3
Iesu i veifufu Nikodimo taiadi
1 Ielusalema 'waineye tamu Diu totafalolo Falisi 'ana wagava Nikodimo i miamia, we'e taunina tamu me Diu to'edakumeta bwaikina. 2 Tamu lovana 'waineye i mai Iesu i voneni i vo, 'Auvea, 'a 'asetamu 'omu Tove 'u mai Yaubada 'wainega. Kebu tamu aitoi 'ana fata 'eba nuavogana wata 'eba nua'ewa 'u 'i'idewadiga, bani'odi i na 'idewadi, 'omu 'aiseotogimu Yaubada yana toketokena 'wainega 'u folofolova.” 3 Siwe Iesu i voneni i vo, A vona mogitana 'waimuye 'ai'edi aitoi kebu i na tubuve'ivau, kebu 'ana fata i na luku Yaubada yana 'Eba Veimea 'waineye.” 4 Nikodimo i velutoli i vo, Tulaidi bani'odi i na munega i na tubuga-vaitugana? Kebu 'ana fata tamu tomogo i na luku inana umwadie wata i na tubuga-vaitugana.” 5-6 Iesu i voneni i vo, Tomotoga inadiavo 'waidiega i tubuga taunidi 'asa'aiana 'adi wagava tomotoga. We'e egavo i na tubuve'ivau 'Anu'anunu Magemagetana 'wainega, 'Anu'anununina 'akonadi i agedi i 'ive'ivaudi. A vona mogitana 'waimuye, 'ai'edi tamu aitoi kebu i na tubuve'ivau ufa wata 'Anu'anunu Magemagetana 'waidiega 'ako kebu 'ana fata i na luku Yaubada yana 'Aila'a nageneye. 7 Kebu nuamu i na vogani fai a vo, I lubwainemi 'wa na tubuve'ivau.’ 8 Kaukau taunina yana nunuga i veveimeyeni. Butu'aina ta noganogai siwe yana 'eba velamu wata yana nago kebu ta da 'asetaiga. Wata bani'odi kebu 'ada fata ta na 'asetai, 'Anu'anunu Magemagetana bani'odi i munega tomotoga i agedi i tubuve'ivau.” 9 Nikodimo i velutoli Iesu 'waineye i vo, Yamu vona 'ana 'aseta bani'odi? A bavuyeni.” 10 Iesu i vo, 'Omu me Isileli yama tove bwaikimu, awale naninidi a veveifufuyediga 'u bavuyedi? 11 A vona mogitana 'waimuye, ava'ai 'a 'isedi wata 'a 'asetadi 'a veveifufuyedi 'waimuye, siwe kebu tamu aitoi 'waimiega yama vona faifaidi i da ve'awamogitana. 12 Naninidi a veifufuyediga fwayafwayayega siwe kebu 'wa da vetumagana. We'e 'ai'edi naninidi abamayega a na veifufuyediga, mogitana 'wa na bavu-'afo'afo. 13 Kebu tamu aitoi i da laka abame wata i da vila-vaitugani i da obuma, yau a vetomotogaotoga 'aiseotogiku abamayega a obuma begaidi ma yaku 'aseta a veveifufu.
14-15 Sal 21:9Basenadiotoga sali'avu'avuye Mosese kumaea 'o'olo bani'odi welavi 'waineye i silakai bega egavo i 'isalaka 'waineye kebu i da wafaga.*Me Isileli Yaubada i vedumwe'ai'aieni bega Yaubada 'o'olo i vetunedi 'waidie, egavo i ovadi i wafa-matayo'o. Yaubada Mosese i voneni kainumu i dabia 'o'olo bani'odi i silakai bega egavo i 'isalaka 'waineye 'aivaita i veluagai. Yau wata bani'odi, i lubwaineni 'awaie yau a vetomotogaotoga tomotoga i na silakaiku, bega egavo ma yadi vetumagana taunidi i na tauyedi 'waikuye, mia 'atumaina wata miamia-vagaina i na veluagai.
Yaubada i nuakalikalieda bwaikina
16 Fai Yaubada tomia fwayafwaya matatabumi i nuakalikaliemi bwaikina, begaidi yau natuna tubu'eana i 'aniveleneku 'waimie bega egavo ma yadi vetumagana taunidi i na tauyedi 'waikuye kebu i na wafa mogitana, mia 'atumaina wata miamia-vagaina i na veluagai. 17 Yaubada kebu i da vo, Natuku a na vetunei bega yana veimea 'wainega tomia fwayafwaya vematavuloga i na veluagai.’ Kebu, i vetunekuga tomia fwayafwaya a na 'ita'ita'iemi sakona 'wainega.
18 Egavo ma yadi vetumagana taunidi i na tauyedi Yaubada Natuna 'waikuye kebu vematavuloga i na veluagai, siwe egavo i baila 'akonadi Yaubada i veimea vematavuloga i na veluagai fai kebu i da vetumagana Yaubada Natuna tubu'eaku 'waikuye. 19 Yau Yaubada Natuna kumaniku a maiga bani'odi mageta tomia fwayafwaya 'waimie, siwe tomotoga fuedi nuanuadi dudubala. Fai yadi sauluva sakoidi kebu nuanuadi mageta, begaidi vematavuloga i na veluagai Yaubada 'wainega. 20 Tomotoganidi yadi sauluva sakoidi mageta i baila, kebu nuanuadi yadi sauluva sakoidi i na sivemagesedi. 21 We'e egavo yadi sauluva tonovidi, ma yadi sosoana i na maia magetanina 'waikuye bega tomotoga fuedi i na 'isedi i na 'asetadi Yaubada yana nuanua 'ana to'idumwebika.”
Ioni Tobafitaiso i veifufu Iesu faifaina
22 Iesu i veifufu'a'ava Nikodimo 'waineye, mulieta yana tovetutuyamavo taiadi i nagoi 'awalawa Iudia. Bei sai'afo i yogomia wata yana tovetutuyamavo tomotoga fuedi i bafitaisodi Iesu yana veimea 'wainega. 23-24 Mad 14:3; Mak 6:17; Luk 3:19-20Ioni Tobafitaiso bola kebu i da luku vanuga yogona nageneye i nago 'atamana Ainoni, Selimi lilivaneye. Bei tomotoga fuedi i nunagoi 'waineye i bafitaisodi ufanina bwaikina 'waineye.
25 Tutuyanina 'waineye Ioni tobafitaiso yana tovetutuyamavo i ve'ikwayekwayega tamu tomogo Diu taiadi, yadi tafalolo 'ana sauluva 'ilekoa faifaina bega igodi i na vevunavunaga Yaubada mataneye. 26 Bega tovetutuyamanidi i nagoi Ioni i voneni i vo, Tove, 'u na nuani, tomogonina taiadi 'wa miamia Ufa Iolidani vi'ainega kumanina faifaina 'u veveifufuga, valana 'a nogai tomotoga fuedi i baibailemu i nunagoi 'waineye bafitaiso faifaina.” 27 Ioni i vonedi i vo, Yaubada abame tomotoga 'aitamogana 'aitamogana yada folova i veleda. 28 Ion 1:20'Wa na nuani basenadi a vonemi a vo, Yau kebu kumaniku Keliso, yau a na vetomata'aulelemo faifaina.’ 29 Side bani'odi. Nagi 'ana tutuye tonagi vavine i na 'ewai, we'e iana tosigeugeu kebu 'ana fata i na nuavita i na sosoanamo. Yau wata bani'odi yaku 'eba sosoana, 'ai'edi tomotoga fuedi i nunagoi Iesu 'waineye. 30 I lubwaineni Iesu 'ana wagava i na vevebwaika, we'e yau ma'itufa 'aku wagava i na vevesiai.”
Kumanina i mai abamayega
31 Yaubada Natuna kumanina i mai tabwanega, bwaikaotogina kebu tomotoga bani'odi. Egavo i tubuga fwayefwayeye tutuya fuedi i veveifufu nani fwayefwayeye faifaidi, we'e kumanina i mai abamayega tomotoga i vebwaika-'iawedi. 32 Naninidi i 'isediga wata i nogaidiga abame i lulu'ivoneyedi tomotoga 'waidie, siwe kebu fuedi i da vetumaganeni. 33 Egavo Yaubada Natuna yana vona i vetumaganeni, taunidi wata Yaubada yana vona i ve'awamogitaneni. 34 Kumanina Yaubada i vetunei 'waideye, 'Anu'anununa i agei mogitana begaidi Yaubada yana vona i lulu'ivoneyedi tomotoga 'waideye. 35 Mad 11:27; Luk 10:22Yaubada Natuna i nuakalikalieni bwaikina, nani matatabuna i 'anivelenedi 'waineye bega i veveimeyedi. 36 Egavo ma yadi vetumagana taunidi i tauyedi Yaubada Natuna 'waineye mia 'atumaina wata miamia-vagaina 'akonadi i veluagai, we'e egavo i vedumwe'ai'aieni kebu mia-vagatanina i na veluagai, Yaubada yana nuasako i na 'eno-vagata 'waidie.