1 'Auvea Mosese i voneni i vo, 2 Me Isileli wauma 'adi 12 'aitamogana 'aitamogana 'waidiega tamu to'edakumeta 'u na venua'ivineni, kumanidiavo i na nago Kenani i na vetaui'wali, 'awalawanina a 'a'aniveleneni 'omi me Isileli 'waimie.”

3 Ava'ai 'Auvea i voneyeniga, Mosese matatabuna i 'idewadi, bega tovetaui'wala 12 me Isileli wauma 'aitamogana 'aitamogana 'adi to'edakumetavo i venua'ivinedi. I 'a'ava nika i tauya yadi bae'wa 'wainega, Felani Sali'avu'avuye.

17 Mosese bola tovetaui'walanidi kebu i da vetunedi Kenani, nagamidi i vonedi i vo, 'Wa na nagoi Negevi 'waineamo nika 'wa na laka 'oya siaidi yana 'awalawa 'waineye. 18 'Awalawanina 'wa na 'iseni wata tomotoganidi bei i miamiani 'wa na 'asetadi, toketokedi 'alo mweadi, tomotoga 'adi 'aila'a bwaikina 'alo siaina. 19 Wata yadi fwayafwaya 'wa na 'iseni, 'eba bakula 'atumaina 'alo bwakabwakana, yadi 'atamana kileu 'waidiega i didigidi bega i kaliedi 'alo i miamia vadavada 'waidie. 20 Wata fwayafwayanina 'wa na vetonova-dewai 'aile'wa bwaikina i veveluagai bakulanidi 'waidiega 'alo kebu. Yadi wala'ai 'wa na 'iseni welavi fuedi i veve'alatovoi 'awalawanina 'waineye 'alo kebu. Tutuyanina 'wa na vetaui'wali i na 'a'avana, ma yami tokemaiga 'ai vuavuaga tulina tulina 'wa na 'ewadi 'wa na miedi.” De'e kumaga 'ana tutuya bega kalefa i velamu i mu'amu'a. 21 I 'idewadewa i 'a'ava i tauya i nago Tini Sali'avu'avu 'wainega bega 'awalawa matatabuna i vetaui'wali, i nagoi tamu 'awalawa 'ana wagava Leobu we'e 'atamana Lebo Amati lilivaneye.

25 'Aiata 40 i 'a'ava, tovetaui'walanidi i viladi yadi 'eba vebae'wa 'waineye. 26 Bega i maia Mosese, Eloni wata me Isileli matatabudi 'waidie, kumanidiavo i miamiani Kadesi, Felani Sali'avu'avuye. Tutuyanina i le'wai naninidi matatabuna i 'isediga i veifufuyedi wata 'ai vuavuaganidi i miedi 'awalawanidiavo 'waidiega i vedi. 27 Tovetaui'wala i veifufu Mosese 'waineye i vo, 'Awalawanina 'ana fwayafwaya 'a 'iseni 'atumaiotogina malia i 'eno-vagata, 'wa da vo mai'awa wata bulumakau susudi i da taitaina. Fwayafwayanina vuagina side 'a 'ewadi 'a miedi.” 28 We'e i vo, Tomotoganidi bei i miamianaga toketokedi wata yadi 'atamana matatabudi bwaikidi wata kileuyega i kalidi. Tomotoganidi kebu siaidiga, 'adi 'isa 'eba kololo Anaka*Me Anaka tomotoga bwaikidi wata manamanaweotogidi. 'Wa na 'iseni Veimea 2:10,11,20,21 'ana wauma 'wainega. 29 Me Amalekaiti bolimanayega i miamia 'awalawa Negevi, we'e me Aiti, me Iebusaiti, me Amolaiti i miamia 'oya siaidi 'waidie. We'e me Kenani balabala 'waineye i miamiani we'e 'ifwaidi Ufa Iolidani lilivaneamo i mia-delidelia.”

30 Nika Kelebi tomotoga matatabudi Mosese taiadi i tovotovoiga i talabodedi wata i vonedi i vo, 'Wa ve'wada a na vonemi. I lubwaineda 'asiauotoga ta na laka bega tomotoganidi ta na 'wavinedi nika ta na luvaia, 'ana fataotoga ta na vetoketoke-'iawedi.”

31 We'e tovetaui'walanidi Kelebi taiadi i nagoiga i kwayega i vo, Tomotoganidi bei i miamianaga toketokeotogidi mulieta 'ida'e, begaidi kebu 'ada fata ta na nagoi taiadi ta na vetalaga.” 32 Nika veifufu-vekavekali me Isileli matatabudi i nogai 'awalawanidiavo wata yadi fwayafwaya i 'isediga faifaidi. Wata matatabudi i veifufu i vo, Yadi fwayafwaya kebu 'eba bakula 'atumaidiga we'e egavo bei i na miamiaga, fwayafwayanina i na luvela'ovidi. 'Ana tomotogavo 'a 'isediga 'asa'aiana 'eba kololo fai bwaikaotogidi wata manamanawedi. 33 Nag 6:4Wata bei me Nefilimi†Me Nefilimi, 'wa na 'iseni Nagami 6:4 'a 'isedi, tomotoganidi kebu siaidiga Anaka 'ana wauma 'wainega i souyeni. Tutuyanina 'a 'ise'isedi 'ima 'wa da vo limwana 'ama 'isa'isa bani'odi, we'e 'ai'edi taunidiavo i na 'isemaga i na vo, No'o tomotoga 'alo limwana?”