11
Amɨn kɨnda Piŋkop do nandaŋ gadat tebaisi agɨt
Dewit dakon kap kɨnda. Kap on kap yoŋ dakon kɨla amɨn do mandabi.
1-2 Nak aŋkutnosak do Yawekon kɨsat.
Do gak nido yaŋ nayɨsal, “Amɨn yokwi obipni paŋɨlɨkgaŋ!
Pɨlɨn tukgwan amɨn kɨlegɨ yam do dɨkdɨkni bɨsapmon sambaŋ!
Do mɨnam kɨnda da yaŋ pasalek kabapgwan wɨgɨ!
3 Aŋpak kɨlegɨ dakon teban tokni kɨsi tuwɨl kɨ mudoni kaŋ, amɨn kɨlegɨ niaŋ ani?”
4 Mani Yawe telagɨ yutnikon egɨsak.
Kwen Kokup kɨla amɨn madep egek dabɨlɨ da amɨn morap kɨsi pɨndakdak.
Yo morap aŋ uŋun kɨsisi nandaŋ mudosok.
5 Yawe da amɨn kɨlegɨ ae amɨn yokwi kakgɨmansi kokwin asak.
Emat do galak toŋ amɨn dɨmasi galak taŋ yomɨsak.
6 Amɨn yokwi do kɨndap tepmɨsi sosok uŋun tagal yomɨsak.
Aŋek gɨptɨmni obɨsi soŋ yomni do mɨrɨm tepmɨsi sosok uŋun yɨpban abɨsak.
Uŋun yokwi awit dakon kobogɨni.
7 Yawe aŋpak kɨlegɨ gɨn asak.
Aŋpak kɨlegɨ aŋ amɨn do but dasi galak taŋ yomɨsak.
Aŋpak kɨlegɨ aŋ amɨn uŋun da tomno dabɨlni kokdaŋ.