8
1 Sibeni bo wahayagonaga Solohanda, Karulape birima, lo manda bini.✡ Ab 7.58, 8.4, 11.19, 22.20
Solohanda Keriso hameigini hearu mo tandaga henego ogo
Horo ogoningi howa Yasu mana yu tiga biaga Yarusalemeni hearu tandaga timbuniore nalu hene. Ti bibahende ibida pialu Yudiahabi Samariahabi purogo lene. Abosolo biaru ti dege pu nabi Yarusalemeni hondo hene. 2 Agali maru mini tigabiwi hearume dugu timbuni bialu Sibeninaga tingini hora hene.
3 Ani biyagola Solohanda Yasu mana yu tiga biaga bibahende biaru bo wahole manda bini. Ani manda buwa anda bibahendeha piai halu Yasu mana yu tiga biaga hearu wali agalibi gililo yalu tagira pialu garabaya andaha ba andanda bini.✡ Ab 9.1, 9.13, 9.21, 22.4-5, 26.9-11, 1 Ko 15.9, 1 Ti 1.13
Samaria wali agalihondo Bi Mana Debene laminigo ogo
4 Yasu mana yu tiga biaga biaru ibida purogo layarume Yasu mana lamima pene.✡ Md 10.23, Ab 6.5, 11.19 5 Pilibihanda Samaria dindini tano timbuni wiagoria puwa wali agali hearuhondo Mbirali Dabo Helene ibulebira lowinigo íbu ka lamialu hene. 6 Ani lamiyagola wali agali dewa hearume Pilibihanda agalime nabiagane ale biyago de handalu ibugua bi layago bayuwaore hale ho hene. 7 Dama dewa daraga hearia wara tagi haga biyagola ga̱ lalu tagira pugu bini. Wali agali kuduguhe wiarubi ge kohe hearubi mo dabi haga bini.✡ Md 10.1, Mg 16.17 8 Ani biyagola tano ogoriani wali agali hearu turu timbuni ho hene.
9 Dindi ogoriani agali gamuyi mbira mini Saimono henego ibugua gamu tara biaabo hayago hondowa Samaria wali agali hearume mogolo hene. Saimono ibugua, I̱ agali timbuniore kogoni, layagola howa 10 wali agali mini lenebi mini nalenebi ta nabi bibahende hearume ibugua bi layago bayuwa hale hene. Bibahende biarume lalu, Agali o biago Ngode Datagaliwabenaga hongo holene karulo kago mini Hongo Timbuni ibu kagoni, laga hene. 11 Saimono ibugua bambaore howa gamu tara biaabo hayago wali agali biarume mogo lowa ibugua bi layago tigua bayuwa hale hene. 12 Pilibihanda tihondo Ngode Datagaliwabehanda Handame Ho Kagonaga bi mana debenebi Yasu Keriso íbu ka lalubi lamiyagola tigua yu tiga biyagola wali agali uruni baboraya bini. 13 Saimono ibubi yu tiga biyagola baboraya bini. Baboraya buwa ibu Pilibiha hapara ho howa Pilibihanda nahendene alebi agalime nabiagane alebi biyagola hondowa Saimono ibu mogolo hene.
14 Samaria wali agalime Ngode Datagaliwabe bi mana yu tiga bu ka layago hale howa abosolo Yarusalemeni hayaru tigua Pida Yonelahondo, Libugua hondo pudaba, lene. 15 Ani layagola libu Samaria wali agali Yasu mana yu tiga bu hearu hearia puwa tiha Ngode Datagaliwabe Dinini helo libugua Ngode Datagaliwabehondo bi la hene.✡ Ab 2.38 16 Ala Ngode Datagaliwabe Dinini tiha hole nadali ti Anduane Homogo Yasunaga mini degeni baboraya bu hene.✡ Md 28.19, Ab 10.48, 19.2 17 Ngode Datagaliwabehondo bi la howa Pida Yonela libugua wali agali biarunaga haguaneni gi wiyagola Ngode Datagaliwabe Dinini tiha hole dalini.✡ Ab 6.6, 19.6, Hi 6.2
18 Abosolo biago labome wali agali haguaneni gi wiyagola Ngode Datagaliwabe Dinini tiha hole daliyago de hondowa Saimonohanda Pida Yonelahondo, Muni ngero, lalu, 19 I̱na i̱naga gime wali agali haguaneni werogola Ngode Datagaliwabe Dinini tiha hole dalilo hongo ogoni ngilibulo, lene.
20 Ani layagola Pidahanda ladai bialu lalu, Ngode Datagaliwabehanda turu howa bame ngirago munime mule manda birigo í̠bi í̠naga munibi libu haru heli dindi pilibulo.✡ Md 10.8, Ab 2.38, 10.45 21 Í̠naga bu mini tigabi ndo kego Ngode Datagaliwabehanda de hendedago biabe ogoni í̠naga ndogo í̠na bulene nawi.✡ Iba 78.37 22 Ko bulene manda birigonaga mini beregedalu Anduane Homogohanda domo wahelo ibuhondo bi labe.✡ Dan 4.27, 2 Ti 2.25 23 Dimagoli holene kaubime í̠ha to̱lai howa ko buleneme í̠ dariba ho ngago de hendedo, lalu Pidahanda lene.✡ Hi 12.15
24 Ani layagola Saimonohanda Pida Yonelahondo lalu, Bi larigonidagua i̱hondo nabilo Anduane Homogohondo i̱naga la hadaba, lene.✡ Har 8.8, Dag 21.7, 1 Kin 13.6, Ya 5.16
25 Pida Yonela libugua Yasu Kerisohanda libuhondo biyago te lamuwa Anduane Homogonaga mana lamialu Yarusaleme dai bini. Dai bialu howa Samaria dindiha tano emene dewaruni wali agali hearuhondo Bi Mana Debene lamigi bima dai bini.
Pilibihanda Idiobia agali mbirahondo Bi Mana Debene laminigo ogo
26 Anduane Homogonaga dahuliyali mbirame Pilibihondo lalu, Yarusaleme howa Gasa dindi pole hariga pedadagua unurahayagi pole manda bibe, lene. Hariga ogoni dindi ko wali agali nahagaha pole peda. 27-28 Ani layago hale howa Pilibihanda manda manda bialu pene. Hariga o pobe layagoriani pialu hearia Idiobiali mbira de hendene. Idiobiali o biagoni ibugua agali timbuni howa Idiobia Kuini wali mini Kandesi berenegonaga muni mbirale wiaru de hondo haga hene. Ibu Yarusalemeha Ngode Datagaliwabehondo bi lole penego karisini nogo hosime gili lagane wiagoria biralu dai bialu hearia Pilibi ibu de hendene. Idiobia agali biagome karisi ogoriani biralu pialu howa Ngode Datagaliwabenaga mana latagi haga Aisaiahanda mbugani bi gilibu winigo ibugua daga lama pialu hene.✡ Ais 56.3-7, Seb 3.10, Yo 12.20 29 Daga lama pialu hearia Ngode Datagaliwabe Dinini ibugua Pilibihondo lalu, Karisi kaware hapara halu poradagua pialu haruru pobe, lene. 30 Ani layagola Pilibi ibu gerai lalu karisi piyadagua kaware hapara howa haruru pialu Idiobia agali biagome Ngode Datagaliwabenaga mana latagi haga Aisaiahanda mbugani bi gilibu wini wiago daga layuagola hale hene. Hale howa Pilibihanda ibuhondo lalu, Bi daga laregoninaga irane manda bidebe, lene.
31 Ani layagola Idiobia agali biagome ladai bialu lalu, Mbiralime bi ogoninaga irane i̱ langi nabiyagua agua manda bibehe kobe, lene. Ani lowa ibugua Pilibihondo lalu, Iya mbaliya karisini birule iraga ha, lene.✡ Yo 16.13 32 Anduane Homogonaga mbugani bi gilibu wini ibugua daga layago ogo,
Ibu nogo sibi homelo bole haru poragolabi
nogo sibi igini ibunaga irini podaragolabi dembola ho hagadagua
ibu ema nabi bi nale hene.✡ Ais 53.7-8
33 Tigua ibu mo emene halu taga pani nelo ibunaga godi tigatiga la nahene.
Ibu dindini holene hamaro binigo
ibunaga aguanenenaga te aiwa labehe kabe,
lalu gilibu wini.
34 Hondo haga agali biagome Pilibihondo hale halu lalu, Ngode Datagaliwabe mana latagi haga ogonime bi o layadagoni ainaga lalu lenedabe. Ibuninaga lalu lenedabe be mendealinaga lalu lenedabe i̱ langi, lene. 35 Ani layagola agali biago ibuni Anduane Homogonaga mbugani bi daga layagoria howa Pilibihanda irane lamialu Yasunaga Bi Mana Debene marubi lamima pene.✡ Lg 24.27, Ab 18.28 36 Libu harigani pialu howa iba mbira bereagoha pialu hearia hondo haga biago ibugua lalu, Iba o bedagoniha baboraya bua kogo nabulene irane mbira ngabe, lene.✡ Ab 10.47
[ 37 Ani layagola Pilibihanda ladai bialu lalu, Í̠naga gubalinioreme Yasu Kerisohondo mini mbiraore wu keyagua baboraya bibehe kegoni, lene.
Ani layagola agali biagome lalu, E̱ mini mbiraore wu ko. Yasu Keriso ibu Ngode Datagaliwabe Iginiore kagoni manda buwa yu tiga bido, lene.]
38 Ani lowa hondo haga biago ibugua karisi yaga agalihondo, Hondo ha, lowa ibubi Pilibibi libu haru ibaha dalipe howa Pilibihanda ibu baboraya bia hene. 39 Libu ibaha howa iraga hayagola Anduane Homogo Dinini ibugua Pilibi abale minu yalu piyagola hondo haga agali biagome Pilibi lone de nahende howa ibu turu timbuniore hama pene.✡ 1 Kin 18.12, 2 Kin 2.16, Ese 3.12-14 40 Pilibihanda ibu Asododoni haruyane hondowa ibugua ibaga bialu tano bibahendeha Bi Mana Debene lamima pialu Sisaria tano anda pene.✡ Ab 21.8