1 Ya꞉su e kaluka꞉isale modo꞉ kegeo꞉ a꞉no꞉ ko꞉lo꞉ ba꞉da꞉ga꞉yo꞉, e do꞉mo꞉wa fa꞉la꞉ ha꞉na꞉ga꞉, a꞉na sen amio꞉, enedo꞉ tili wida꞉sen kaluka꞉isale iyo꞉ elo꞉ amio꞉ a꞉na ya꞉sio꞉. 2 A꞉la꞉fo꞉ko꞉lo꞉ eyo꞉ imo꞉wo꞉ towo꞉ a꞉na mo꞉mo꞉da widakiyo꞉ a꞉la꞉sio꞉.

11 1Bid 4.14“Gio꞉ neya dowab amilo꞉ nolba꞉lo꞉ gimo꞉lo꞉ dio꞉ge sa꞉lab a꞉no꞉, hida꞉yo꞉wo꞉ dimiab a꞉no꞉, a꞉la꞉ta꞉ga꞉ to ko꞉li ko꞉lilo꞉ gimo꞉lo꞉ diga꞉li sa꞉lab a꞉no꞉, gio꞉ ego꞉le dowabikigab. 12 2Sto 36.16,Ilig 7.52Hebene a꞉namio꞉ wa꞉l gililo꞉ dia꞉no꞉wo꞉ alan yasisab ko꞉lo꞉, gio꞉ iligi sagalema. Mo꞉wo꞉ o꞉go꞉do꞉ man dimidab we, tamin amilo꞉ dinali sa꞉lan kalu ko꞉lo꞉ dikidiakilo꞉ eteyo꞉ o꞉le o꞉ngab.

13 “Gio꞉ henfelo꞉ wema꞉ so꞉lu ko꞉sega, so꞉luwa꞉ nudo꞉ a꞉no꞉ aundo꞉ma fa꞉la꞉dowalega, so꞉luwa꞉ nudo꞉ a꞉no꞉ nafa a꞉fa꞉la꞉doma꞉kiyo꞉, mada mo꞉dimidama꞉ib. So꞉lu a꞉no꞉ nanogo꞉ aundo꞉ma ko꞉lo꞉, ha꞉la꞉ya sanditalikiyo꞉, kaluwa꞉yo꞉ mo꞉asulaki, ka wa꞉la꞉la꞉i ha꞉na꞉ib.

14 Yo꞉n 8.12,9.5“Gio꞉ henfelo꞉ wema꞉ ho꞉len ko꞉lo꞉lab. Amisa꞉n misio꞉ amilo꞉ a꞉lab a꞉no꞉ mada wo꞉no꞉lebo꞉ mo꞉doma꞉ib. 15 Mak 4.21,Luk 8.16, 11.33Kaluwa꞉yo꞉ nafayo꞉ do꞉lia꞉ga꞉yo꞉ fafowa꞉yo꞉ wo꞉no꞉lebo꞉ mo꞉go꞉lu alitan. Iliyo꞉ nafa a꞉no꞉ do꞉lia꞉ga kalaba dia꞉tab ko꞉lo꞉, ho꞉len a꞉ma꞉yo꞉ ayamilo꞉ sen a꞉no꞉ tambowo꞉ ho꞉lea꞉tan. 16 A꞉fe 5.8-9,1Bid 2.12A꞉la꞉do꞉ dimidan o꞉leaumbo꞉, gio꞉ ho꞉len gililo꞉wo꞉ kaluka꞉isale siwa꞉l amio꞉ do꞉ifoma. A꞉la꞉galikiyo꞉ iyo꞉ gililo꞉ man nafa dimido꞉wo꞉ ba꞉da꞉sa꞉ga꞉yo꞉, iliyo꞉ Do Gode, Hebenelo꞉ a꞉lab a꞉ma꞉ wiyo꞉ ko꞉lo꞉ wabulu sa꞉ma꞉ib.”

17 Lom 3.31Ya꞉su eyo꞉ towo꞉ a꞉la꞉sio꞉, “Mo꞉sa꞉sa꞉ ele difa꞉ o꞉lia꞉ dinali sa꞉lana꞉lo꞉ to difa꞉ a꞉no꞉lia꞉yo꞉ niyo꞉ dila꞉ma꞉ mio꞉ a꞉la꞉bo꞉ giliyo꞉ asula꞉so꞉bo. Ne kolo꞉ mio꞉ we, to a꞉no꞉ kolo꞉ ilili alifa꞉ni mio꞉. 18 Luk 16.17,21.33Niyo꞉ to we gimo꞉wo꞉ hendele so꞉lo꞉l. Akin o꞉lia꞉ henfelo꞉ o꞉lia꞉yo꞉ semo꞉ kelege dowab amio꞉, Godeya꞉ ele to difa꞉ a꞉namio꞉ to ha꞉lula꞉su heb sa꞉sa꞉lo꞉ nowo꞉ mada mo꞉kelege doma꞉ib. To a꞉no꞉ tambo o꞉semo꞉ ilili alitab amio꞉ o꞉dofo꞉mela꞉ib. 19 Ya꞉m 2.10A꞉la꞉go꞉ko꞉lo꞉ kalu abeyo꞉ ele difa꞉ a꞉namio꞉ to ha꞉lula꞉su nowo꞉ o꞉go꞉sa꞉sa꞉ga꞉, kalu nolo꞉lo꞉ to a꞉no꞉ o꞉go꞉sema꞉ki widalega, kalu a꞉no꞉ Godeya꞉lo꞉ bo꞉fo꞉mela꞉no꞉ hen a꞉namio꞉ e wilo꞉ma doma꞉ib. Ko꞉sega kalu abeyo꞉ ele to difa꞉ a꞉no꞉ dinafa kudu ha꞉na꞉ga꞉, nolbo꞉wo꞉ dinafa wida꞉lalega, Godeya꞉lo꞉ bo꞉fo꞉mela꞉no꞉ hen a꞉namio꞉ e wi alan dia꞉ib. 20 Niyo꞉ gimo꞉wo꞉ a꞉la꞉so꞉lo꞉l. Man digalo꞉ gililo꞉ dimida꞉lab a꞉ma꞉yo꞉, Fa꞉lisi kalu o꞉lia꞉ elelo꞉ wida꞉sen kalu o꞉lia꞉ma꞉lo꞉ man digalo꞉ dimida꞉lab a꞉no꞉ mo꞉tininilalega, gio꞉ Godeya꞉lo꞉ bo꞉fo꞉mela꞉no꞉ hen a꞉namio꞉ mada mo꞉tiha꞉na꞉ib.

21 Kis 20.13,Lo 5.17“Tamin amilo꞉ gili ma꞉mumo꞉lo꞉ to saefa꞉ a꞉no꞉ gio꞉ dabu ko꞉lo꞉ to a꞉no꞉ we, ‘Kalu nowo꞉ sana sowa꞉so꞉bo. Kaluka꞉isale abeyo꞉ nowo꞉ sana sowab a꞉no꞉, e mo꞉walila꞉sa꞉ga꞉ hida꞉yo꞉ dia꞉ib’ a꞉la꞉sio꞉. 22 1Yo꞉n 3.15Ko꞉sega niyo꞉ towo꞉ gimo꞉wo꞉ a꞉la꞉so꞉lo꞉l. Kaluka꞉isale abeyo꞉ ene ao nowo꞉mbo꞉lo꞉ kulufa꞉yab a꞉no꞉ elo꞉ mo꞉walila꞉sa꞉ga꞉ hida꞉yo꞉ dia꞉ib. A꞉la꞉ta꞉ga꞉ to nowo꞉ a꞉la꞉so꞉lo꞉l. Kaluka꞉isale abeyo꞉ ene ao nowo꞉mbo꞉lo꞉ towo꞉ fisa꞉le sa꞉lab a꞉no꞉, ganisolowa꞉ siwa꞉la kagama꞉ib. A꞉la꞉ta꞉ga꞉ kaluka꞉isale abeyo꞉ ene ao nowo꞉mbo꞉lo꞉ wa꞉la꞉ sana sa꞉lab a꞉no꞉ de hena sandifa꞉ib.

23-24 Mak 11.25“A꞉la꞉fo꞉ko꞉lo꞉ ge Godemo꞉lo꞉ bobalo꞉ so꞉mea꞉sen mu gulu a꞉namio꞉ boba kelego꞉wo꞉ Godemo꞉ dimia꞉no꞉ dowa꞉sena, gao noma꞉lo꞉ gilo꞉ emo꞉lo꞉ hala dimido꞉wo꞉ o꞉a꞉la꞉b a꞉la꞉bo꞉ asulalega, ge boba kelego꞉wo꞉ a꞉naka dia꞉ta꞉ga꞉ hamana. Ge gaomo꞉wo꞉ tamin amio꞉ o꞉ko꞉le sa꞉ma꞉ ha꞉na꞉sa꞉ga꞉, e o꞉lia꞉ digalela꞉sa꞉ga꞉ go꞉go꞉dela꞉bi. Go꞉go꞉dela꞉sa꞉ga꞉yo꞉, ge a꞉ma꞉la꞉ ya꞉ga꞉ Godemo꞉wo꞉ bobayo꞉ a꞉na dimea꞉bi. 25 Kalu noma꞉yo꞉ ge mo꞉walilima꞉no꞉ a꞉la꞉ta꞉ga꞉ tililia꞉ ha꞉nalega, toga o꞉ha꞉na꞉ga꞉ ha꞉nakiyo꞉, giyo꞉ e o꞉lia꞉yo꞉ bo꞉bo꞉ge dinafala꞉bi. A꞉la꞉bo꞉ mo꞉dimidalega eyo꞉ aloba꞉dan kaluwa꞉ dagiya dia꞉fa꞉ib. A꞉la꞉galikiyo꞉, aloba꞉dan kalu eyo꞉ da꞉la꞉di kaluwa꞉ dagiya dia꞉fa꞉ib. A꞉la꞉ta꞉ga꞉ da꞉la꞉di kaluwa꞉yo꞉ ge dibolowa to꞉loma꞉ib. 26 Niyo꞉ gemo꞉wo꞉ hendele so꞉lo꞉l. Ge dibolo a kabilo꞉ seno꞉, su mole da꞉fe sio꞉ a꞉no꞉ tambo semo꞉ kedetalikiyo꞉, ge mada mo꞉sili alifa꞉ib.”

27 Kis 20.14,Lo 5.18Ya꞉suwa꞉ to heb a꞉kudu sa꞉lakiyo꞉ a꞉la꞉sio꞉, “Gili ma꞉mu ima꞉lo꞉ to saefa꞉ a꞉no꞉ gio꞉ dabu ko꞉lo꞉, to nowo꞉ we, ‘Uwo꞉wo꞉ dia꞉so꞉bo.’ 28 Ko꞉sega niyo꞉ gimo꞉wo꞉ towo꞉ a꞉la꞉so꞉lo꞉l. Kalu abeyo꞉ ga nowo꞉ ba꞉da꞉sa꞉ga꞉, ga a꞉no꞉ nelo꞉ afa dimo꞉losa꞉ a꞉la꞉bo꞉ asulalega, kalu a꞉ma꞉yo꞉ ga a꞉no꞉ ene asulo꞉ amio꞉ o꞉ma afa di ko꞉lo꞉ a꞉lab. 29 Madi 18.9,Mak 9.47A꞉la꞉fo꞉ko꞉lo꞉ gi si ililib a꞉ma꞉yo꞉, Godeya꞉ digalo꞉ man kudu ha꞉na꞉no꞉wo꞉ ka꞉lalega, si a꞉no꞉ dugulia꞉ga꞉ sandifoma. Do꞉mo꞉ gilo꞉ ko꞉ de hen amio꞉ tambo sanditabena꞉kiyo꞉, do꞉mo꞉ heb nowo꞉ dilalega a꞉no꞉ o꞉li doma꞉ib. 30 Madi 18.8,Mak 9.43A꞉la꞉ta꞉ga꞉ gi dagi ililiba꞉yo꞉ Godeya꞉ digalo꞉ man kudu ha꞉na꞉no꞉wo꞉ ka꞉lalega, dagi a꞉no꞉ gedelia꞉ga꞉ sandifoma. Do꞉mo꞉ gilo꞉ ko de hen amio꞉ tambo ha꞉nabena꞉kiyo꞉, do꞉mo꞉ heb nowo꞉ gedelalega, a꞉no꞉ o꞉li doma꞉ib.”

31 Lo 24.1-4,Mak 10.4Ya꞉suwa꞉ to heb a꞉kudu sa꞉lakiyo꞉ a꞉la꞉sio꞉, “Gili ma꞉muwa꞉yo꞉ a꞉la꞉saefa꞉, ‘Kalu abeyo꞉ ga di enedo꞉ a꞉no꞉ ta꞉fa꞉nikiyo꞉, eyo꞉ “Niyo꞉ ga we ta꞉fo꞉” a꞉la꞉bo꞉ mo꞉fo꞉s sa꞉sa꞉lo꞉wo꞉ gedea꞉sa꞉ga꞉yo꞉, gamo꞉wo꞉ dimiaki ta꞉ta꞉bi.’ 32 1Kol 7.10-11Ko꞉sega niyo꞉ gimo꞉wo꞉ towo꞉ a꞉la꞉so꞉lo꞉l. Kalu abeyo꞉ ingayo꞉ uwo꞉ dia꞉nikiyo꞉ mo꞉ane ko꞉sega, eyo꞉ ga a꞉no꞉ ka ta꞉talega, kalu a꞉ma꞉yo꞉ inga a꞉no꞉ uwo꞉wo꞉ dima꞉ki ta꞉takigab. A꞉la꞉ta꞉ga꞉ kalu abeyo꞉ ga ta꞉fo꞉ elen a꞉no꞉ ko꞉lo꞉ a꞉dialega, e uwo꞉ dia꞉lab.”

33 Wkp 19.12,Nam 30.2, Lo 23.21Ya꞉suwa꞉ to heb a꞉kudu sa꞉lakiyo꞉ a꞉la꞉sio꞉. “Tamin amilo꞉ gili ma꞉mumo꞉lo꞉ to saefa꞉ a꞉no꞉ gio꞉ dabu ko꞉lo꞉ to nowo꞉ we. ‘Giliyo꞉ wo꞉lokano꞉ golakiyo꞉, Godemo꞉ dinali sa꞉lalega, giliyo꞉ towo꞉ madaliyo꞉ sa꞉la꞉so꞉bo. To gililo꞉ Kalu Alanbo꞉lo꞉ dinali sio꞉ aumbo꞉ hendele dimidaki kudu ha꞉na꞉bi.’ 34 Ais 66.1,Madi 23.22, Ya꞉m 5.12Ko꞉sega niyo꞉ gimo꞉wo꞉ towo꞉ a꞉la꞉so꞉lo꞉l. Nolba꞉yo꞉ to gilo꞉ sa꞉lab a꞉no꞉ hendele a꞉la꞉tili asuluma꞉kiyo꞉, giliyo꞉ kelego꞉ wi no amio꞉ halale alitakiyo꞉, dinali sa꞉la꞉so꞉bo. Giliyo꞉ towo꞉ halale alitaki Hebene wi sa꞉lakiyo꞉, dinali sa꞉la꞉so꞉bo. Mo꞉wo꞉ Hebene a꞉no꞉ Godelo꞉ mesa꞉no꞉ i fofodo꞉ halaido꞉wo꞉ o꞉m. 35 Song 48.2,Ais 66.1A꞉la꞉ta꞉ga꞉ giliyo꞉ towo꞉ halale alitaki henfelo꞉ wema꞉ wi sa꞉lakiyo꞉, dinali sa꞉la꞉so꞉bo. Mo꞉wo꞉ henfelo꞉ we Godeya꞉ eno꞉ ko꞉lo꞉, ene gido꞉fo꞉lo꞉ dia꞉fo꞉labo꞉ o꞉m. Ya꞉lusalema꞉ wi sa꞉lakiyo꞉, dinali sa꞉la꞉so꞉bo. Mo꞉wo꞉ Ya꞉lusalem a꞉no꞉ Misa꞉ Kalu Alana꞉ ene amisa꞉no꞉ o꞉m. 36 A꞉la꞉ta꞉ga꞉ wo꞉lokano꞉ golakiyo꞉ towo꞉ dinali sa꞉la꞉so꞉bo. Mo꞉wo꞉ gi misa꞉ a꞉namio꞉, misa꞉ fo꞉n ko heyo꞉wa꞉le ululo꞉wa꞉le fa꞉la꞉doma꞉kiyo꞉ giyo꞉ mada mo꞉dimidama꞉ib. 37 Towo꞉ sa꞉lakiyo꞉, ‘A꞉’ a꞉lalega, o ‘A’ a꞉lalega, to a꞉no꞉ko꞉ hende sa꞉laki auma꞉ib. To nol ko꞉lo꞉ a꞉kudu sa꞉lab a꞉no꞉ mogago꞉lo꞉ dimida꞉sen Sa꞉da꞉na꞉ eya a꞉la꞉ta꞉ga꞉ fa꞉la꞉dowab.”

38 Kis 21.24,Wkp 24.20, Lo 19.21“Gili ma꞉mu ima꞉ to saefa꞉ a꞉no꞉ gio꞉ dabu ko꞉lo꞉ to nowo꞉ we, ‘Kalu abeyo꞉ noma꞉ siyo꞉ mogagilalega, si elo꞉wo꞉lo꞉ mogagila꞉bi. Kalu abeyo꞉ noma꞉ beso꞉ dugulalega, bes elo꞉wo꞉lo꞉ dugula꞉bi.’ 39 Ko꞉sega niyo꞉ towo꞉ gimo꞉wo꞉ a꞉la꞉so꞉lo꞉l. Mogago꞉ kaluwa꞉yo꞉ gemo꞉wo꞉ hida꞉yo꞉ dimialega, a꞉ma꞉la꞉bo꞉ wa꞉dea꞉so꞉bo. Kalu abeyo꞉ gi babo꞉ ililiba bolalega, babo꞉ nodowo꞉lo꞉ emo꞉ wida꞉bi. 40 Kalu noma꞉yo꞉ so꞉g gilo꞉ wa꞉l amilo꞉ sa꞉ga꞉la꞉sen a꞉no꞉ dia꞉no꞉ a꞉laki mo꞉walilima꞉no꞉ asulalega, so꞉g a꞉no꞉ dimia꞉sa꞉ga꞉yo꞉, so꞉g nol gilo꞉ sa꞉ga꞉la꞉sen a꞉no꞉lo꞉ emo꞉ dimia꞉bi. 41 Kalu noma꞉yo꞉ e kelego꞉wo꞉ hena꞉ fog a꞉na gemo꞉ dia꞉hamana꞉ki dibodalega, giyo꞉ hena꞉ fog nowo꞉ o꞉dia꞉ha꞉na꞉bi. 42 Kalu noma꞉yo꞉ kelego꞉ no꞉wo꞉ gemo꞉wo꞉ ha꞉iyalega, giyo꞉ kelego꞉ elo꞉ ha꞉iyab a꞉no꞉ dimea꞉bi. Kalu abeyo꞉ kelego꞉ gilo꞉wo꞉ eyo꞉ dia꞉sa꞉ga꞉ a꞉ma꞉la꞉ dimia꞉no꞉ ko꞉lo꞉ dabu ba꞉dalega, giyo꞉ e gola ba꞉da꞉so꞉bo.”

43 Wkp 19.18“Gili ma꞉mu ima꞉ to saefa꞉ a꞉no꞉ gio꞉ dabu ko꞉lo꞉ to nowo꞉ we. ‘Giliyo꞉ giasi kaluka꞉isale o꞉lia꞉yo꞉ ha꞉fo꞉wo꞉ disa꞉laki, gili gis kalumo꞉wo꞉ mo꞉bea꞉bi’ a꞉la꞉sio꞉. 44 Kis 23.4-5,Luk 23.34, Ilig 7.60, Lom 12.14,20Ko꞉sega niyo꞉ gimo꞉wo꞉ towo꞉ a꞉la꞉so꞉lo꞉l. Giliyo꞉ gis kalumo꞉wo꞉ ha꞉fo꞉wo꞉ disa꞉la꞉bi. A꞉la꞉ta꞉ga꞉ gimo꞉lo꞉ dikidiab kalu i a꞉no꞉ Gode eyo꞉ kanulu alifoma꞉ki dulugu sa꞉la꞉lubi. 45 Giyo꞉ a꞉la꞉dimidalikiyo꞉, gio꞉ Do Hebenelo꞉ a꞉lab a꞉ma꞉ ene so꞉wale fa꞉la꞉doma꞉ib. Mo꞉wo꞉ Gode eyo꞉ mogago꞉ kaluka꞉isale o꞉lia꞉ nafa kaluka꞉isale o꞉lia꞉mo꞉wo꞉ ofo꞉ ta꞉mena꞉ki ta꞉ta꞉sen. A꞉la꞉ta꞉ga꞉ Gode eyo꞉ man digalo꞉lo꞉ dimida꞉sen kaluka꞉isale imo꞉wo꞉ a꞉la꞉ta꞉ga꞉ man digalo꞉lo꞉ mo꞉dimida꞉sen kaluka꞉isalemo꞉wo꞉lo꞉ ho꞉no꞉ timena꞉ki ta꞉ta꞉sen. 46 Kaluka꞉isale gimo꞉lo꞉ ha꞉fo꞉lo꞉ disa꞉lab o꞉mo꞉wo꞉ giliyo꞉lo꞉ imo꞉wo꞉ ha꞉fo꞉ disa꞉lalega, mewa꞉l dia꞉no꞉ hendeleyo꞉ o꞉mba. Takis molelo꞉ dian kalu iliyo꞉lo꞉ man o꞉leauka dimida꞉li sab. 47 Gio꞉ gaomo꞉wo꞉ disiyo꞉ a꞉la꞉bo꞉ ka sa꞉laki, ko꞉sega nolbo꞉wo꞉ mo꞉sa꞉lalega, man gilo꞉ dimidab a꞉ma꞉yo꞉, gio꞉ nolo꞉ waga tininima꞉nigaya? Ha꞉la꞉ kalu ililo꞉ dimidab o꞉leau giliyo꞉lo꞉ a꞉la꞉ka dimidab. 48 Wkp 19.2,Lo 18.13A꞉la꞉fo꞉ko꞉lo꞉ gili Go꞉l ko꞉lo꞉ Hebenelo꞉ a꞉lab a꞉ma꞉lo꞉ ha꞉fo꞉ disa꞉lakilo꞉ ego꞉le sab o꞉leaumbo꞉, gio꞉lo꞉ ha꞉fo꞉ disa꞉laki, ego꞉le dowa꞉bi.”