1-2 Yasimana palupalu ꞌemiya ꞌaene ꞌigu susuyao me Isileli manudi nuwagu ꞌimwau wawasae, ꞌenega tuta yauna ꞌategu ꞌiuyauya manudi. ꞌIgu simana gete Keliso be Yaluyaluwa Tabuna simwalamwalatoni ꞌaene ona ꞌaiꞌaila. 3 Ta yanuwanuwa sinabwana ꞌigu susu nidi manudi be ꞌaene Yaubada ꞌina oboboma nina ꞌiꞌebwaꞌegu, nate Yesu Keliso, ꞌaene ꞌeguyega ꞌida ꞌewa be ꞌigu bodao nidi ꞌida ꞌebwaꞌedi, ta ꞌaboꞌagu yada miyaila Keliso ꞌenega, taudi manudi.

4 Ta onaꞌaiꞌaila, ꞌigu bodao nidi Yaubada lowa niꞌatu ꞌiꞌawa natunedi, ga wate ꞌina esaesa be ꞌina onaupaupa be ꞌina loina boboꞌadi ꞌiꞌebwaꞌedi, ta wate tapwalolo be yage boboꞌadi manudi ꞌionaupaupa 5 *Md 1:1-2; Yo 1:1gimi ꞌinapwanao ꞌediya, taudi nadigega Ebelaamo be, Aisake be, Yekobe be, ga muliyega ꞌidi boda nina ꞌenega Keliso ꞌiapwesa. Be yage gete manudi Yaubada tauna Toloetana sana tada tupuna tuta maiboꞌana ꞌediya. Eimeni.

6 Yaubada ꞌina ona getedi geyaꞌabo manudi tanuwanuwa ꞌaene ona ꞌeetete, ta esi ona getedi ꞌadi ꞌaiꞌaila siapwesa taudi me Isileli ꞌaiꞌaila ꞌediya, taudi Yaubada ꞌina bodao esiesinuwadimo, ta esi nigeya me Isileli maiboꞌadi ꞌediya. 7 *Nug 21:12Ta onaꞌaiꞌaila, nigeya ꞌaene Ebelaamo ꞌina susuyao maiboꞌana Yaubada ꞌiꞌawa natunedi, manuna Yaubada niꞌatu Ebelaamo ꞌieonena, ꞌigwae, “ꞌImu susuyao Aisake natunao ꞌediyega,” ta esi nigeya Aisake tasina ꞌenega. 8 Ona gete ꞌana mwalatoi niꞌatu ꞌieꞌita ꞌaiꞌailida ꞌaene Yaubada natunao nigeya Ebelaamo ꞌina susu ꞌenega, ta esi taudi Yaubada ꞌiona upaupaedi. 9 *Nug 18:14Manuna lowa Yaubada Ebelaamo ꞌena ꞌionaupaupa, ꞌigwae,

“Maꞌetamo tuta yaesinuwena ꞌena, yailama be natuyo meꞌolotona yaꞌebwaꞌeyo, mwaneyo Sela ꞌenega.”

10 Ga wate nadigega tubumai nina Aisake ꞌietai ga Libeka ꞌiaina, ga natunao didiluwaluwa gamwanaya, 11-12 *Nug 25:21, 23ta muliyega be Libeka ꞌienatuna, Yaubada ꞌieonena, ꞌigwae, “ꞌAbo natumwao ꞌuenatunedi, megwamana ꞌida etoloina tomatuwa ꞌena.” Taudi Yekobe be Iso. Gete ꞌenega tamwalatoi ꞌaiꞌailina ꞌaene gogama nidi nigeya ꞌidi guinuwa boboꞌana nai toꞌumalina ꞌediyega ꞌiesiesinuwedi, ta esi tauna ꞌina onaupaupa ꞌenega, manuna Yaubada nigeya tomota ꞌidi guinuwega ꞌida esinuwedi, ta esi taunamo ꞌina nuwenuwega. 13 *Mal 1:2-3Nadigega wate Yaubada ꞌisimana Buki Tabu ꞌenaya, ꞌigwae,

“Yekobe yaesinuwena ga yaobobomena, ta esi Iso yaguitoyasena.”

14 ꞌEnega mwaꞌadega tada onaꞌesa Yaubada ꞌina guinuwa gete manuna, ꞌaene nigeya palupaluna, aga? Nigeya! 15 *Sia 33:19Manuna Mosese ꞌina loina ꞌenaya, Yaubada ꞌigwae,

“ꞌAbo yaita nuwanuwagu be yaobobome yada obobome tuga, ta wate ꞌabo yaita yaꞌatenuwa ꞌoleꞌoleye, yada leme tuga.”

16 *Ta 3:5; Ep 3:9Gete ꞌenega ꞌieꞌiteda ꞌaene Yaubada ꞌina oboboma nigeya ꞌida apwesa daita, tomota ꞌida nuwanuwao nai ꞌida guinuwao ꞌediyega, ta esi tauna tuga ꞌina ꞌatenuwa ꞌoleꞌoleyega.

17 *Sia 9:16Ta gete wate ꞌebweu ꞌebeꞌita Pelo ꞌenega, manuna lowa Yaubada ꞌina ona Pelo nina manuna, ꞌigwae,

“Niꞌatu ꞌebeloina yaꞌebwaꞌemu be ꞌaene ꞌuda losaiyegu be ꞌenega ꞌigu waiwai ꞌuda ꞌita, be gote ꞌenega ꞌagu esana ꞌida sinabwa baleꞌu maiboꞌana ꞌena.”

18 ꞌEnega onaꞌaiꞌaila, ꞌabo Yaubada nuwanuwana be yaita ꞌiobobome ꞌida obobome tuga, ta ꞌabo yaita nuwanuwana be ꞌigie debapaꞌali, ꞌiabe ꞌida debapaꞌala.

19 Nai ꞌaimi yage gete manuna wanuwanuwa, ꞌaene ꞌeguma maiboꞌada ꞌida bubuna nina Yaubada ꞌina nuwenuwega, toꞌase sana manuna ꞌieꞌewada? 20 *Ais 45:9Gosegwao, ꞌaboꞌada geyaꞌabo Yaubada gete nadigega taloꞌaloꞌaegile, ꞌatuwa nadigega ꞌule ꞌana toꞌabi, ꞌebweu tuta tai nina ꞌulena ꞌiꞌabidi, ga ꞌebweu ꞌule toꞌabi ꞌieonena, ꞌigwae, “Toꞌase ꞌalena nigeya ꞌuꞌabiꞌabigu gosiyagu nadigega?” 21 *Yel 18:6Ta saꞌi toꞌabi ꞌulena tauna ꞌina guinuwa ꞌida loine, ꞌabo nuwanuwana be bwaꞌa ꞌebweuna ꞌenega ꞌule ꞌeluwa ꞌiꞌabidi, ꞌebweuna ꞌana ꞌita kausala, ta ꞌebweu nigeya.

22 Yaubada wate nadigega ꞌina guinuwa tauna ꞌiloina, manuna tuta yauna totoꞌumalidi ꞌediya ꞌieꞌalamaꞌiꞌitana sinabwana, be ꞌenega ꞌidi toꞌumalinao geyaꞌabo ꞌida eꞌieꞌisadi, ta saꞌi nigeya sida ematamatana, ꞌenega ꞌinuwena ꞌaene ꞌilobwenena be ꞌida loinedi, be ꞌenega ꞌina gamwasowala be ꞌina waiwai sida ꞌita. 23 Ta wate nuwanuwana be ꞌina esaesao nidi lowa ꞌigibubudi ꞌaboꞌada ꞌiobobomeda manuda, be ꞌaene ꞌida eꞌitada. 24 ꞌEnega boda ꞌeluwa ꞌediyega ꞌibwauyeda, me Yudia ꞌemega, ta ꞌomi nigeya me Yudia ꞌemiyega. 25 *Osi 2:23Nadigega palopita Osia ꞌina buki ꞌena ꞌisimanena, ꞌigwae,

“Tomota nidi taudi nigeya ꞌigu bodao yada bwauyedima be ꞌigu boda ꞌena sida lugu, manuna lowa nigeya ꞌigu oboboma ꞌena simiyami, ta gete tugai yaobobomedi. 26 *Osi 1:10Lowa Yaubada ꞌieonedi, ꞌigwae, ‘ꞌOmi nigeya ꞌigu bodao, maꞌetamo ona nina ꞌida saꞌugelasa be taudi sida eesedi, ‘Yaubada miyamiya atayana natunao.’ ”

27 *Ais 10:22-23Aisea wate nadigega me Isileli manudi ꞌisimana, ꞌigwae,

“Maꞌetamo Isileli bodanao sida susaila ꞌatuwa kaukau leꞌawaya, ta esi ꞌediyega ꞌiabe puꞌepuꞌedimo Yaubada ꞌiꞌetoseyedi. 28 Manuna Yaubada nuwanuwana be me baleꞌu maiboꞌadi ꞌida loina maniniyedi.”

29 *Ais 1:9Nadigega wate Aisea ꞌina simana ꞌigwae,

“Yaubada Toewaiwai sana, ꞌenega ꞌeguma nigeya ꞌedega ꞌina bodao puꞌepuꞌedi

ꞌiꞌateꞌatenuwa ꞌoleꞌoleyedi, ꞌiabe maiboꞌada ꞌipeꞌuda, nadigega Sodoma be Gomola maiboꞌadi ꞌiloemwawasidi.”

30 Gete ꞌenega tamwalamwalatoni ꞌaene taudi nigeya me Yudia nigeya sitootoo be ꞌaene Yaubada ꞌida ꞌawapalupaluyedi, ta esi ꞌidi emisa tuga ꞌenega ꞌawapalupalu silobena. 31 Ta esi me Isileli nidi sitootoo be loina ꞌana muliya ꞌenega Yaubada ꞌida ꞌawapalupaluyedi, ta saꞌi sitooyogena.

32 Taudi situila ꞌidi guinuwa ꞌenaya, ta nigeya ꞌidi emisa ꞌena, be ꞌaene Yaubada ꞌida ꞌawapalupaluyedi. Nate ꞌidi loegesi be ꞌatuwa nadigega gulewa ꞌenaya sieseesetupedi. 33 *Ais 8:14, 28:16; 1 Pi 2:6, 8Buki Tabu ꞌena ꞌebe esetupe gete manuna ꞌisimanena, ꞌigwae,

“Waꞌitaꞌiꞌisimi manuna gulewa nina ꞌiabe Sayoni ꞌena yasaꞌui, be tomota yaudi ꞌena siesetupedi be sibebeꞌu, ta ꞌabo yaisigedi tauna gulewa nina siemisei, geyaꞌabo wate omayamaya silobaloba.”