34
Tamu tutuya Devida Abimeleki i kololoyeni, bega 'wava'wavadi yadi sauluvayega i vesauluva mataneye nika i veugeugeni i nago. Devida lei de'e i kilumi Yaubada bani'odiga i munega i 'ita'ita'ieni tutuyanina 'waineye.
1 Tutuya matatabuna 'Auvea a na subisubiai,
bega yana 'atumaina a na veveifufuyeni.
2 'Auvea 'ana wagava a na awa'ai'aia,
'omi tonuaobu yaku vona 'wa na nogai nika 'wa na sososoana.
3 'Wa na maia, 'Auvea ta na subiai,
bonada bwaikinega 'ana wagava ta na silakai.
4 A velu'ui 'Auvea 'waineye i nogayeku,
tomotoganidi a kololoyediga, 'waidiega i 'i'ita'ita'ieku.
5 Egavo i nunago 'Auvea 'waineye 'aivaita faifaina,
'eba sosoana bwaikina 'waidie, maigidi 'anialaaladi,
kebu i na bunumayaga.
6 Yau vita nageneye, bega a vevelu'ui 'Auvea 'waineye nika bonaku i noganogai,
wata i 'ita'ita'ieku vitanidi 'waidiega.
7 Egavo ma yadi ve'ililibu 'Auvea i kololoyeniga,
yana anelose i na veve'isabodebodedi wata i na 'i'ita'ita'iedi.
8 1 Fit 2:3Taunimi 'wa na tauyemi 'Auvea 'waineye, nika yana 'atumaina 'wa na lulutonovi wata 'wa na 'asetai.
'Wa na nagoi 'waineye 'ita'ita'i faifaina, 'ako bei 'wa na sosoana.
9 'Omi tovetumagana, ma yami ve'ililibu 'Auvea 'wa na kololoyeni,
fai egavo bani'odi i vevesauluvediga, nani matatabuna 'adi sala.
10 Tutuya 'ifwaidi 'aisaya laioni tubuvauvauna 'ani'ani i veve'ale'usa i laselase,
we'e 'Auvea 'ana tovetumaganavo kebu tamu ava'ai 'wainega i na ve'ale'usa.
11 Yaku 'aila'avo, 'wa maia 'wa na vinenegeku,
'Auvea 'ana kololo wata 'ana ve'ililibu a na vemi.
12 1 Fit 3:10-12'Ai'edi nuanuamu yamu tutuya i na vemanawega,
wata yamu mia i na ve'atumaiotoga,
13 tomotoga kebu 'u na awavesakoyedi
wata kebu 'u na vekali.
14 Sauluva sakoidi 'u na vedumwe'ubu'ubusedi we'e 'u na vesauluva-'atumai
'U na vewavawava mali tomotoga taiadi 'u na veveiana nika ma yami nuaniwalova 'wa na miamia.
15 Tomotoganidi yadi sauluva tonovidi 'Auvea i 'i'isave'avinidi,
wata bonadi i noganogaidi tutuyanina 'aivaita faifaina i na vevelu'ui.
16 We'e tosakona i vevedumwe'ubu'ubusedi,
tomotoganidi i na wafaga, kebu tamu aitoi faifaidi i na nuanua.
17 Tutuyanina yana tomotoga i tataidaida 'aivaita faifaina, bonadi i noganogaidi.
'Adi vita 'waidiega i 'i'ita'ita'iedi.
18 Egavogi nuadi i tataidabediga 'Auvea lilivaotogidie i miamia.
'Adi vita bwaikidi 'waidiega i 'i'ivaisedi nika vitanidi i 'a'ava.
19 Tomotoganina yana sauluva tonovina vita fuedi i na veveluagadi,
siwe 'Auvea tutuya matatabuna i 'i'ivaiseni wata i 'i'ita'ita'ieni.
20 Ion 19:36Tomogonina i 'i'ibababaleni,
bega kebu tamu luluna i na tubaia.
21 Tomotoganidi yadi vesauluva-sako 'waidiega taunidi i na 'i'ivekokovidi,
tomotoganidi yadi sauluva tonovidi 'adi tovedumwe'ai'aivo vematavuloga i na veluagai.
22 We'e 'Auvea yana tofolovavo i na tuveobudi,
Tomotoganidi i nunagoi 'waineye 'ita'ita'i faifaina, kebu vematavuloga i na veluagai.