30
Amɨn kɨnda da Piŋkop ya yaŋ iyɨk do bɨsit agɨt
Dewit dakon kap kɨnda. Kap on telagɨ yut yoma wɨtdal do yawit.
Yawe, gak da nak yokwi da kɨsiron naŋ abɨdagɨl.
Yum pɨndagaki uwalno da abɨŋ nepmaŋek kɨsɨk kɨsɨk dɨma awit.
Yaŋ agɨl do mango yaŋ aŋkɨsisat.
Yawe Piŋkopno, aŋpulugoki do bɨsit gayɨko aŋpulugaŋbɨ kɨlek tagɨm.
Yawe, kɨmot do aŋapbo abɨ pɨdagɨm.
Kɨmakbi tamogwan pɨgɨk do aŋapbo egɨp egɨpno aego namgul.
Yawe dakon mɨŋat amɨn kabɨni, Yawe aŋkɨsini.
Mani telagɨ aŋkɨsini.
Bɨsap pɨsɨpmɨsok butjap nandɨsak.
Mani mɨktɨmon ekwamaŋ bɨsap morap nin do tagɨsi nandaŋek yo tagɨsi aŋnimɨsak.
Dabɨl pakbigo kalbi tagɨ moni, mani wɨsa dagokdo kɨsɨk kɨsɨk aego akdɨsal.
Kalɨp nak tagɨsi egek yaŋ yagɨm, “Yo kɨnda da arɨpmɨ dɨma aban yokwi tokeŋ.”
Yawe, gak nak do tagɨsi nandaŋek aŋpulugagɨl bɨsapmon ɨleŋ kɨnda da yaŋ tebaisi akgɨm.
Mani manji namgul bɨsapmon uŋudon yokwi tagɨm.
Yawe nak gak do yaŋ tɨdagɨm.
Bupmɨ nandɨsak do Amɨn Tagɨ bɨsit tebaisi aŋek yaŋ iyɨgɨm,
“Nak kɨmakbi tamogwan pɨgɨkeŋ kaŋ, ni yo tagɨ kɨnda da noman tosak?
Amɨn kɨmakbi da mango tagɨ aŋkɨsini?
Gak da toktogɨ ninon yo tagɨsi asal dakon gen uŋun da tagɨ yaŋ teŋteŋoni?
Arɨpmɨ dɨma.
10 Nandaŋ namɨŋek nak do bupmɨ nandaki.
Yawe, nak aŋpulugoki.”
11 Gak da butno jɨgɨsi tagɨt uŋun aŋtagap abɨ kɨsɨk kɨsɨk kap asat.
Ae but yokwi nandagɨm uŋun aŋyawot abɨ but kwaktok nandɨsat.
12 Yaŋ agɨl, do gen mapmɨt arɨpmɨ dɨma abeŋ. Mango aŋkɨsikeŋ.
Yawe Piŋkopno, dagok dagogɨ mɨni ya yaŋ gayɨkeŋ.