Iosua
'Eba kiavemageta
Buki de'e 'ana wagava Iosua. Bukinina 'ana 'eba velamu 'waineye i veifufu Iosua bani'odi i munega bega i veto'edakumeta me Isileli faifaidi. Tutuyanina Mosese yawaina i 'a'ava, Iosua me Isileli i 'edakumesedi Ufa Iolidani i damani i luku Kenani, 'aila'anidi bei nagami i miamianiga i leodi. Wata kilumanina 'waineye i veifufu fwayafwayanina i vadabadabai i veuseni me Isileli wauma 12 'waidie.
1
'Auvea Iosua veimea i veleni Kenani i na tala'avui
1-2 'Auvea yana tofolova Mosese yawaina i 'a'avana, 'Auvea i veifufu Mosese 'ana to'aivaita Iosua, Nuni natuna 'waineye i vo, Mosese yaku tofolova 'akonadi yawaina i 'a'ava, we'e 'asiau 'omu wata me Isileli matatabudi 'wa na 'idewadewa Ufa Iolidani 'wa na damani nika 'wa na luku fwayafwayanina a velevelemiga 'waineye. 3 VeL 11:24,25'Awalawanidi 'aitamogana 'aitamogana 'waidiamo 'wa na nunagoiga, 'asa'aiana yami fwayafwaya 'akonadi a velemi, bani'odi basenadi a vona'awaufaufa Mosese 'waineye. 4 Fwayafwayanina 'ana tugusa i na velamu Negevi sali'avu'avu bolimanayega, i na nagoga yavalatayega 'Oya Lebanoni 'waineye. Iufiletisi Ufa bwaikina inala yana 'eba lakayega wata me Aiti yadi 'awalawa matatabuna taiadi, i na nagoga inala yana 'eba inivayega Eyaga Mediteleniani 'waineye. 5 VeL 31:6,8; Ibu 13:5Iosua, kebu tamu aitoi 'ana fata gavia 'wainega i na 'atagibaimu yamu mia matatabuna 'waineye. Basenadi Mosese bani'odi yau 'omu taiadi, kebu 'ana fata a na 'iawemu 'alo a na venuafanimu.
6 VeL 31:6,7,23'U na vetoketoke ma yamu venuafoufa'ala, tomotoga 'u na 'edakumesedi 'wa na luku fwayafwayanina, basenadi a vona'awaufeufeniga tubumiavo 'waidie, 'wa na vili. 7 I lubwainemu 'u na vetoketoke wata nuafoumu i na fa'ali, kebu 'u na kolologa. 'U na 'isa'isa bega veimea matatabuna yaku tofolova Mosese i velemuga, 'u na vematayakeyakedi. Kebu 'u na yogo-'avo'avovo we'e mogitana yamu folova matatabuna 'waineye 'u na vetoketoke. 8 Tutuya matatabuna veimea kilukilumidi 'u na lulu'iawawa-vebogidi, 'aiaseye wata lovane 'u na nuanuanidi bega veimeanidi 'aitamogana 'aitamogana 'u na vevematayakeyakedi. 'Ai'edi bani'odi 'u na vevesauluvediga yamu folova i na ve'atumai wata 'u na vetoketoke.”