Iobi
'Eba kiavemageta
De'e kilumanina 'waineye tamu tomogo yana sauluva 'atumaina wata magemagetana we'e vita fueotogidi sakoidi i souyediga 'waineye ifuifufuna. Vitanidi lamudi faifaidi Iobi i toke i vevenua'ivina, wata enavo bani'odi. Yadi nuanua i vo, Voke Yaubada Iobi i vematavulogi fai 'ifwaidi nani i 'idewadiga Yaubada kebu yana 'eba sosoanaga.” Siwe Iobi i 'aseta-'atumaia de'e kebu mogitanaga. Iobi yana vetumagana i yato-vagaseni Yaubada 'waineye, we'e vitanidi lamuna i bavuyeni.
Kilumanidi nageneye Yaubada kebu Iobi vitanidi 'adi kiavemageta i da veniga, we'e i veni yana toketokena wata yana nuamageta kebu tamu aitoi 'ana fata i na 'asetadiga.
Tutuyanina Iobi i 'asetai Yaubada toketokena wata 'ana nuamageta bwaikaotogina kebu aitoi taiadi i da vesalaga, begaidi Iobi i 'ailove yana velutolitoli vitanidi yadi souyagi faifaidi, we'e mogitana Yaubada i subisubiaimo.
Kiluma 'eba ve'a'ava 'waineye, Yaubada Iobi i 'ive'atumaia 'ana viganina 'wainega, i 'a'avana natunavo fuedi i veleni wata yana 'ai'aiwabu i vele-vaituganeni. We'e Iobi enavo i tolimatanidi fai kebu Iobi 'ana vitanidi i da 'aseta-'atumaidi.
1
Iobi wata yana 'aila'a taiadi
1 'Awalawa Usi 'waineye tamu tomogo bei i miamia 'ana wagava Iobi. Tomogonina yana sauluva 'atumaina wata magemagetana, ma yana ve'ililibu Yaubada i kololoyeni, we'e sauluva sakoidi i vedumwe'ai'aiedi. 2 Natunavo 'adi 'aila'a 10, iavetadi 7 we'e vevinedi 3. 3 Yana 'aisayavo fueotogidi sifi 'adi 7,000, kameli 'adi 3,000, bulumakau 'adi 1,000 wata doniki vevinedi 'adi 500 bani'odiga. Kumanina yana tofolovavo fuedi faifaina i folofolova. Tomogonina 'ai'aiwabuna kebu 'ifwaidi tomotoga bani'odiga i miamia inala yana 'eba lakayega.
4 Iobi natunavo iavetadi 'aitamogana 'aitamogana yadi tutuya lusakali i na veluagai bega i na 'idewadewa i na 'a'avana enavo iavetadi wata novudiavo 'adi aitonu i na tayegidi i na maia taiadi i na ve'ala'ani wata i na yemu.
5 Lusakali 'adi tutuya i 'a'avana, Iobi natunavo i vonevonedi i mimaia bega i 'i'ivevunavunagidi Yaubada mataneye. Yana nuanua i vo, Voke natukwavo i sakona 'alo nuadiega Yaubada i awavesakoyeni.” Begaidi bola 'awa'awaiogose i 'e'enoviladi 'aisaya i vevelomuyedi i kabukabunidi Yaubada 'waineye natunavo 'aitamogana 'aitamogana faifaidi, bega i na vevevunavunaga Yaubada mataneye.
Yaubada wata Seitani yadi ve'ikwayekwayega
6 Nag 6:2Tamu 'aiata Yaubada yana anelosevo*'Ana mogitana vona Ibeliu 'waineye, Yaubada natunavo. abame i mai 'Auvea 'waineye i tovoi mataneye, we'e Seitani taiadi. 7 'Auvea Seitani i velutolieni i vo, 'Omu ava'aiega 'u mai?” I tutula i vo, Yau fwayefwayeye a yabayaba, nani matatabudi a 'ise'isedi.”
8 Nika 'Auvea Seitani i velutolieni i vo, Yaku tofolova Iobi 'u 'iseni, 'alo kebu? Tomogo de'e tamu tomogo 'atumaiotogina, kebu tamu aitoi bani'odiga fwayafwaya matatabuna 'waineye. Yana sauluva tonovina wata ma yana ve'ililibu yau Yaubada i kololoyeku, we'e sauluva sakoidi i vedumwe'ai'aiedi.”
9 Ve 12:10Seitani i tutuli i vo, Fai 'omu 'u ve'isabodaboda-'atumaieni begaidi ma yana ve'ililibu i nuakalikaliemu. 10 'Omu tutuya fuedi 'u 'i'ita'ita'ieni, yana vavine, natunavo wata yana kukua matatabuna taiadi. Fai 'omu 'u vevesauluva-'atumaieni yana folovanidi matatabuna 'waidiega 'u 'ive'ai'aiwabuya, begaidi yana 'aisayavo fueotogidi, 'awalawanina 'waineye i miamianaga matatabuna i luvaia. 11 'Asiau bega i na nagoga 'ai'edi yana kukua wata nani matatabuna 'u na eloi, nika i na awavesakoyemu.”
12 'Auvea i vona i vo, 'Atumaina, yana kukua matatabuna nimamuye a yatodi, we'e kebu tomogona 'u na 'abitonoviga.”
'Auvea i vona i 'a'avana, Seitani i tauya i nago.
Iobi vita i veluagai
13 Tamu 'aiata 'waineye Iobi natunavo iavetadi wata vevinedi i lulusakali natuna tulaina yana vanuge. 14-15 Tutuyanina 'waineye vala 'ana to'ewa i mai Iobi yana vanuge i voneni i vo, Yamu tofolovavo bulumakau 'waidiega i luvuavuanaga wata yamu doniki mosomoso i veve'ala'ani lilivadie, nika me Sabe i maia yamu 'aisayavo i vinagodi wata yamu tofolovavo i luvewafadi, we'e yau 'aiseku a dega a mai a na vonemu.”
16 Bola tomogonina i veveifufu, tamu vala 'ana to'ewa i le'wa i veifufu i vo, Abamega i kianamali†'Ana mogitana vona Ibeliu 'waineye, Yaubada yana 'ai 'ala'alaina. yamu sifi wata 'adi to'isave'avinavo i 'alalekoadi we'e yau 'aiseku a dega a mai a na vonemu.”
17 Bola tomogonina i veveifufu, 'ana vetonu vala 'ana to'ewa i le'wa i veifufu i vo, 'Aila'a aitonu tovainago 'awalawa Babiloniega i maia yamu kameli i vinagodi wata yamu tofolovavo i luvewafadi, we'e yau 'aiseku a dega a mai a na vonemu.”
18-19 Bola tomogonina i veveifufu tamu vala 'ana to'ewa i le'wa i veifufu i vo, Natumwavo iavetadi wata vevinedi i lulusakali yamu tubu'edakumeta yana vanuge, nika kaukau toketokena i nunuga i mai sali'avu'avuyega, i luluvivilaga vanuga i yagifeleni, we'e natumwavo matatabudi i luvewafadi. Yau 'aiseku a dega a mai a na vonemu.”
20 Iobi i tovoi 'ana talauma i silabu'i, nava'auna i 'welia yana nuavita faifaina i lumata'afufu maigina i obu fwayafwaya 'waineye Yaubada i subiai. 21 Bega i vona i vo,
Yau a tubuga konekoneku,
Yawaiku i na 'a'avaga wata konekoneku.
'Auvea kukuanidi i velekuga 'asiau 'waikuyega i 'ewadi.
'Auvea 'ana wagava a na subiai.”
22 Vitanidi i souyediga Iobi 'waineye, siwe kebu i da sakona Yaubada i da 'uvaniga.