62
1 Na da Yelusaleme fi ilia dogo denesima:ne sia:mu.
Na da sia: mae ouiya:le, e gaga:i dagoi
amola ea hasalasu hou da gasi ganodini gamali agoane ba:sea fawane ouiya:mu.
2 Yelusaleme! Fifi asi gala dunu huluane da dia hasalasu hou ba:mu.
Ilia hina bagade dunu da dia hadigi ba:mu.
Hina Gode Hisu da dima dio gaheabolo asulimu.
3 Di da Hina Gode Ea habuga noga:i agoai ba:mu.
4 Dia dio da wali, “Fisiagai dagoi”
amola Isala:ili soge dio da “Uda Fisiagai.”
Be dia dio gaheabolo da “Gode da ema Hahawane Gala” ba:mu.
Amola Isala:ili soge dio gaheabolo da “Uda Hahawane Lai Dagoi” ba:mu.
Bai Hina Gode da dima hahawane gala,
amola E da Isala:ili soge amoga egoa agoane ba:mu.
5 Dunu amo da di hahamoi
E da ayeligi amo da a:fini dunuga hame dawa:digi lasa agoane, di lamu.
Amola dunu da ea uda gaheabolo lai amoma hahawane gala, amo defele,
dia Gode da dima hahawane ganumu.
6 Yelusaleme! Dia gagoi da:iya Na da sosodo ouligisu dunu aligima:ne sia:i.
Ilia da eso amola gasi ganodini mae yolele,
mae ouiya:le, Hina Gode Ea ilegele sia:i, E da mae gogolema:ne,
Ema eso huluane sia:ma:ne Na da sia:i dagoi.
7 Ilia da Hina Godema, E da mae helefili,
fifi asi gala huluane da Yelusaleme amoma bu nodoma:ne,
Yelusaleme bu hahamoma:ne, Ema sia:mu da defea.
8 Hina Gode da amane sia:i, (amola E da Ea gasaga Ea sia:i defele hamomu)
“Dilia ha lai dunu ilia da bu dilia gagoma hame manu,
amola dilia waini hano hame manu.
9 Be dilia fawane da gagoma bugi amola faiba:le da agi ga:gi nanu,
Hina Godema nodomu.
Amola dilia da waini efe ouligiba:le amola waini fage faiba:le,
da waini hano Na Debolo gagoi ganodini manu.
10 Yelusaleme fi dunu! Moilai gadili asili,
dilia mugululi asi dunu buhagima:ne, logo fodoma.
Logo hahamoma! Igi fadegama!
Fifi asi gala huluane dawa:ma:ne, dawa:digisu hahamosu gaguma.
Amasea ilia huluane agoane dawa:mu, amo
11 * Aisaia 40:10; Wamolegei Sia: Olelesu 22:12Hina Gode da osobo bagade fifi asi gala huluane ilima agoane sia:sa,
“Yelusaleme fi dunu ilima amane sia:ma,
‘Hina Gode da dili gaga:musa: misunu.
Amola E da dunu amo E gaga:i, amo oule misunu.’ ”
12 Dunu eno da dilima dio asulimu,
amo “Gode Ea Hadigi Fi” amola “Fi amo Hina Gode da Gaga:i Dagoi.”
Ilia da Yelusaleme amoma dio asulimu, amo,
“Gode Ea Dogolegei Moilai Bai Bagade.”
amola “Moilai Bai Bagade amo Gode da Hame Fisiagai.”