1 Ilig 4.35Ho꞉len a꞉namio꞉ Gode amilo꞉ tilidabu kaluwo꞉ modo꞉ fa꞉la꞉dowo꞉ ko꞉lo꞉, i us a꞉namio꞉ Gilig tolo꞉ sa꞉lan kaluwa꞉yo꞉, Alam tolo꞉ sa꞉lan kalumo꞉wo꞉ a꞉la꞉sio꞉, “Giliyo꞉ ma꞉no꞉ sagakiyo꞉, ka꞉isale sa꞉ba꞉lo꞉ nilido꞉ a꞉lab a꞉no꞉ mo꞉mia꞉sen” a꞉la꞉sa꞉laki, iyo꞉ towa꞉yo꞉ kego꞉. 2 A꞉la꞉fo꞉ko꞉lo꞉ iliga꞉felo꞉ kalu kugula꞉fo꞉ a꞉ma꞉yo꞉, tilidabu kaluwo꞉ tambo ho꞉le kegea꞉sa꞉ga꞉, imo꞉wo꞉ a꞉la꞉sio꞉, “Nio꞉ nanog diakiyo꞉, Godeya꞉ to walama꞉no꞉wo꞉ ka ta꞉taki, ma꞉no꞉ sagama꞉no꞉ dowalega mogago꞉ doma꞉ib. 3 A꞉la꞉fo꞉ko꞉lo꞉ giliyo꞉ kalu dom a꞉la꞉fo꞉wo꞉ da꞉fea꞉sa꞉ga꞉, niliyo꞉ nanog we imo꞉ dima꞉ki dimia꞉no꞉. Kalu gililo꞉ da꞉feab a꞉no꞉, iyo꞉ asulo꞉wo꞉ alan, Godeya꞉ Mamalo꞉ wa꞉lifo꞉ a꞉lab a꞉no꞉ ko꞉lo꞉ da꞉fea꞉bi. 4 Giliyo꞉ ko꞉lo꞉ a꞉la꞉dimidalikiyo꞉, ho꞉leno꞉ tambowo꞉ niliyo꞉ Godemo꞉ dulugu sa꞉la꞉liki, ene towo꞉ ko꞉lo꞉ walasa꞉la꞉li mesa꞉no꞉.” 5 Iliyo꞉ a꞉la꞉sa꞉labiki, tilidabu kaluka꞉isale iliyo꞉ to sa꞉lab a꞉no꞉ da꞉da꞉sa꞉ga꞉ tambo sagalaki, iliyo꞉ kalu nolo꞉ da꞉feyo꞉. Da꞉feyo꞉ kaluwo꞉ nowo꞉ Sitifen. E tilidabuwo꞉ alan a꞉la꞉ta꞉ga꞉ Godeya꞉ Mamayo꞉ e amio꞉ wa꞉lifo꞉. Da꞉feyo꞉ kalu nowo꞉ we, Filib, Bolokolus, Nikanol, Timon, Bamenas, a꞉la꞉ta꞉ga꞉ nowo꞉ Nikolas, e Antio꞉g amisa꞉n kalu ko꞉lo꞉ e tamin amio꞉ Yu kaluwa꞉lo꞉ tilidabu a꞉no꞉ elo꞉ kudu ane. 6 Tilidabu kalu iyo꞉ doma꞉la꞉fo꞉ a꞉no꞉ da꞉fea꞉sa꞉ga꞉, iliga꞉felo꞉ kalulo꞉wa tililia꞉ mio꞉ ko꞉lo꞉, iliga꞉felo꞉ kalu ili dagiyo꞉ ili misa꞉ wa꞉la dia꞉fo꞉liki, Godemo꞉ dulugu sio꞉. 7 Ilig 2.41,16.5A꞉la꞉fo꞉ko꞉lo꞉ Godeya꞉ towo꞉ da꞉da꞉i ha꞉nakiyo꞉, Ya꞉lusalem amisa꞉n amio꞉ tilidabu kaluka꞉isaleyo꞉ modo꞉ ko꞉lo꞉ fa꞉la꞉dowo꞉. A꞉la꞉ta꞉ga꞉ Godemo꞉lo꞉ bobalo꞉ so꞉mea꞉sen kalu nolo꞉lo꞉ modo꞉ tilidabu.

8 Gode eyo꞉ Sitifeno꞉ asuwa꞉taki, halaido꞉wo꞉ emo꞉wo꞉ dimi ko꞉lo꞉, Sitifen eyo꞉ kaluka꞉isale siwa꞉l amio꞉ molo ha꞉na꞉no꞉wo꞉ ko꞉li ko꞉lilo꞉ dimido꞉. 9 Ko꞉sega Yu kalu nolba꞉yo꞉ e o꞉lia꞉yo꞉ towa꞉yo꞉ kego꞉. Kalu i a꞉ma꞉ tolo꞉ wida꞉sen a wiyo꞉ we “Ga꞉lilo꞉ ha꞉na꞉sen kaluwa꞉ a” a꞉la꞉sa꞉la꞉sen. Kalu i a꞉no꞉ nolo꞉ Sailini amisa꞉n o꞉lia꞉ Alegsandia amisa꞉na a꞉la꞉ta꞉ga꞉ mio꞉. A꞉la꞉ta꞉ga꞉ nolo꞉, Silisia hen o꞉lia꞉ A꞉sia hena a꞉la꞉ta꞉ga꞉ mio꞉ ko꞉lo꞉ iyo꞉ Sitifen o꞉lia꞉yo꞉ towa꞉yo꞉ kego꞉. 10 Luk 21.15Ko꞉sega Godeya꞉ Mamaya꞉yo꞉ Sitifen emo꞉wo꞉ asulo꞉ nafayo꞉ dimia꞉len ko꞉lo꞉, kalu i e o꞉lia꞉lo꞉ towa꞉lo꞉ kegab a꞉no꞉ mo꞉tiniaki, iyo꞉ wana dowo꞉. 11 A꞉la꞉gabiki, iliyo꞉ towo꞉ wo꞉no꞉le sa꞉la꞉li sia꞉likiyo꞉, “Sitifen eyo꞉ Gode o꞉lia꞉ Mo꞉sa꞉s o꞉lia꞉mo꞉wo꞉ dio꞉ge sa꞉lab a꞉la꞉bo꞉ niyo꞉ dabulo꞉boka꞉” a꞉la꞉bo꞉ kalu nolbo꞉wo꞉ sama꞉ki, salifela꞉i ane. 12 Iliyo꞉ kaluka꞉isale o꞉lia꞉ ko꞉go꞉do꞉ kalu o꞉lia꞉ elelo꞉ wida꞉sen kalu o꞉lia꞉ma꞉ asulo꞉wo꞉ digidalifela꞉liki ane ko꞉lo꞉, iliyo꞉ Sitifen e ta꞉lia꞉sa꞉ga꞉ mo꞉walilima꞉ni, Yu amilo꞉ ganisolo kalulo꞉wa tililia꞉gane. 13 A꞉la꞉fo꞉ko꞉lo꞉ e mo꞉walilakiyo꞉, Sitifen elo꞉ mo꞉dimido꞉lo꞉ sa꞉ma꞉no꞉ kaluwo꞉ tililia꞉ga꞉ ta꞉taki, iliyo꞉ madali towo꞉ a꞉na sa꞉lakiyo꞉, “Sitifen eyo꞉ Mo꞉sa꞉s ele saefa꞉yo꞉ a꞉la꞉ta꞉ga꞉ gulugulula꞉sen a malilo꞉wo꞉ dio꞉ge sa꞉la꞉lab. 14 Kalu wema꞉yo꞉ ‘Ya꞉su, Nasala꞉t kalu a꞉ma꞉yo꞉ Godeya꞉ Malilo꞉ a we bidilaki, Mo꞉sa꞉sa꞉ ele man ko꞉lo꞉ nimo꞉lo꞉ dimi a꞉no꞉ togonola꞉ma꞉ib’ a꞉la꞉wida꞉labiki dabu” a꞉la꞉sio꞉. 15 Kalu elo꞉ mo꞉walila꞉likilo꞉ sen i a꞉ma꞉yo꞉ tambo, Sitifena꞉ wo꞉lokan sikudu ba꞉ba꞉ amio꞉, wo꞉lokan elo꞉ a꞉no꞉ ma꞉mul kaluwa꞉lo꞉wo꞉ o꞉ngo꞉lo꞉biki ba꞉ba꞉.