1 Tutuya 'ifwaidi i 'a'avana me Isileli i nagoi Laube'u Moabe 'waineye, bei i vebae'wa Ufa Iolidani lilivaneye we'e Ieliko vi'ainega.

2 Kini Belaki, Sifo natuna, me Isileli i 'isedi yadi luvela'ova ava'ai i 'idewai me Amolaiti 'waidie. 3 Fai me Isileli 'adi 'aila'a bwaikaotogina begaidi me Moabe i kololo-'afo'afo, 'wa da vo luludi i da tubaibaia we'e mogitana nigodi i bwayuyu. 4-5 Sal 31:8; 2 Fit 2:15,16; Iud 1:11Me Moabe i veifufu me Midiani to'edakumetavo 'au'auveadi 'waidie i vo, De'e fatalanina 'ada bawe'odaga 'awaie i na 'oda'odageda.”

Begaidi me Moabe yadi kini Belaki, kumanina Sifo natuna, yana vala 'ana to'ewa i vetunedi i nago Beo natuna Belami i na voneni. Belami i miamia Fetoli, Ufa Iufiletisi lilivaneye me Amo yadi fwayefwayeye. We'e valanina side bani'odi, Belaki i vo, Tomotoga 'aila'a bwaikaotogina i le'wai Itifitayega 'awalawa matatabuna i susuli lilivakuye i miamiani. 6 Tomotoganidi i vetoketoke-'iaweku, nuanuaku 'u na mai 'u na 'ilawatagonidi. 'Omu a 'asetamu fai egavo 'u na vona-nuakalikaliediga i na ve'atumai, we'e egavo 'u na bwalasediga wata sakoina i na veluagai. 'Ai'edi 'u na 'ilawatagonidiga, voke 'aku fata a na lu'wavinedi i na souyedi yaku 'awalawayega.” 7 Nika me Moabe wata me Midiani yadi to'edakumetavo mani i 'ewai, i nago nuanuadi Belami i na tutuli bega me Isileli i na 'ilawatagonidi. Tutuyanina i le'wai, Belaki yana nuanua i veifufuyeni 'waineye.

8 Belami i vonedi i vo, Lovana 'aitamogana ta na mia, 'awa'awai ava'ai 'Auvea i na vonekuga a na lu'ivoneyeni 'waimie.” Bega to'edakumetavonidi Belami taiadi bei i 'eno. 9 Lovane Yaubada i mai Belami i velutolieni i vo, Egavo taiadi 'wa miamiani?”

10-11 Belami Yaubada i voneni i vo, Moabe yadi kini Belaki, kumanina Sifo natuna, yana vala i vetunei i mai 'waikuye i vo, Fai tomotoga fueotogidi Itifita 'wainega i souyedi i maia fwayafwaya matatabuna i luvaia, nuanuaku 'u na 'ilawatagonidi faifaiku, voke taiadi 'a na vetalaga a na sogiedi.”

12 Siwe Yaubada Belami i voneni i vo, Kebu de'e tomotoganidi taiadi 'wa na nagoga, kebu me Isileli 'u na 'ilawatagonidiga fai kumanidiavo a vevesauluva-'atumai 'waidie.”

13 Bola 'awa'awaiogose Belami i tovoi bega i veifufu vala 'ana to'ewa 'waidie i vo, 'Wa na vilami yami 'awalaweye, fai 'Auvea kebu i da tauyeku taiadi ta i nago.”

14 Nika me Moabe vala 'ana to'ewa i viladi i nagoi Kini Belaki i voneni i vo, Belami i baila, kebu taiadi 'a da maiga.”

21 'Awa'awaie Belami i tovoi yana 'aisaya doniki kwavuneye 'ana 'ivi i ta'uli, i 'a'avana me Moabe to'edakumetavo taiadi i nagoi. 22 Belami yana doniki 'waineye i dodoga, yana tofolovavo taiadi i nagoi. Siwe Yaubada i nuasako-'afo'afo fai Belami taiadi i nunago, bega 'Auvea yana anelose 'edeye i tovibodeni.

23 I nunagoi nika doniki i 'isanago, 'Auvea yana anelose i 'iseni yana kefata i silakai i tovotovoi 'edeye, doniki i toabaleni bakule. Belami doniki i nikei i vevilai 'edeye.

24 Siwe 'Auvea yana anelose i vaganago 'eda welilineye i tovoi, kalefa 'ana bakula 'adi 'ailuga 'awasasadie, bakulanidi kileuyega i kaliedi.

25 Tutuyanina doniki anelose i 'isanaweni i vagabala kali lilivaneye bega Belami 'agena kalie i vetutuyeni. Nika Belami doniki wata i nikei. 26 Siwe anelose sai'afo i vaganago maiginega 'eda weliliotogineye i tovoi bega doniki kebu 'ana fata i na keketa 'atagiega 'alo wamayega i na nago.

27 We'e tutuyanina doniki 'Auvea yana anelose i 'iseni, ma'itufa i 'etobala Belami 'agena i 'enofwaseni. Belami i nuasako-'afo'afo bega yana wautoganayega i nikei!

28 Nika 'Auvea doniki i tauyeni bega i veifufu-otoga Belami 'waineye i vo, Ava'ai tamu sakoina a 'idewai 'waimuye begaidi tutuya 'aitonu 'u nikeku?”

29 Belami i tutula doniki 'waineye i vo, Fai 'u 'waveku 'u da vo yau 'wava'wavaku. 'Ai'edi ma yaku kefataga, 'asiauotoga bei a da luvewafamu.

30 Doniki i veifufu Belami 'waineye i vo, Yau yamu 'aisaya 'aiata 'aitamogana 'aitamogana yamu yaba yau kwavukuye. We'e 'u da nuani, tamu tutuya bani'odi a 'idewai 'waimuye?” Belami i tutuli i vo, Kebu.”

31 'Auvea Belami matana i kialai i 'isanaweni anelose yana kefata i kiave'avini 'edeye i tovotovoi nika Belami i lumata'afufu fwayefwayeye.

32 Anelosenina i velutolieni i vo, Awale yamu doniki tutuya 'aitonu 'u nikei? 'U nogai! Yamu nago Belaki 'waineye, kebu faifaina a da sosoanaga begaidi a mai yamu 'eda a tovibodai.

33 Yamu doniki i 'iseku tutuya 'aitonu i sivilai 'waikuyega. 'Ai'edi kebu i da sivilaiga, 'ako mogitana a da nikemu 'u da wafa we'e doniki i da miamia.”

34 Belami anelosenina i voneni i vo, Yau a sakona, kebu a da 'asetaiga 'u tovibodeku 'edeye. 'Ai'edi kebu 'u da sosoana yaku nago faifaina, side bega a na vilaku.”

35 Bega 'Auvea yana anelose Belami i voneni i vo, 'U na nago tomotoganidi taiadi, we'e ava'ai yau a na vonemuga, kumanina 'aisena 'u na lu'ivoneyeni.” I veifufu'a'ava nika Belami i tauya Belaki yana to'edakumetavo taiadi i nagoi.