4 VeL 2:1Me Isileli 'Oya Owa i 'iaweni Eyaga Yamoyamoina 'ana 'edeamo i nago bega 'adi fata 'awalawa Idomu i na kekeseni. Siwe yadi nagonina 'waineye tomotoga kebu 'adi fata i na tokemaigediga fai i ve'abi'abiawa. 5 1 Kol 10:9Begaidi i vona-vaitugana Yaubada wata Mosese 'waidie i vo, Awale Itifitayega 'u miema sali'avu'avuye bei 'a na wafa. 'Ani'ani kebu, ufa kebu, wata kebu nuanuama mana waiwainua.”

6 'Auvea 'o'olo kasikasisidi i vetunedi 'waidie, tomotoga i ovaovadi nika me Isileli fuedi i ve'alawafawafa. 7 Tomotoga fuedi i maia Mosese 'waineye i taidaida i vo, 'Ima 'a sakona fai 'a vona-vaitugana 'Auvea 'waineye wata 'omu 'waimuye. 'U da velu'ui 'Auvea 'waineye bega 'o'olo i da 'ewayavuledi 'waimega.” Bega Mosese i velu'ui tomotoganidi faifaidi.

8 'Auvea Mosese i voneni i vo, 'O'olo kasikasisina tamu 'ana 'isa'isa 'u na 'idewai, bega welavi 'u na vetovoia tabwaneye 'u na yatoi. 'Ai'edi tomotoganidi 'o'olo i na ovadiga i na 'isalaka 'waineye nika i na ve'atumai.” 9 2 Kin 18:4; Ion 3:14Bega Mosese 'o'olo 'ana 'isa'isa i 'idewai kainumu balonisi 'wainega, welavi i vetovoia tabwaneye i yatoi. 'Ai'edi aitoi 'o'olo i na ovaiga, i na 'isalaka 'o'olo kumaea 'waineye kebu i na wafaga.*Wata 'wa na 'iseni Ioni 3:14 wata 2 Kini 18:4

10 Me Isileli i kwekwe i vaganago Oboti bei i vebae'wa. 11 Bega i tauya i nago inala yana 'eba lakayega Aie-abalimu sali'avu'avuye, 'awalawa Moabe 'ana tugusa 'waineye, bei i vebae'wa. 12 Wata bega Me Isileli i tauya, Dieledi laube'uneye i vebae'wa. 13 Tutuya 'ifwaidi i 'a'ava i souyedi i nago Ufa Anoni vi'ainega sali'avu'avuye i vebae'wa, me Amolaiti yadi 'awalawa lilivaneye. Ufa Anoni, me Moabe wata me Amolaiti yadi 'awalawa 'ana tugusa.

21 Me Isileli yadi vala i vetunei me Amolaiti yadi Kini Sioni 'waineye i vo, 22 Nuanuama 'u da tauyema yamu 'awalawa 'waineamo 'a da nagoi. Kebu 'eda 'a na veu'agali 'a na damana, kebu 'a na luku 'ami talaga 'alo kalefa 'adi bakula 'waidie. Wata 'ami ufa 'wa aladiga kebu 'waidiega 'a na yemu. Kini yana 'Edeamo 'a na nagoi 'ana tugusa yamu 'awalawa 'a na 'iaweni.”

23 Siwe Kini Sioni me Isileli kebu i da tauyedi bega yana 'eba veimea 'waineamo i na nagoi, begaidi yana tolugaviavo i va'augidi taiadi i nagoi sali'avu'avuye, Diasi bei me Isileli i veluagadi nika taiadi i vetalaga. 24 Me Isileli Kini Sioni wata yana tomotogavo i vetoketoke-'iawedi kefatayega i leodi, yadi fwayafwaya i 'ewai, Ufa Anoni 'wainega i nagoga 'ana tugusa Ufa Dabuko 'waineye. Me Isileli kebu i da vaganagoga fai me Emumoni yadi tugusa i toke i ve'isabodebodeni. 25 Me Isileli me Amolaiti i luveyavulidi, yadi 'atamana bwaikina Esabona wata 'atamana siasiaidi matatabuna 'waidie i vili.

31 We'e me Amolaiti yadi fwayafwaya matatabuna me Isileli i 'ewai i veimeyeni. 32 Tutuya 'ifwaidi i 'a'ava Mosese tovetaui'wala i vetunedi i nagoi Diesa i vetaui'wali. I 'a'ava me Isileli i luku 'atamananina i 'ive'avini, me Amolaiti bei i miamianiga, matatabudi i sogiedi. 33 I 'a'avana i viladi i nagoi Besana 'ana 'edeamo siwe me Besana yadi Kini Oga wata yana tovetalagavo i nagoi Edelei bega me Isileli taiadi i na vetalaga.

34 Siwe 'Auvea Mosese i voneni i vo, Kebu 'u na kololoyeniga fai ma yana tolugaviavo matatabudi a tauyedi 'u na leodi, wata yadi fwayafwaya 'u na veimeyeni. Basenadi me Amolaiti yadi Kini Sioni, Esabona bei i veveimea 'u nikeiga, wata bani'odi Kini Oga 'u na nikei.” 35 Bega me Isileli Kini Oga, natunavo wata yana tolugaviavo matatabudi i luvewafadi, kebu tamu aitoi i da yavaiga we'e yana fwayafwaya i 'ewai.