19
Ogoni hondowa mani hale halu hewaria bi timbuni wali agali dewaore laradagua bialu dahuliya andagani howa lalu, Pele mulenebi mini lene lolenebi hongo holenebi ina Ngode Datagaliwabenaga ngago ibunaga mini yaraga hama. Ibunaga daba ki bulene henenebi tiga tigabi ngagoria ibugua daba ki biaga ka. Ani biaga kago ibugua wali kayu biaga biago ibunaga kayu yuleneme dindini wali agali mo ko halu hayago pani tiga tiga mulene wiadagua miya. Wali ogoni ibugua Ngode Datagaliwabenaga biabe bia haga hearu homelo bayagonaga Ngode Datagaliwabehanda ibuhondo pani miya, laya. Man 32.43, 2 Kin 9.7, Mo 6.10, 15.3, 16.7, 18.20 Ani lowa tigua lone laraga halu lalu, Tano mini lene timbuni biago dayagonaga hagua iraga ha dege bidane iraga ha ho nga. Ani bidagonaga Ngode Datagaliwabenaga mini yaraga hama, lalu laya. Ais 34.10, Mo 14.11, 18.9, 18.18 Ani layagola dahuliyali haru haga pira kirani maria (24) biarubi holenehe maria helene biarubi tigua bulu palu ibira howa Ngode Datagaliwabe ibu ibunaga handame ho biragane dagiani bereagonaga mini yaraga halu lalu, Aniore bilo Ngode Datagaliwabenaga mini yaraga hama, laya. Neh 8.6, Mo 4.2-6, 4.10, 5.14
Nogo Sibi Igini dabu bulebiragonaga tomo nolene ngago ogo
Ogoni hale howa hale ha ho dege bialu hewaria bi mbira handame ho biragane dagia wiagoria howa lalu, Ngode Datagaliwabenaga biabe bia haga bibahenderubi wali agali emene timbunibi ibuhondo henene mitangi biaga bibahenderubi iname inanaga Ngode Datagaliwabe mini yaraga hama, layuago hale haru. Iba 22.23, 115.13, 134.1, 135.1, Mo 11.18, 20.12 Hale ha ho wiwaria dege wali agali dewalime bi laradagua bialubi iba pora bialu ue laradagua bialubi hari kilikulu laradagua bialubi layuagoha howa tigua lalu, Anduane Homogo inanaga Ngode Datagaliwabe Hongo Haiheore kago ibu Handame Haga Kiniore kagoni. Ani kago iname ibunaga mini yaraga hama. Iba 93.1, 97.1, 99.1, Ese 1.24, Mo 11.15-17, 14.2, 15.3, 21.2 Ani bidagonaga iname turu halu ka̱i̱ lowa ibu gibiore kagonaga mini yaraga hama. Nogo Sibi Igini biago dabu bulene tu halu dabu biagagome ibu dabu bilo lowa manda manda bu halu biyadagoni. Md 22.2, 25.10, Eb 5.32, Mo 21.2, 21.9 Wandari dabu bule biyagohondo aga labolabo pele dodo nahe demborerebi minigo bu ka, lalu layago hale haru. Aga labolabo ogoni Ngode Datagaliwabenaga wali agalirume mana bayale biniru lalu wini. Iba 45.13-14, Ais 61.10, Ese 16.10
Ogoni hale ho hewagola dahuliyali biagome i̱hondo lalu, Bi o larogo gili bia. Nogo Sibi Igini dabu biragonaga tomo nole ibalimu leneru ti turu ho holene nga, laya. Dahuliyali ogonime ani lowa latago halu lalu, Bi uruni Ngode Datagaliwabenaga bi heneneore nga, lalu langiya. Md 22.2-3, Lg 14.15-16, Mo 21.5
10 Ani langiyagola i̱na ibunaga geha duli hanga halu bulu paluwa ibuhondo lotu lolebiruria ibugua i̱hondo lalu, Ani nabibe. I̱ í̠bi hamene mbaliniru Yasuhanda mana henene mo pani hayago yani ho karubi aria biabe bia haga kogoni. Ani bidogo Ngode Datagaliwabe hangu mitangi bialu lotu lolene nga, laya. Ab 10.25-26, 1 Yo 5.10, Mo 22.6-9
Yasuhanda mana henene mo pani hayagome Ngode Datagaliwabe mana latagi haga karu mo mitangi bia haga.
Mbirali nogo hosi pagabuani biralu piagane heago ogo
11 Ogoni hale howa handalu hewaria dahuliya andaga dugua ho wiagoria nogo hosi pagabua mbira hearia handaru. Nogo hosi ogoriani biralu piagane heago ibu mini Bilinahebi Henenebi hea. Aniyago tiga tiga buleneme ibugua mo daba ki bialubi wai bialubi hagaya. Iba 96.13, Ais 11.4, Ese 1.1, Mo 1.5, 3.14, 6.2, 15.5 12 Ibunaga de ira hungu ale howa ibunaga haguaneni haru haga manda dewa bu heneya. Ibuni mini mbira gilibu wiago ogoninaga irane ogo aledalo mbiralime manda bibe nahe ibuni hangume manda bida. Dan 10.6, Mo 1.14, 2.17-18, 19.16 13 Ibuni aga lu karulo heago darama hirame heya. Ibuni mini wiago Ngode Datagaliwabenaga Bi wia. Ais 63.1-3, Yo 1.1, 1.14, 1 Yo 5.7-8 14 Dahuliya andanaga ami bu hearume aga labolabo pele dodo nahe buwa nogo hosi pagabua dewani biralu ibu piyadagua talima piya. Md 28.3, Mo 4.4, 7.9 15 Ibunaga ne harigaha howa wai biagane ayu tibu ne gadeleheore mbira tagira ibiragome wali agali dindi tara tarani bu karu bo hana halu wayali holebira. Ani buwa ibugua hongo taraore holene yu howa wali agali biaru haru holebira. Ani bialu Ngode Datagaliwabe Hongo Haiheore kagonaga keba gibi holene gerebi lini pingidagane ege to̱le̱ guabawa uliha howa waini iba ibilo hengedalu pingida tagi holebira. Iba 2.9, Ais 63.3, Yol 3.13, 2 Te 2.8, Mo 1.16, 2.27, 4.8, 12.5, 14.19-20 16 Ibunaga aga luninibi ge mbarianenibi mini ogodagua gilibu wia, Kini bibahende karunaga Handame Haga Kinibi anduane homogo bibahende karunaga Anduane Homogoorebi i̱ kogoni, lalu gilibu wiago handaru. 1 Ti 6.15, Mo 17.14, 19.12
17 O handarudagoni hondowa handalu hewaria dahuliyali mbira nini heyu hearia handaru. Heyu howa ibugua ega yagalo yu ibaga bu hearu bibahendehondo bi laraga halu lalu, Ngode Datagaliwabenaga tomo timbuni nolene ngago nole mo mogo bu hole ibidaba. 18 Tígua ibuwa kinirunaga tinginibi ami haru haga haguanerunaga tinginibi ami agalirunaga tinginibi nogo hosirunaga tinginibi nogo hosini biralu piagarunaga tinginibi wali agali garabaya biabe ale bia hagarunagabi nabinirunagabi timbunirunagabi emenerunagabi uruni bibahendenaga tingini nole ibidaba, lalu laya. Ese 39.17-20
19 Handa dege bialu hewaria nogo tara biagobi dindinaga kinirubi tinaga ami agalirubi mo mogo buwa tigua mbirali nogo hosini biralu piaga biagobi ibunaga amirubi baba wai bulebiya. Iba 2.2, Mo 16.16, 17.13-14 20 Ani bule biyagola nogo gabua gibi biagobi ibunaga wanakuini howa mana henene ngadagua ndo latagi haga agalime nabiagane ale biyago ibubi minaya. Mana henene ngadagua ndo latagi haga biago ibugua agalime nabiagane ale biyarume nogo gabua gibi biagonaga magihe hayarubi wali agali nogo gabua gibi ogoni ibuni kagobi wabu wiyagohondo bi pupu wiaga hayarubi ti mo hondo haya. Nogo tara ogonibi mana henene ngadagua ndo latagi haga biagobi minayadagoni minuwa ira hungu bialu ege to̱le̱ ale mini salobame da ho wiagoria ti dére minu bape haya. Ais 30.33, Dan 7.11, Mo 13.1-18, 14.10, 16.13-14, 20.10, 20.15 21 Mbirali nogo hosini biralu piaga biagonaga ne harigaha howa wai biagane ayu tibu mbira tagira ibiyagome tinaga ami agaliru bo home lai haya. Ani biyagola ega bibahendeme ibuwa tingini uruni nalu nabe manga haya. Mo 17.16, 19.15-18

19:2: Man 32.43, 2 Kin 9.7, Mo 6.10, 15.3, 16.7, 18.20

19:3: Ais 34.10, Mo 14.11, 18.9, 18.18

19:4: Neh 8.6, Mo 4.2-6, 4.10, 5.14

19:5: Iba 22.23, 115.13, 134.1, 135.1, Mo 11.18, 20.12

19:6: Iba 93.1, 97.1, 99.1, Ese 1.24, Mo 11.15-17, 14.2, 15.3, 21.2

19:7: Md 22.2, 25.10, Eb 5.32, Mo 21.2, 21.9

19:8: Iba 45.13-14, Ais 61.10, Ese 16.10

19:9: Md 22.2-3, Lg 14.15-16, Mo 21.5

19:10: Ab 10.25-26, 1 Yo 5.10, Mo 22.6-9

19:11: Iba 96.13, Ais 11.4, Ese 1.1, Mo 1.5, 3.14, 6.2, 15.5

19:12: Dan 10.6, Mo 1.14, 2.17-18, 19.16

19:13: Ais 63.1-3, Yo 1.1, 1.14, 1 Yo 5.7-8

19:14: Md 28.3, Mo 4.4, 7.9

19:15: Iba 2.9, Ais 63.3, Yol 3.13, 2 Te 2.8, Mo 1.16, 2.27, 4.8, 12.5, 14.19-20

19:16: 1 Ti 6.15, Mo 17.14, 19.12

19:18: Ese 39.17-20

19:19: Iba 2.2, Mo 16.16, 17.13-14

19:20: Ais 30.33, Dan 7.11, Mo 13.1-18, 14.10, 16.13-14, 20.10, 20.15

19:21: Mo 17.16, 19.15-18