1 Tamu 'aiata Yaubada yana anelosevo*'Ana mogitana vona Ibeliu 'waineye, Yaubada natunavo. abame i mai-vaitugana 'Auvea 'waineye i tovoi mataneye, we'e Seitani taiadi. 2 Nika 'Auvea Seitani i velutolieni i vo, 'Omu ava'aiega 'u mai?” Seitani i tutula i vo, Yau fwayefwayeye a yabayaba, nani matatabuna a 'ise'isedi.”

3 Nika 'Auvea Seitani i velutolieni i vo, Yaku tofolova Iobi 'u 'iseni 'alo kebu? Tomogo de'e tamu tomogo 'atumaiotogina, kebu tamu aitoi bani'odiga fwayafwaya tabwaneye. Yana sauluva tonovina wata ma yana ve'ililibu yau Yaubada i kololoyeku, we'e sauluva sakoidi i vedumwe'ai'aiedi. Kebu tamu yana sakona siwe 'u lukakadeku nuanuamu vita a da veleni, we'e Iobi ma yana vetumagana fa'alina i miamia.”

4 Seitani i vo, Iobi 'asa'aiana taunina 'aisena faifaina i toke i vevenua'ivina. 'Ai'edi tamu tomogo sai'afoga yawaina i na 'a'ava, yana kukua matatabuna i na 'anivelenedi nika kebu i na wafaga. 5 'Ai'edi viga sakoina Iobi 'u na veleni nika matamuye i na awavesakoyemu.”

6 Nika 'Auvea Seitani i voneni i vo, 'Atumaina, 'asiau bega i nunagoga a tauyeni 'waimuye, siwe kebu 'u na luvewafai.”

7 I 'a'avana Seitani 'Auvea i 'iaweni i nago Iobi i nikei bonu'ai sakoiotogidi i velufo'afo'ana, 'agenega i laka 'unu'ununeye. 8 Iobi yana nuavita faifaina i miabui 'aufafa tabwaneye, we'e yana bonu'ai i talakaikailidi nau sekanega.

9 Yana vavine i voneni i vo, Vita fuedi i souyedi 'waimuye, awale bola ma yamu tokemaiga wata ma yamu ve'ililibu 'u miamia? 'Omu i lubwainemu Yaubada 'u da awavesakoyeni, nika 'u da wafa.”

10 We'e Iobi i tutula i vo, Yami veifufu 'adi nogaya 'wa da vo vavine 'wava'wavadi. Nani 'atumaidi Yaubada i veleveleda ma yada sosoana ta na 'ewadimo, we'e nani vitadi i na veledaga awale ta vona-vaitugana?” Avinodi vitanidi matatabuna i souyedi Iobi 'waineye, siwe kebu Yaubada i da awavesakoyeniga.

11 Iobi enavo 'adi aitonu we'e 'adi wagava side, Elifasi tomogo Temani, Bilidadi tomogo Sua wata Sofa 'atamana Namata 'wainega. Tutuyanina enavo valana i nogai, vitanidi i veluagadiga, i maia nuanuadi iadi i na fogei wata nuana i na 'iveolooloi. 12 Tutuyanina Iobi 'ani'ieyega i 'isanaweni kebu i da 'isa'inanaiga bega enavo i toke i vevemogai nika ma yadi nuavita 'adi talauma i silabu'idi, we'e 'aufofo'uala i tawetaweni i lakalaka 'unu'unudie. 13 Bei i miabui fwayefwayeye Iobi taiadi 'aiata 7 wata lovana 7 nagedie. Enavo yana veviga i 'iseni sakoiotogina, bega kebu tamu ava'ai i da voneyeniga, matatabudi i mia-vinenegamo.