59
Amɨn kɨnda uwal da dɨma aŋupbal ani do bɨsit agɨt
Dewit dakon kap kɨnda. On kap do “Miktam” yaŋ yoŋ. Sol da Dewit abɨdaŋek aŋakba kɨmotjak do amɨn yabekba yutnikon kɨwit bɨsapmon Dewit da kap on mandagɨt. Kap yoŋ amɨn dakon kɨla amɨn da mɨŋat amɨnyo yoyɨŋban “Dɨma paŋtasɨk ani” uŋun tegon da yoni. 1SA 19.11
1 Piŋkopno, uwalno da kɨsiron baŋ nak abɨdoki.
Kɨlano aŋaki dɨma aŋupbal ani.
2 Amɨn yokwi da kɨsiron naŋ gwayeki, aŋek amɨn nɨkba kɨmotdɨsat da kɨsiron baŋ nak abɨdoki.
3 Pɨndakgi. Nɨkba kɨmokgeŋ do yubɨŋ ekwaŋ.
Yawe, yokwi kɨnda dɨma agɨm, mani amɨn yokwi emat agak amɨn uŋun nɨt do muwukgaŋ.
4 Yawe, suŋ kɨnda dɨma agɨm, mani tepmɨsi nak gat emat wam do tagap taŋ.
Jɨgɨno do kaŋek abɨŋ aŋpuluga!
5 Piŋkop Yawe, Tapmɨm Ami, tepmɨsi abɨŋek nak aŋpulugoki.
Gak Israel amɨn dakon Piŋkop, tepmɨsi abɨŋ amɨn kabɨ morap egɨ aŋaŋ kwaŋ tepmɨ pi yobi.
Uŋun jamba but amɨnsi, do bupmɨ dɨma nandaŋ yobi.
6 Pɨlɨn kaga abɨŋek kokup pap da kosiron agek pɨŋan da yaŋ nɨmɨ yoŋ.
7 Nandaki, gen kaganikon da gen yokwisi da moŋ.
Uŋun emat agak sɨba geni tepmɨsi yombem.
Mani yaŋ yoŋ, “Namɨn da nandaŋ nimjak?”
8 Mani Yawe, gak da jɨkgo yokwisi yanjaŋ yomɨsal.
Gak da uŋun mɨŋat amɨn morap kabɨ kɨsi do yaŋsul aŋ yomɨsal.
9 Gak dagɨn nak aŋteban aŋek kɨlano asal.
Piŋkop, gak dam tebano arɨpmɨ dɨma tuwɨlɨ egɨsal.
10 Piŋkopno da but dasi galak taŋ namɨsak, ae uŋun da abɨŋ aŋpulugokdɨsak.
Piŋkop da nak yum nandaŋek nepban pɨndagapbo uwalno pabɨŋ yopdɨsak.
11 Amɨn Tagɨ, dɨma dapbɨ kɨmotni.
Mɨŋat amɨno da tapmɨmgo madep do dɨ ɨŋtaŋbam.
Gak pasɨknin tebaisi, gaga da tapmɨmon uwal yolbɨ kɨŋakwa paŋupbal aki.
12 Toktogɨsi yokwi ak dogɨn yoŋ.
Iyɨ do nandaba wɨkwaŋ do yum pɨndagaki iyɨ da paron yokwalni.
Jobɨt tɨmɨtdo dakon gen ae top gen gat kɨsi yoŋ.
13 Do gak da butjap nandaŋ yomɨŋek dapbɨ kɨmotni kaŋ tagɨsi.
Amɨn yokwi uŋun dapbɨ pasɨlni.
Yaŋ aŋaki mɨŋat amɨnyo da gak do Piŋkop, ae Israel amɨn dakon kɨla amɨn madep, ae dukwan dukwan kɨsi dakon kɨla amɨn madep egɨsal yaŋ nandaŋ gamni.
14 Pɨlɨn kaga abɨŋek kokup pap da kosiron agek pɨŋan da yaŋ nɨmɨ yoŋ.
15 Jap wusɨŋ pɨndak nok do kɨŋ ap aŋ.
Ae burɨ dɨma tugoni kaŋ, nɨmɨ yoŋ.
16 Mani, nak tapmɨm madepgo do kap yokeŋ.
Wɨsa dagokdo but dasi galak taŋ namɨsal, uŋun do nandaŋek kap yokeŋ.
Nido, kalɨp jɨgɨ mibɨlɨ mibɨlɨ noman taŋ namgwit bɨsapmon tagɨsi aŋkutnagɨl, aŋek dam tebano arɨpmɨ dɨma tuwɨlɨ egɨpgul.
17 Piŋkop, gak kaloŋgɨn teban tokno.
Gak dakon man awɨgɨk do kap yokdɨsat.
Piŋkop, toktogɨsi but dasi galak taŋ namɨsal, ae dam tebano arɨpmɨ dɨma tuwɨlɨ egɨsal.