139
Same de'e Devida i kilumi.
1 'Auvea, yaku nuanua 'u lualeni,
bega 'u 'aseta-'atumaiku.
2 Yaku miabui wata yaku tovoi 'u 'asetadi.
Avinodi 'omu 'ani'ie, siwe yaku nuanua matatabuna 'u 'asetadi.
3 'Omu 'u 'ise'iseku yaku yaba 'waidie,
wata 'u 'asetaku yaku vanuge a veveawai.
Yaku sauluva matatabuna 'u 'aseta'a'avadi.
4 'Auvea, mulieta ava'ai a na voneyediga,
siwe 'omu nagamidiotoga 'u 'asetadi.
5 'U kumekumeta wata 'u vevemuli 'wainega 'u tovibabaleku,
yamu toketokena 'wainega 'u 'i'ita'ita'ieku.
6 'Aku nuanua 'waimuye bwaikina,
kebu 'aku fata a na 'aseta-'a'avaiga.
7 Kebu 'aku fata a na giva 'Anu'anunumu 'wainega
'alo 'waimuyega a na dega.
8 'Ai'edi a na laka abame, 'omu bei 'u miamia.
'Ai'edi a na nago towafa yadi 'eba mia 'waineye, 'omu wata bei 'u miamia.
9 'Ai'edi a na yavega a na nago inala yana 'eba lakayega,
'alo a na nago malaveta vi'ainega bei a na mia,
10 wata sinobei 'awalawanidi 'waidie nimamuyega 'u na 'e'edakumeseku,
we'e yamu toketokenayega 'u na veve'isabodebodeku.
11 'Ako dudubala a da velu'uieni bega i da giveku,
'alo mageta i luvivilekuga i da lovani,
12 siwe kebu 'aku fata a na giva 'waimuyega dudubalanina nageneye.
We'e lovana 'waimuye mageta 'eno-vedavedamanina.
Dudubala wata mageta i vesala 'omu 'waimuye.
13 Du'uku 'aitamogana 'aitamogana 'u 'idewadi,
wata 'u luvetubamidi inaku umwadie.
14 'U 'idewadewakuga 'eba nuavogana wata 'eba nua'ewa, faifaina a vekaiwa 'waimuye.
Yamu folovanidi 'atumaiotogidi a 'aseta'a'avadi.
15 Tutuyanina luluku 'u luveakoakovidiga, 'awasasa givagivana nageneye 'u 'ise'iseku.
Bei dudubala nageneye a vevebwaika inaku natuvaluludie.
16 'U 'ise'iseku mulieta a tubuga,
yaku mia 'aiata 'aitamogana 'aitamogana faifaidi yamu buki nageneye 'u kilumidi.
'Aiatanidi 'u velekuga 'omu 'u venua'ivina-vagasedi,
mulieta 'aiata kumekumetana i velamu.
17 Yaubada, 'aku nuanua 'waimuye bwaikina wata 'eba nuavogana,
kebu 'aku sala a na 'asetadi fai fueotogidi.
18 Fai fueotogidi kebu 'aku sala a na lu'iawawadi,
bani'odi wala'ai 'ana 'ilukulukuta lu'iawawa-wayoga.
'Ai'edi yaku mia miamia-vagainaga 'omu bani'odi,
'aku sala a da lu'iawawa'a'avadi.*Vona Ibeliu tamu 'ana saivila, 'Enoyega a tovotovoi, Yaubada 'omu bola lilivakuye.
19 Yaubada, nuanuaku bwaikaotogina tosakona 'u da luvela'ovidi.
We'e 'omi tosakona, nimami dayadayagidi, 'wa na dega 'waikuyega.
20 Mogitana Yaubada, tomotoganidi tutuya fuedi i awavesakoyemu,
'amu gavianidi i yagayagaimu.
21 'Auvea, tomotoganidi i vedumwe'ai'aiemuga, yau wata bani'odi a vedumwe'ai'aiedi,
egavo i bailemuga, yau wata a bailaotogedi.
22 E'e, faifaidi kamoku i ogala,
taunidi 'aku gaviavo.
23 Yaubada, nuanuaku yaku nuanua matatabuna 'u na 'isa'a'avadi,
'u da sitonoviku bega 'u na 'aseta-'atumaiku.
24 'Ai'edi a na nunago tosakona yadi 'edeamo 'u na voneku.
We'e mia-vagata 'ana 'edeamo 'u na 'e'edakumeseku.