1 Tomotoga 'aila'a bwaikina i toke i 'we'wela bonadi bwaikinega i taivonavona lovana matatabuna 'waineye. 2 Me Isileli matatabudi i vona-vaitugana Mosese wata Eloni 'waidie i vo, I lubwaineni 'a da wafa Itifita 'waineye 'alo de'e sali'avu'avuye 3 Awale 'Auvea i vagavaima ta nunago no'o 'awalawanina 'waineye? Bei i na nikema 'a na wafa vetalaga 'wainega. We'e yama vevinevo wata natumavo 'asa'aiana i na kiave'avinidi 'wenedi. I lubwaineni ta na vilada Itifita bei mia 'atumaina ta na veluagai.” 4 'Aise'avadi ma ediavo i vonavona i vo, Tamu to'edakumeta ta na venua'ivineni i na 'edakumeseda ta na vilada Itifita.”

5 Mosese wata Eloni yadi awavesako i nogai i lumata'afufu fwayefwayeye me Isileli 'adi 'aila'a matatabudi matadie. 6 Nika Nuni natuna Iosua wata Iefune natuna Kelebi, kumanidiavo taiadi i nagoi 'awalawanina i vetaui'waliga, 'adi talauma i labu'idi yadi 'anigosako faifaina. 7 'Adi 'ailuga i veifufu me Isileli matatabuna 'waidie i vo, 'Awalawanina 'a vetaui'waliga 'a 'iseni 'asa'aidina 'atumaiotogina kebu 'ifwaidi fwayafwaya bani'odiga. 8 'Ai'edi 'Auvea i na sosoanedaga, i na kumeseda ta na luku 'awalawanina i na veleda. 'Awalawanina 'atumaiotogina malia i 'eno-vagata, 'wa da vo mai'awa wata bulumakau susudi i da taitaina. 9 Ibu 3:16Kebu 'wa na manini 'Auvea 'waineye wata tomotoganidi bei i miamiani kebu 'wa na kololoyediga, 'asa'aiana 'weneda. 'Ida 'ada fataotoga ta na vetoketoke-'iawedi, fai yada 'Auvea taiadi we'e kumanidiavo kebu tamu 'adi to'ita'ita'iga, begaidi kebu 'wa na kololoyediga.

10 Bega tomotoga matatabudi sai'afoga Iosua wata Kelebi i da lukileudi, nika 'Auvea yana mageta mataududulina i souyeni Vadavada Tabutabuna 'waineye me Isileli matatabudi i 'iseni.

26 Tamu 'aiata 'Auvea Mosese wata Eloni i vonedi i vo, 27 De'e tomotoganidi sakoidi tutuya matatabuna i vevebonavoluvolu yau 'Auvea faifaiku. Me Isileli yadi vona-vaitugana faifaiku 'akonadi a nogai. 28 Bonaku side, 'u na lu'ivoneyeni 'waidie 'u na vo, Yau 'Auvea miamia-vagaiku begaidi a vona-vagata 'waimie, naninidi faifaidi 'wa vona-vaitugana, a na 'idewai 'waimie. 29 Ibu 3:17Yami nagonina sali'avu'avu 'waineamo egavo tovebonavoluvolu 'adi malamala 20 bega i lakaga, matatabudi i na avuta wafa 'wainega. 30 Kebu tamu aitoi 'waidiega i na luku i na luvaia 'awalawanina a vona'awaufeufeni me Isileli 'waidie, we'e Kelebi, Iefune natuna wata Iosua, Nuni natuna, 'aisedi i na luku.

31 We'e 'wa vonaga natumiavo 'ami gaviavo i na kiave'avinidi 'wenedi, siwe a na vonemi, natumiavo yau 'Auvea a na lukuvedi 'awalawanina 'waineye. 'Omi 'awalawanina 'wa baileni we'e natumiavo i na luvaia bei i na vili. 32 We'e 'omi matatabumi 'wa na ve'alawafawafa sali'avu'avuye. 33 Fol 7:36Yami vedumwe'ai'ai 'ana vita natumiavo i na evai malamala 40 nagedie i na veto'isave'avina sifi sali'avu'avuyeamo i na yabayaba, 'ana tugusa matatabumi 'wa na wafa'a'ava sali'avu'avuye. 34 Fai 'aila'animi 'waimiega fwayafwayanina i vetaui'wali 'aiata 40 nagedie, bega malamala 40 nagedie 'wa na yabayaba sali'avu'avuyeamo. Malamala 'aitamogana 'aiata 'aitamogana faifaina, yami sakona 'ana tutula 'wainega 'wa na 'abiawa. Nika 'wainega nuami i na magetai 'wa na 'asetaku yau 'ami gavia. 35 Yau 'Auvea, a vona-vagata bega ava'ai a voneyeniga, a na 'idewai. Egavogi i vebonavoluvoluyeku, matatabudi a na luvela'ovidi bei i na wafa'a'ava sali'avu'avuye.”