1 Nato dubobari otatawo, peroveta pitawa kakato matu idedegetera butuda, awatedo embo ainmi God da Asisi bari ango tedo eira awa, gebé eove. Ata ainda atopatari awa God da rita ko asisi neida ri awa bavedo giwo. 2 Nongo edo inemane gawa emboda atopatari awa God da Asisi da ri? Begata awa eire: Embo ainmi ge karigedo eira, “Iesu Keriso tamopiside butuda gupusina,” ainda atopatari awa God da yai edo gumbari. 3 Edo embo ainmi Iesu Keriso tamopiside butuda gupusina awa karigae, ainda atopatari awa God da yai edo gumbae. Keriso da Gitopo Embo*Keriso da Gitopo Embo. [English: Antichrist] Ainda moka edo kondade ari ge nenei 1 John 2:18da tuda giwo. da asisi emi euri embo awa ge ango tedo eira. Edo asisi awa gumain eira awa inemane ingitewa. Edo asisi awa matu butuda idegesisina edo boroko isira.

4 Mamai nato, imomane awa God da mamai. Edo embo†embo da moka einda awa ‘God da Asisi Kotopu’ (John 14:16-17). ain imomane doda isirada goroba ami embo‡embo da moka einda awa Satan (John 12:31; 16:11). ain butu embomai§butu embomai da moka 1 John 2:15-16da tuda giwo. doda isirada goroba daginegari isira, awatedo inemane awamane*awamane da moka einda awa peroveta pitawa kakato (1 John 4:1 giwo.). John mi ge engo sisina, God da mamaimi peroveta pitawa kakatoda atopatari pitawa awa gido ajiregesitera. daginegesitewa. 5 Awamane awa butu embomaida embobo. Awatedo awamanemi butu embomaida atopatari pisido era, edo butu embomaimi awamaneda atopatari ingido era. 6 Nakare†Nakare da moka einda awa John ae Iesu da aposil berari de. awa God da embobo, awatedo embo ainmi God gari edo goteite natokare ge ingido eira. Edo embo awa God da embo ae, ami natokare ge ingae edo eira. Ango edo era ami kaenane arapa gari budo era, atopatari embomaimi piedo era awa God da Asisi da gebé rita ko asisida pitawa ri.

7 Nato dubobari otatawo, dubobari awa God da yai edo gundo eira, awatedo kaende dubo mina bara edo ore. Embo ainmi embo nenei dubobudo eira awa God da engari, edo ami God gari. 8 God awa dubobari tutu, awatedo embo ainmi embo nenei dubobae edo eira awa, imo God gae. 9 God mi kaenato yai ainda dubobari awa engo esiri arapa esisina. Ami ainda Mai dakaima deposibé awa butuda piesiri gupusina, ainda toda kaena wasiri natopo itari awa borote. 10 Kaenato dubobari God da yai awa dubobaribé ae, ata dubobaribé awa God mi esiri gositera iji ainde ainda sinigambari kaenato yai awa itae arate tedo ainda Mai piesiri gundo kaenato jimbo bebegae awaembo besisina. 11 Nato dubobari otatawo, God mi kaena ango duboburisina, awaembo kaena daedo dubo mina bara ore. 12 Embo da ainmi ainda jisimi God gari awa itae. Awarata, edo kaenane dubo mina bara edo ara, ami arapa aina, God kaenato doda isima edo eira edo kaenane God ae embomai de dubobudo era dá ango God mi kaenane orote jipapa esisina.

13 God mi ainda Asisi kaenamonde pipisisina, awatedo kaena gotera awa, kaena ainda doda isima edo era, edo imo kaenato doda isima edo eira. 14 Edo nanekare‡nanekare da moka einda awa John ae Iesu da aposil mane berari de. gositera edo embomaide karigedo era, Mamo mi ainda Mai piesiri gupusina, embomai butu dededa jimbo bebegaeda rirowa budo awamane toregarate. 15 Berari ainmi karigedo taina, “Iesu awa God da Mai,” God ainda doda isima edo eira edo imo God doda isima edo eira. 16 Edo kaenanemi God da dubobari kaenato yai awa gositera, edo ainda dubobari kaenato yai gebé esitera.

God awa dubobari tutu, awatedo embo ainmi embo nenei dubobudo eira awa, God da doda isima edo eira, edo God ainda doda isima edo eira. 17 Kaena butuda itera iji einde awa, wasiri kaenato dá Keriso mi edo esisina ango ore. Edo kaenane God ae embomai de dubobudo era dá ango God mi kaenane orote jipapa esisina, katari degutade, God mi kaena bekumba aina awa adu ainyae. 18 Embo ami God dubobé budo eira, God adu ari tao ae. Ata, edo embo ami God dubobudo eira dá ango God mi embomi imo dubobarate jipapa esisina awa, ainda adu ari berari God da yai itae aina. Aindabé emboda kotembari awa God mi ainda yai rirowa piae esira, embo ami God adu aina. Awatedo embo ainmi God adu edo eira awa, ami God da yai ainda dubobari berari piae edo eira.

19 Aindabé God mi gisibé kaena duboburisina, kaenanemi God dubobudo era. 20 Edo embo da (1) mi, “Na God dubobudo ena” site, ainda nameji§ainda nameji da moka awa ‘ainda gebé ari nameji’. de sinigambari edo eira gido, imo awa ge pitawa embo. Ango tena aindabé embo ain jisimi ainda nameji matu gari awa dubobae edo eira, God awa ine jisimi gae dubobari tao ae. 21 Edo God mi ge okain eiwa kaenato yai pipisisina awa: embo ainmi God dubobudo eira awa, ainda nameji daedo dubobudo arate.