina 'wa na veluagai.
Yaku veakutagona a na 'idewai 'waimie, i na 'eno-vagata,
bega yaku nuakalikali faifaimi kebu i na 'ailove,
bani'odi kini Devida 'waineye a vona'awaufaufa.
6 'Auvea 'wa na lualeni 'ana fata 'asiau 'wa na veluagai,
'wa na vevelu'ui 'waineye, fai taunina lilivamie i miamia.
7 'Omi tosakona, yami sauluva sakoidi 'wa na vedumwe'ubu'ubusedi,
wata 'wa na nuavilami yami sakona 'waidiega.
I lubwainemi 'Auvea 'waineye taunimi 'wa na tauyemi i na 'isanuakalikaliemi.
Yaubada 'waineye 'wa na vevelu'uiga, 'ana fata yami sakona matatabuna i na nuatavunidi.”
8 'Auvea i vona i vo, Yaku venua'ivina kebu 'omi yami venua'ivina taiadi ta da vesala.
Yaku sauluva, kebu 'omi taiadi ta da vesala.
9 Abama tabwaotogineye, fwayafwaya 'wainega i laka-'afo'afo,
we'e yau yaku sauluva 'ana 'etowava, yami sauluva i vebwaika-'iawedi,
wata yau yaku venua'ivina i vaganago-'afo'afo, 'omi kebu bani'odiga.
10 2 Kol 9:10Bani'odi 'wei wata sinou*Sinou 'asa'aiana 'wei wata fayo i vevebi'webi'wedi abamega i obuobuma. Vona Dimudimu 'waineye, snow we'e 'ida'e sinou. i obuobuma abamega,
kebu i da vila-matayo'odiga,
nagamidi yadi folova i 'i'idewadi fwayafwaya i 'i'ivebikadi.
Wata waifei i veveudi i vevebwaika,
nika tomotoga 'adi fata i na bakula wata i na 'ani.
11 Yaku vona wata bani'odi,
kebu 'ana fata nage'avana i na vilai 'waikuye.
Kebu'a. Nagamidi yana folova i na 'idewai.
Naninidi nuanuaku i na 'idewadiga, matatabuna i na 'idewa'a'avadi.”
12 Mia-niwalova wata sosoana nageneye 'wa na miamia.
'Oya bwaikidi wata siaidi bonadi bwaikinega i na leilei,
welavinidi wala'aie nimadi i na nikenikedi.
13 Gawa lovelovenidi basenadi bei i veve'alatabotaboga,
'awaie welavi bwaikidi wata manamanawedi i na tovotovoi.
We'e siusiu bei i veve'alatovoiga,
'awaie welavi 'adi 'isa 'atumaidi i na tovotovoi.
De'e tugusanidi bwaikidi i na sousouyediga, 'Auvea 'ana wagava 'ana ve'ililibu faifaina,
wata tugusanidi 'eba 'isa yana toketokena wata yana nuakalikali i na 'eno-vagata.