103
Same de'e Devida i kilumi.
1 Yau kumaniku 'Auvea a na subisubiai
yaku nuanua matatabuna 'wainega 'ana wagava tabutabuna a na subisubiai.
2 E'e, yau kumaniku a na subisubiai.
Nani matatabuna 'atumaidi i 'i'idewadi faifaiku kebu a na venuafanidi.
3 Yaku sakona i nunuatavunidi,
we'e 'aku viga matatabuna 'waidiega i 'i'ive'atumaiku.
4 I 'i'ita'ita'ieku wafa 'wainega,
yana nuakalikali wata yana nuatavuna i 'e'etokwaudi 'waikuye.
5 I vevesauluva 'atumaina 'waikuye nika ma yaku kamoai.
Kaukau i toke bwaibwai i lulubeweni,
wata yau bani'odi 'Auvea i tutunulakaiku wata kiavetoketokeku 'wa da vo a da vetubuau-vaitugana.
6 'Auvea yana sauluva matatabuna tonovidi tomotoga yadi mia vitana 'waidie.
We'e egavo vitanidi 'adi to'anivelena i na vonayavuga 'Auvea mataneye.
7 Yana nuanua i sivemageseni Mosese 'waineye,
we'e me Isileli yana folova toketokedi i vedi.
kebu i da nuasako-matayo'oga,
we'e yana nuakalikali kebu i na 'a'avaga, i na 'eno-vagata 'waideye.
9 Kebu i na vevita-vebogiedaga
'alo yana nuasako i na 'e'eno-vagata 'waideye.
10 I lubwaineda vematavuloga ta da veluagadi yada sakona faifaidi,
siwe i vevesauluva 'atumaina 'waideye, yada sakonanidi kebu i da tututulidiga.
11 Fwayafwayayega i na nago abame 'ana vemanawe 'etowava-wayoga,
wata bani'odi yana nuakalikali miamia-vagaina 'etowava-wayoga 'ana tove'ililibu 'waidie.
12 Inala lakavinega i na nagoga yana 'eba inivayega 'ana vemanawe 'etowava-wayoga,
wata bani'odi Yaubada yama sakona i 'e'ewayavuledi 'waimega, 'ana vemanawe 'etowava-wayoga.
13 Tama natunavo i 'i'isanuakalikaliedi,
wata bani'odi, egavo ma yadi ve'ililibu 'Auvea i kolokololoyeniga, i 'i'isanuakalikaliedi.
14 I 'asetada 'ida mweada,
'wa da vo 'ida 'aufofo'uala bani'odi.
15 Yada mia fwayefwayeye tutuya 'ale'usana, bani'odi mosomoso 'alo 'e'enaia idina,
inala i na luyauyauta i na 'awagi'ai.
16 Kaukau i na nunuga i yayagifelefeledi,
kebu tamu aitoi i na 'ise'isediga.
17 We'e 'Auvea yana nuakalikali i 'e'eno-vagata 'ana tove'ililibuvo 'waidie,
yana 'ita'ita'i i vaganagoga natudiavo wata tubudiavo 'waidie,
18 Kumanidiavo yana veakutagona i veve'ililibuyeni,
wata yana veimea i vevematayakeyakedi.
19 'Auvea 'ana didiga 'ai'aiwabuna i 'idewai abame,
'wainega nani matatabuna i veveimeyedi.
20 'Omi anelose toketokemi,
'Auvea yana veimea 'adi tonogaya,
yana nuanua 'wa 'i'idewadi.
I lubwainemi 'wa na subisubiai.
21 E'e, 'omi abama 'ana tolugaviavo fueotogimi
'Auvea 'wa na subisubiai,
kumanimiavo faifaina 'wa folofolova wata yana nuanua 'wa 'i'idewadi.
22 Nani matatabuna i 'idewadiga i miamiani yana 'eba veimea nageneye, 'wa na subiai.
Yau kumaniku 'Auvea a na subisubiai.