1 Í̠na Sadisi tanoni Keriso hameigini karunaga dahuliyali kagohondo bi ogo gilibu wia habe.✡Mo 1.4, 1.16, 2.2, 5.6

I̱ Ngode Datagaliwabe Dinini karia haru kogobi yakundi karia yu kogobi i̱na bi ogo lo wia haro. Tígua ogodagua bialu kamigo manda bu ko. Tígua lalu, Ina dére mini lene kama, la laganegoyu i̱na tí homene kamigo manda bido. 2 Anigo tígua heyuwa mbirale emene yu kamigo homai nakaore mo hongo hadaba. Tígua biabe bialu harimiru i̱naga Ngode Datagaliwabe wanakuini howa bu maro nabi dege kami. 3 Mana tíhondo lawai hayagobi hale harimigobi mitangi bu dai buwa, Bilimu, layadagua bialu tínaga ko wahalu mini beregedadaba. Ani nabirimiyagua i̱na pageali ohowa ibagadagua ibalu tígua ibulebira manda nabi kamingiore ibulebero.✡Md 24.43-44, Lg 12.39-40, 1 Te 5.2, 5.6, 1 Ti 6.20, 2 Pi 3.10, Mo 2.5, 16.15 4 Ani anigo tí Sadisi tanoni kamiru mbira mbirame tínaga agani dodo para nahe harimigoni. Ai nde uruni tíore karulape howa aga pele mo karulalu i̱ heba ibaga bialu holeberami.✡Ab 1.15, Yu 23, Mo 6.11, 7.9, 7.13 5 Maru wayali ho karume aga pele ogonibi karulolebira. Anigo tinaga mini wali agali haabo holene yu karunaga mini mbugani gilibu ngagoria ngaru doma nabulebero. Uruni i̱ Ababi ibunaga dahuliyalirubi kagoria howa i̱na lalu, Ti i̱naga ka, lalu hale hai helo latagi holebero.✡Har 32.32-33, Iba 69.28, Md 10.32, Lg 10.20, 12.8, Pb 4.3, Mo 3.18, 19.8, 20.12

6 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haremine.

7 Í̠na Piladelebia tanoni Keriso hameigini karunaga dahuliyali kagohondo bi ogo gilibu wia habe.✡Yob 12.14, Ais 22.22, Lg 1.32, Ab 3.14, 1 Yo 5.20

I̱ mbirali baya buruguleorebi heneneorebi kogo i̱na bi ogo lo wia haro. Ibugua Debidinaga panga gi wiyago yu howa panga mbira duguaragola mbiralime payabe nahe halu ai ibugua panga biago payaragola mbiralime duguabe nahe holebira. 8 Tígua bialu haramiligo i̱ manda bu ko. Tí hongo emene yu kamigobi i̱naga mana lawai haruligodagua bialubi i̱hondo mini bilinahe harimigobi manda bu ko. I̱na tí buhayagi panga mbira dugua ho ngelarugo mbiralime payabe nahe.✡1 Ko 16.9, 2 Ko 2.12, Mo 2.2 9 Hale halimu. Wali agali dama Heyolabe aria mandagi haga ti Yuali ndo howa ke̱ halu, Ina Yuali kama, laga karu i̱na ti tínaga geha mo bulu palu helolebero. Ani berogola ti bibahendeme i̱na tí gubalini hagada manda bulebira.✡Ais 43.4, 45.14, 49.23, 60.14, Mo 2.9 10 I̱na tíhondo langialu, Ema nabi howa hibu lalimu, larugodagua wa nahe haabo harimigonaga wali agali bibahende ba hondole dindi bibahendeni mo ko holene ibirangi tí bayale halimulo mo wulebero.✡Ais 24.17, Lg 21.19, 2 Ti 2.12, 2 Pi 2.9 11 Emene howa i̱ abaleore ibulebero. Wayali holenenaga yu kamigo mbiralime page nabilo bayuwa yani ho halimu.✡Pb 4.5, Mo 2.10, 2.16, 2.25, 22.7, 22.12, 22.20 12 Wayali ho karu ti Ngode Datagaliwabenaga andaha anda gene helo i̱na mo helolebero. I̱na helaroru tigua wahalu tagira nape ha ho wulebira. I̱na Ngode Datagaliwabe minibi ibunaga tano dahuliya andagaha howa daluebirago Yarusaleme gahengenaga minibi o biaru tini gili bulebero. I̱na i̱ni mini gahenegebi tini gili bu wulebero.✡Ais 62.2, 65.15, Ese 48.35, Ga 2.9, 4.26, Hi 12.22, Mo 14.1, 21.2

13 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine.

14 Í̠na Leodisia tanoni Keriso hameigini karunaga dahuliyali kagohondo bi ogo gilibu wia habe.✡Min 8.22, Ais 65.16, 2 Ko 1.20, Kl 1.15, Mo 1.5, 19.11, 22.6

Walia hagane mini bilinahebi henenebi Aniore Biagane Tene i̱ kogo i̱ togoni howa Ngode Datagaliwabehanda bibahende wabinigo i̱nimeore bi ogo lo wia haro. 15 Tí bialu harimigo i̱ manda bu ko. Ani manda bu kogo tí áyu tambeheore ndo poboheorebi ndo hope ho kamigo tí pobeheoreyaguabi tambeheoreyaguabi mendego hangu habelo hame timbuni lo ko.✡Lm 12.11, Mo 2.2 16 Anigo tí dombeni hope ho kamigonaga i̱na i̱ ne harigaha howa tí magu tagu tagi holebero. 17 Tígua lalu, Ina karulape mbirale ngaru ale damene wiaihe homogo kamagoni, lalu kamigoni. Anidagua lalu ha kamigonigo ai tí nakarulapebi mini burugulebi kamigo tínime manda nabi kami. Tí yagibanobi tibabebi de kohebi kamigoni.✡Hos 12.8, Lg 12.21, 1 Ko 4.8 18 Anigo i̱na ogo bia laro. Tí homogo heneneore holenaga i̱ha howa ngolo bayaleore✡Ais 55.1, Md 13.44, 2 Ko 5.3, Ya 2.5, Mo 3.5, 4.4, 7.13, 16.15 helo irani delenego yolo bialu milimu. Ogoni hangu ndo tí taga howa tibabe harimigo yi hole aga peleore ngagobi yolo bialu karulalimu. Ani bialu tí de lone hondolenaga marasini deni ha̱i̱ hole yolo bialu ha̱i̱ halimu. 19 I̱na gubalini haruliruhondo talialu mini wilo mana laruli. Ani biruligo tí hope kamigo wahowa mini wialu ko ngagoria howa mini beregedalimu.✡Min 3.12, 1 Ko 11.32, Hi 12.6, Ya 1.12, Mo 2.5 20 Hale hadaba. I̱na panga tagirahayagi howa panga dugua lalu ko. Mbiralime i̱naga bi larogo hale halu panga duguayagua i̱ ibu andaga anda ibuwa i̱ ibula tomo nalu ibubi i̱la tomo nolebira.✡Lg 12.37, Yo 14.23, 1 Yo 2.24 21 Anigo i̱na wayali halu i̱ Abanaga handame ho biragane dagia ngagoriani ibula áyu bedodagua wali agali wayali hararu i̱na handame howa biragane dagia ngogoriani ti i̱ heba mandagi birulene henge tihondo mulebero.✡Md 19.28, Lg 22.30, 2 Ti 2.12, Mo 2.26-27

22 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine.