67
Lei vekaiwa.
1 Yaubada, 'u da 'isanuakalikaliema wata 'u da vevesauluva 'atumaina 'waimeye,
wata ma yamu nuakalikali maigimu i da 'anialaalai 'waimeye.
2 Tomia fwayafwaya matatabuna yamu 'eda'eda i na 'asetadi,
tomotoganidi i na 'asetamu 'omu toketokeotogimu 'amu fata 'u na 'i'ita'ita'iedi.
3 Yaubada, tomotoga 'adi 'aila'a tulina tulina i lubwainedi i na subisubiamu,
matatabudi i da subisubiamu.
4 Tomia fwayafwaya i da leilei ma yadi sosoana,
fai 'adi 'aila'a tulina tulina 'u veveimeyedi yamu 'eda'eda tonovidi 'waidiega,
wata 'u 'e'edakumesedi.
5 Yaubada, i lubwaineni tomotoga 'adi 'aila'a tulina tulina i da subisubiamu.
Vona mogitana matatabudi i da subisubiamu.
6 Ta na subisubiaiga, nika fwayafwaya vuagina 'atumaina ta na veveluagai,
Yaubadanina taunina 'ida yada Yaubada, i na vevesauluva 'atumaina 'waideye.
7 Mogitana, Yaubada i na vevesauluva 'atumaina 'waideye,
fwayafwaya tabwaneye ta miamianiga matatabuda ta na ve'ililibuyeni wata ta na kololoyeni.