51
Tamu tutuya 'waineye Devida Ulaia yana vavine Bedisiba taiadi i sakona, Yaubada yana tolu'ivona 'ana wagava Neitani i tolimatani. Devida i bunumayaga sauluvanina faifaina nika yana velu'ui de'e i kilumi Yaubada 'waineye.
1 Yaubada, yamu nuakalikali 'eno'eno-vagaina,
bega kebu 'u na veimea 'aku vematavuloga faifaina.
'Omu To'isanuakalikali mogitana,
bega yaku sakona 'u da 'u'umi.
2 'U da lekoaku sakona 'waidiega,
wata 'u da 'ivevunavunagiku.
3 Yaku sakona tauniku a 'asetadi,
tutuya matatabuna faifaidi a vevenua'ivina.
4 Lom 3:4'Omu 'aiseotogimu 'waimuye a sakona,
yaku sauluva sakoidi mogitana a 'idewadi matamuye.
Tutuyanina 'u vo, 'Omu 'u sakona,” mogitana, kebu 'u da vekaliga.
'Ai'edi 'u na vematavulogikuga, de'e 'eda tonovina 'u 'i'idewai.
5 Yaku tubuga 'wainega i maiga 'asiau, yau mogitana tosakona,
bola natuvalulu nageneye, yaku sauluvanina 'asa'aiana bani'odi.
6 Bega nuanuamu yaku nuanua 'waineye sauluva matatabuna tonovidi,
wata nuamageta 'u veveku.
7 'U da lekoaku sakona 'wainega bega a na vevunavunaga
nika a na ve'ivau.
8 Nuanuaku 'u na voneku yaku sakona 'u nuatavunidi bega a na sosoana.
Basenadi 'u siobuyeku wata veviga 'u veleku.
Tutuya de'e 'waineye wata yaku sosoana 'u da vevilai basenadi bani'odi.
9 Yaku sauluva sakoidi kebu 'u na ve'ise'isediga,
Matatabuna 'u na 'ewayavuledi.
10 Yaubada, nuanuaku yaku nuanua matatabuna 'u da 'ivevunavunagi,
'anu'anunuku 'u da luve'ivauya bega kebu a na bailemu.
11 Kebu 'u na veugeugekuga.
'Anu'anunumu Magemagetana 'waikuyega kebu 'u na 'ewai.
12 Tutuyanina 'u 'ita'ita'ieku 'a sosoana, sosoananina 'u da luve'ivauya.
Nuanuaku 'u na 'ivaiseku bega yamu vona a na ve'ililibuyeni.
13 Bega yamu awave'eda'eda 'wainega, a na veve 'amu tovedumwe'ai'ai 'waidie
nika i na viladi 'waimuye.
14 Yaubada, 'omu To'ita'ita'i. Yau nimaku dayadayagina 'u da nuatavuniku,
nika ma yaku sosoana a na lei yamu sauluva tonovidi faifaidi.
15 'Auvea, 'u da 'ivaiseku bega a na veifufu,
nika 'aku sala a na subisubiamu.
16 Yaku sakonanina faifaina 'aisaya a da 'aniveleneni 'waimuye, siwe 'ako 'u da baila.
'Aisayanina yaku velomu a da kabuni, siwe faifaina kebu 'u da sosoanaga.
17 Yaubada, velomunina nuanuamu 'asa'aiana tauniku a na nuaobu-'afo'afo.
'Ai'edi ma yaku nuaobu a na nuavilakuga, kebu 'u na bailekuga.