27
Same de'e Devida i kilumi.
1 'Auvea yaku mageta wata 'aku to'ita'ita'i,
kebu tamu aitoi a na kololoyeniga.
I 'i'ita'ita'ieku vita 'waidiega,
bega a vevenuafoufa'ala.
2 Tutuyanina 'aku gaviavo nuanuadi i na nikeku,
'alo i na 'ivekokoviku,
we'e tauni'avadi i na be'u i na ilagi.
3 Avinodi tovetalaga toketokedi i na 'eduku,
siwe kebu a na venuafouviga.
'Akonadi i na velamu vetalaga,
A na tovoi fa'alina 'Auvea 'waineye.
4 'Auvea a velu'uieni nani 'aitamogana i na 'idewai faifaiku.
Yaku nuanuananina bwaikaotogina,
yaku mia matatabuna 'waineye nuanuaku a na miamiana 'Auvea yana Vanuga nageneye,
Nuanuaku yana 'atumaina a na vevemata'i'i'ieni,
wata bei a na vevenua'ivina faifaina.
5 Vita 'adi tutuya 'waidie, i na givegiveku yana vanuganina nageneye,
we'e yana Vadavada Tabutabuna bei i na 'i'ita'ita'ieku.
I na giveku vatu'ai manamanawena deba'aineye kebu tamu aitoi 'ana fata i na nikeku.
6 We'e 'aku gaviavo i na 'edukuga,
siwe matatabudi a na vetoketoke-'iawedi.
Yaku 'anivelena-maimaiga a na velomuyediga a na kabunidi 'Auvea yana Vadavada Tabutabuna nageneye.
Ma yaku sosoana bonaku bwaikinega,
a na leilei wata inavayega a na subisubiai.
7 'Auvea, bonaku 'u da nogai tutuyanina a na vevelu'ui 'waimuye.
'U da 'isanuakalikalieku bega yaku velu'ui 'u da tutuli.
8 'U vona 'waikuye 'u vo, 'U mai ta na veifufu.”
Bega a vo, 'Auvea, a viwai 'waimuye.”
9 Yau yamu tofolova, kebu 'u na nuasakoyeku wata 'u na vedumwe'ubu'ubusekuga,
tutuya matatabuna 'u 'i'ivaiseku.
Yaubada, 'u 'ita'ita'ieku,
kebu 'u na bailekuga,
'alo kebu 'u na degaloveku.
10 'Ai'edi tamaku wata inaku i na degaloveku,
we'e 'omu 'Auvea, tutuya matatabuna 'u na lulu'uma'umaieku.
11 'Auvea, 'aku gaviavo i vevelubodaboda nuanuadi i na 'ive'aviniku,
begaidi 'u na veku a na vetutuyamemu,
wata 'u na 'edakumeseku 'eda tonovina 'waineamo a na nago.
12 'Aku gavianidi i lulu'ivona-vekavekali faifaiku,
nuanuadi i na 'ivekokoviku.
Kebu 'u na tauyedi 'aku 'ive'avina faifaina.
13 Siwe a 'aseta-'atumaia,
tutuyanina ma yawaikuye a na miamiaga,
'Auvea yana 'atumaina a na 'ise'iseni.
14 Begaidi ma yada vetumagana 'Auvea ta na lulukamaseni,
ma yada tokemaiga ta na tovotovoi fa'alina.
E'e, ma yada vetumagana 'Auvea ta na lulukamaseni.