3 Yone
Yonehanda beba tebone ogo Gaiasahondo gilibu wia hene
Mbuga ogoha gilibu ngarunaga nemandi ogo
Yonehanda beba tebone ogo gili binigo Keriso hameigini hearunaga haru haga mbira mini Gaiasahondo wia hene. Beba gili bialu howa Yone ibugua Gaiasahanda Keriso hameigini karu biamogo biagagonaga ibuhondo ka̱i̱ lene. Ka̱i̱ lowa lalu, Agali mbira mini Diodorebese nakarulape dege bialu kago de hondo igilo habe, lalu gilibu wia hene.
Bu̱lu̱ baga buwa kuni gilibu nga
1-4
Yonehanda bi ala lenego
5-8
Gaiasahondo ka̱i̱ lenego
9-10
Diodorebese ibu nakarulape bialu ka, lenego
11-12
Demidiriasa ibu bayale bialu ka, lenego
13-15
Lamaro bialu lenego
1
I̱ agali ala hene miniwi howa Gaiasa í̠hondo beba ogo gilibu wia haro. Ab 19.29, Lm 16.23, 1 Ko 1.14, 2 Yo 1
I̱ nenege turubi-o í̠naga dinini holene bayalehe kedagua í̠ warago nabe turu halu bayale dege habelo i̱na hamelo ko. Henene lolenehayagi haabo harilidagua mini bilinahe howa henene loleneyi haabo ke lalu Keriso hameigini marume ibuwa i̱ langiyagola hale howa turu timbuni ho ko. 2 Yo 4 Mbiralime lalu, Í̠ waneigini henene lolenehayagi anda pu haabo ka, laragola hale howa i̱ turu timbuni ho haruli. Turu holene ogonime turu holene bibahende bolangua haga nga. 1 Ko 4.15, Pm 10
Gaiasahondo ka̱i̱ lenego ogo
I̱ nenege turubi-o mini bilinahe howa Keriso hameiginiruhondo biamogo bigi bialu ti maru í̠ manda nabini hearubi biamogo bigi bialu kego nde baya hangu bialu kegoni laro. Ti o biarume Keriso hameigini oali ngoai ho kamaruhondo langialu lalu, Gaiasa ibu gubalini hagane agalioreya, lalu langiya. Ani langiyaru ti ibaga bialu poradagua pelonaga Ngode Datagaliwabe mo turu helo í̠na ti biamogo bibe. Ta 3.13 Tigua Kerisonaga Bi Mana Debene lama pole lowa wali agali Ngode Datagaliwabehondo mini mbiraore nawi hearume tihondo mbirale mbira milo henge nami wahalu piyiya. 1 Ko 9.12, 9.15 Ani biyagonaga ina Keriso hameigini kamarume ti heba henene lolenenaga biabe bimaga hole ti biamogo bulene nga.
Diodorebese ibu nakarulape bialu henego ogo
I̱na Keriso hameigini ngoai ho kamiruhondo beba mbira gilibu wia haru. Ani birugola Diodorebese ibugua ibuni mo haguane hoa howa i̱naga bi mo wahayiya. 10 Ibugua inanaga mini lalu wali agaliruhondo bi koorene kobi ke̱ holenebi laga bialu kago i̱ tí kamiria ibuwa ibugua mana ko ogoni biyagonaga tí manda biai halimulo i̱na latagi hai holebero. Ibugua ogoni hangu ndo biaga. Keriso hameigini marubi ibirangi ibugua, Ibirimida, lalu turu nahaga. Ani nabiaga howa wali agali marume ti ibiraruhondo, Andaga birule ibidaba, loa karu ti Keriso hameiginiru heba karia ibugua ti tagira pelo bo batagi hole manda biaga.
11 I̱ nenege turubi-o ko biaga karume biagadagua nabi bayale biaga karume biagadagua dege bialu habe. Wali agali bayale biaga karu ti Ngode Datagaliwabe aria ka. Ko biaga karume Ngode Datagaliwabe manda nabi ka. Iba 37.27, Ais 1.16-17, 1 Pi 3.11, 1 Yo 3.6-10
12 Wali agali bibahendeme Demidiriasa ibu bayale ogobiore ka lene haga. Ibugua henene lolenehayagi howa ibu henene loleneyi kagobi walia halu ka. Inamebi ibu de hondowa ibu ogobiore ka lene haramali. Í̠na nde inane laramago tigatiga laradalo manda bide. Yo 19.35, 21.24, 1 Ti 3.7
Lamaro bialu bi lenego ogo
13 Í̠hondo dewa lolene manda bia bidogo bebani gilibu wialu lowia hole hame nale ko. 2 Yo 12 14 Emene howa iyane dengui handaya hagabu howa bi la doba bibiya i̱na í̠ keria abale ibule kogo.
15 Mo palia holene í̠ha wiaabo helo hameledo. Iya nenege oali karu bibahendeme í̠hondo, Iname í̠ore mitangi bu kama, lalu lawia harama. Iya nenege í̠ kegoria karu bibahende hangu hanguhondo iname, Tí mitangi timbuni bu kama, larama laya lalu lamibe.

1:1: Ab 19.29, Lm 16.23, 1 Ko 1.14, 2 Yo 1

1:3: 2 Yo 4

1:4: 1 Ko 4.15, Pm 10

1:6: Ta 3.13

1:7: 1 Ko 9.12, 9.15

1:11: Iba 37.27, Ais 1.16-17, 1 Pi 3.11, 1 Yo 3.6-10

1:12: Yo 19.35, 21.24, 1 Ti 3.7

1:13: 2 Yo 12