87
Jerusalem do kɨsɨk kɨsɨk awit
Kora amɨn kabɨ dakon kap kɨnda. Kap on Piŋkop gawak ɨmɨm dakon kap.
1 Piŋkop da kokup papni telagɨ kabapmon agɨt.
2 Yawe da Israel mɨktɨm dakon kokup morap do galak tosok, mani Jerusalem do madepsi but dasi galak tosok.
3 Piŋkop dakon kokup pap dakon mɨŋat amɨnyo, ji nandani, Piŋkop da yo tɨlɨmɨ toŋ tagɨsi jikon asak.
4 Piŋkop da yaŋ yosok, “Namɨn amɨn da nak dakon gen guramɨkdak, uŋun manjɨkeŋ bɨsapmon, Isip ae Babilon kɨsi manjɨkeŋ.
Aŋek Pilistia, Tair ae Itopia do yaŋ yokdɨsat, ‘Uŋun yo kɨsi Jerusalem amɨn gɨn.’
5 “Nak Jerusalem do yaŋ yokdɨsat, ‘Uŋun mɨŋat amɨn morap kɨsi dakon kokup pap.’ ”
Ae Piŋkop Wukwisi da Jerusalem aŋpulugaŋban tebaisi tokdɨsak.
6 Yawe da amɨn dɨwarɨ dakon man mandakdɨsak.
Aŋek paŋmuwugek Jerusalem mɨŋat amɨnyo gat kɨsi manjɨkdɨsak.
7 Aŋakwan mɨŋat amɨnyo uŋun kap yaŋek kɨsɨk kɨsɨk aŋek yaŋ yokdaŋ, “Jerusalem, gak yo tagɨsi morap ninon toŋ uŋun dakon mibɨlɨsi.”