2 Yone
Yonehanda beba mende ogo gilibu wia hene
Mbuga ogoha gilibu ngarunaga nemandi ogo
Yonehanda beba mende gili binigo bi emene nemandi lalu lenego ogo. Keriso hameigini tini gubalini haga haga bialu holene nga, lalubi, Ngode Datagaliwabe mana henene ngadagua ndo lawai haga karume tí mo guya holigo de hondo halimu, lalu bi gilibu wia hene.
Bu̱lu̱ baga buwa kuni gilibu ngago
1-3
Yonehanda bi ala lenego
4-6
Gubalini holenego duniniore lenego
7-11
Ngode Datagaliwabe mana henene ngadagua ndo lawai harago de hondo holene nga
12-13
Lamaro bialu lenego
1
1-2 I̱ agali ala hene miniwi howa Keriso hameigini ngoai ho kamiru-o tíhondo beba gilibu wia harogoni. Henene lolene inaha ngagobi wiaaboore holebirago i̱na tí gubalini heneneore ho kogoni. I̱ hangu ndo henene lolene ogoni aria bibahende karumebi tí gubalini ho kagoni. Yo 8.32, 1 Pi 5.1, 1 Yo 3.18, 3 Yo 1
Aba Ngode Datagaliwabebi ibu Igini Yasu Kerisobi libugua inahondo biamogo bulene nawi howa biamogo bia holenebi dara holenebi mo palia holenebi ngilo hamelo ko. Uruni henene lolenebi gubalini holenebi heba inanaga wilo hamelo ko.
Henene lolenebi gubalini holenebi ogo
Aba Ngode Datagaliwabehanda mana bulene nga lowini ngadagua tí marume hale howa henene lolenehayagi kamigo hondowa i̱ turu timbuni ho ko. 3 Yo 3 Anigo Keriso hameiginiru-o tíhondo mana gahenge ndo mana piganengi lowini ngago iname Ngode Datagaliwabehondo mini mbiraore wialu harimangi howa hale haabo harimago mana ogoni gilibu wia harogo ogo. Iname gubalini hagahaga bu hami̱ya. Yo 13.34, 15.12, 15.17, 1 Pi 4.8, 1 Yo 2.7-8, 3.11, 3.23 I̱na gubalini holene langerogoni walia holenaga iname Ngode Datagaliwabehanda mana lowini ngadagua bialu holene nga. Mana lowiyagoni ina bibahende Keriso hameigini pigane harimangi howa hale harimago ogo. Iname gubalini hagahaga bu holene nga. Yo 14.15, 14.21, 1 Yo 2.5, 2.24, 5.3
Mo hondo haga dewa dindi bibahendeni purogolo hayarume Yasu Keriso dindi agaliore hole ibiyago ibu dindi agali hene ndo laga ka. Ogonidagua laga kagome ibu mo hondo haga agali howa Kerisola Waitigi haga ka. 1 Yo 2.22, 4.1-3 Iname mbirale tí yu halimulo biabe birimagonaga yu waholigo Ngode Datagaliwabehanda tíhondo emena mulene ngago bibahende yu hai hole tíni mamage ho halimu. Mg 10.29-30, Ga 3.4, Hi 10.32, 10.35
Mbirali Kerisohanda lawai hayagohayagi howa tagiraha pogolo tagi hayagua ibu Ngode Datagaliwabela hogimbu nabi hene ka. Mendeali Kerisohanda mana lawai hayagoha ha ho wiaabo kayagua ibu Aba Iginilaha hogimbu bu hene ka. 1 Yo 2.23 10 Anigo mbiralime Kerisohanda lawai hayadagua ndo bi tara lalu lawai hole ibiyagua ibugua, Ebero, laragola, tígua, Habiya íbu, nale andagaha nenege birule ibilo hengebi namilimu. Eb 5.11, 2 Te 3.6 11 Agali biagohondo, Habiya íbu, larimiyagua ko biaga biago heba ho bimagamaga bu holeberami.
Lamaro bialu bi lenego ogo
12 Tíhondo bi dewa lolene manda bia bidogo bebani gili bialu lowia hole hame nalego inane handaya hagabu howa tí baba bi la doba bialu ina turu ho hami̱yanaga i̱ tí kamiria nenege ibule ko. Yo 17.13, 1 Yo 1.4, 3 Yo 13-14
13 Ina Keriso hameigini oali ngoai haga kamarume, Tíore mitangi bu kama, lalu lawia harama.

1:1-2: Yo 8.32, 1 Pi 5.1, 1 Yo 3.18, 3 Yo 1

1:4: 3 Yo 3

1:5: Yo 13.34, 15.12, 15.17, 1 Pi 4.8, 1 Yo 2.7-8, 3.11, 3.23

1:6: Yo 14.15, 14.21, 1 Yo 2.5, 2.24, 5.3

1:7: 1 Yo 2.22, 4.1-3

1:8: Mg 10.29-30, Ga 3.4, Hi 10.32, 10.35

1:9: 1 Yo 2.23

1:10: Eb 5.11, 2 Te 3.6

1:12: Yo 17.13, 1 Yo 1.4, 3 Yo 13-14