7
Tiyarafenu Vei Vanasirá Ma Yafíbintin Ma Uman Mano Vetin Amaniná Ída Afoká Inain Baya Ino
1 *Yer 49:36; Dan 7:2Máan turá onékun kamí kamí enisori ano ma varai kamí kamí akhen ma vaintá mantakhen mai enisori kayo ano varará ída uvaen orino van kamí kamí uva fákakharen mino. Pákakhan mai uva ano ída uvaen oren barará ma vain daa anara safi inká un nompin nafi mo kayaen mino. 2 Máan tukhá onékun áau e uní páké mana enisori ano Aunan ma vain Tiyarafenu ina ma fúkimpó damparen damuan ákona ukhein ana fákaaren eren mino. Eriyáken mai ma kamí kamí enisori ma ma vara namuin ákona amikhein kéká oovararen máa sen tiamen mino. 3 *Isi 9:4, 6; Rev 9:4“Ída vá bara fi un non nafi inká daa ana ma vain maman namu ukhesirá Tiyarafenui yoran nanin banta ayafentá beni aní daná damparé tiféku vá ono.”
4 *Rev 14:1, 3Máa sirá inékun Tiyarafenui aní daná ma yampakharé ein mai Isareri kéká pinte mana antareti ifo foti fo sauseni (144,000) nanin bantan aní ukharen mino.
5 Yutan anan pinte maen tiyan míkan mifo sirantan kan orun kádan tauseni (12,000) ino.
Rubenin anan pinte maen tiyan míkan mifo sirantan kan orun kádan tauseni (12,000) ino.
Katin anan pinte maen tiyan míkan mifo sirantan kan orun kádan tauseni (12,000) ino.
6 Asani anan pinte maen tiyan míkan mifo sirantan kan orun kádan tauseni (12,000) ino.
Naptarini anan pinte maen tiyan míkan mifo sirantan kan orun kádan tauseni (12,000) ino.
Manasenin anan pinte maen tiyan míkan mifo sirantan kan orun kádan tauseni (12,000) ino.
7 Simionini anan pinte maen tiyan míkan mifo sirantan kan orun kádan tauseni (12,000) ino.
Rivaini anan pinte maen tiyan míkan mifo sirantan kan orun kádan tauseni (12,000) ino.
Isakani anan pinte maen tiyan míkan mifo sirantan kan orun kádan tauseni (12,000) ino.
8 Yeburunini anan pinte maen tiyan míkan mifo sirantan kan orun kádan tauseni (12,000) ino.
Yosepini anan pinte maen tiyan míkan mifo sirantan kan orun kádan tauseni (12,000) ino.
Bensamenini anan pinte maen tiyan míkan mifo sirantan kan orun kádan tauseni (12,000) ino. Mai máa anan nanin bantafin mi Tiyarafenui aní daná ayafentá kaúken mino.
Kokhon Nanin Banta Ano Ma Sipisipi Arará Aví Ma Yaní Iyain Baya Ino
9 Máan turá mo onékun ída yankaforen nanin banta ma minó akhempá báken ara ara vaya siyain kayo ma minó barafin bain má minó anan nanin banta vá ano Sipisipi Arará ma kin karáká kumantein aufá mantakharen mino. Mai nanin banta ano efanten buí daná ana uriyan kefo ana fákarú ukharen mino. 10 *Rev 5:6-7Mai nanin banta ano avádóden oovararen máa siyaremí,
“Banta ma evaránen aviran mai setisi Tiyarafenu
ma kin karáká kumantein má
inká Sipisipi Arará bá ina ino.”
11 Minó enisori kayo ano kin kará bá tuenti-fo (24) ánon enisori kayo vá inká mai ma kamí kamí tafúnaren daná kayo vá maman aúban kaúden manten eúkukhen mai enisori kayo ano kin kará aufá ánon bara finí uren matimen Tiyarafenun aví daní iyáken 12 *Rev 5:12máa semí,
“Pura ino.
Aví daní in avúavá bá kakhan má
kama ineine vá tusu siantan má béin kákan bí amin má
moékan ákona vá
mai setisi Tiyarafenu inan bantin ayun para van oriyan banten mino.
Mai fura ino.”
Tiyarafenu Ano Ma Sipisipi Ararái Narefó Ma Uman Pinté Ódein Kayoi Auí Daná Ma Sesé Uantein Baya Ino
13 Máa siyákan mana ánon enisori ano séin inaen temí, “Ma ma efanten buí daná uren bain kayo mai inté ukhein kéka sá báken ná inte fákesá e van nafino.”
14 *Dan 12:1; Mat 24:21Máa síká béin tiaméú, “Kákan banta oe, éi anan afová ukha ono,” sékun béi semí, “Mai ma kákan uman pinté e unen erein kékái váken Sipisipi Ararái narefó betíi auí daná tesé uran mi maman efanten ukhen mino. 15 Máan tukhein nan mi mai kayo anon Tiyarafenui kin kará aufá báken beni monó namumpin inuran má bayan má dorarí iyan mino. Máan tiyain mai ma kin karáká kumantein mano vei kákan davaráefó betin dáantáden dafisinten mino.
16 *Ais 49:10Mai kayo ída uron mi enádá arafan puren
inká non nan aien inten mino.
Mai ma kákan aá ma akhiyan imúkan ariyan noré ein mi
yáantanten mino.
17 *Íbo 23:2; Ais 25:8; Rev 21:4Mai fara vara seyo, Sipisipi Arará ma kin kará aufá mantakhein mano sipisipirá dafisin bantaí uven aunan amin non baípá aviren orintin mai non niyantin Tiyarafenu ano vetíi ánu ma auu fenté eriyá ein minó do arúantanten mino.”