Malakai
Anututagän nadäŋ imikinik täneŋta man
2
Malakai 2:1-10
Yawetä bämop äma jukuman yäwetkuk
Yawe kehäromi mähemitä bämop äma ŋode yäwetkuk; Man kehäromi yäwayäŋ täyat uwä intä nadäkta. * Sam 81:11-12 Piä täk täkaŋ u kudup terak wäpna biŋam punin peneŋ. Manna nämo nadäŋ namiŋpäŋ ärowani täŋ naminayäŋ täŋo uwä in api täŋpa waneŋ. Ba iron, täŋ-mehamtaŋ tamikta yäpmäk täkaŋ u imaka, api täŋpa waneŋ. Bureni, manna nadäŋ äwaräkuk täŋkuŋo unita imaka tägajin uku täŋpa waŋkuŋ! Unita nanakjiyeta komi api yämet. Ba tom ärawata ijiŋ namani täŋo kok yäpmäŋpäŋ iŋamjin dapunken api wopet. Ude täŋ tamiŋira kokjiraŋ ukät in bok api täŋureŋ täŋpä kuneŋ. * Nam 3:11-13 Ude täŋ tamiŋira ŋode api nadäneŋ; Man kehäromi niwetkuko u Yawe kehäromi mähemitä ini bämop äma wäpi Livaikät topmäk-topmäk bian täŋkuko u nämo wärämutpäŋ irepmitneta niwetkuk yäŋ nadäneŋ.
* Nam 25:12 Topmäk-topmäk Livaikät täŋkuro uterak irit käroŋi säkgämän itta yäŋtäreŋ imiŋkut. Ude yäŋtäreŋ imiŋkuro unita gämotnakengän itpäŋ naniŋ oretta yäwani. U bureni, gämotnakengän itpäŋ oraŋ namiŋpäŋ kuŋatkuk. U ämawebe kädet siwoŋi täŋpeŋ kuŋattagän yäwetpäŋ yäwoŋäreŋkuk. Täŋkaŋ kädet waki täkta kubä nämo yäwetpäŋ yäwoŋäreŋkuk. Ude täŋkuko unita näkkät bänep kubägän itpäŋ siwoŋi kuŋatkaŋ ämawebe mäyap kädet waki mäde ut yämikta täŋkentäŋ yämiŋkuk. * 2Ti 2:24-25; 2Ko 5:20; 1Te 4:8 U imata, bämop äma täŋo piä uwä ämawebe näkŋo mebäri siwoŋi nadäwä tumäkta yäwetpäŋ yäwoŋärek täneŋ. Uwä Yawe kehäromi mähemi näkŋo man yäŋahäwani äma unita ämawebetä näkŋo gärip kaŋpäŋ nadäkta bämop äma uken kuneŋ.
* Mat 15:2-5, 18:7; Luk 11:46; Rom 2:19-24, 14:21; Tai 2:8 Upäŋkaŋ bämop äma apiŋo nanik in uwä näkŋo kädet siwoŋi u irepmit morekaŋ. Täŋkaŋ nadäk mebäri mebäri terak yäwetpäŋ yäwoŋärek täŋirä ämawebe mäyaptä kädet siwoŋi nämo iwatkaŋ. Bureni-inik, orajin Livaikät topmäk-topmäk täŋkuro u wärämutpäŋ irepmit morekaŋ. Yawe kehäromi mähemi näkä ude yäyat. In näkŋo man nämo buramik täkaŋ. Täŋkaŋ ämawebenaye yäwetpäŋ yäwoŋärek täk täkaŋken uken ŋode täk täkaŋ; Ätu gärak itkaŋ ätuwä yabäŋ yäk täkaŋ. Ude täk täkaŋ unita näkä Isrel äbot u täŋpewa inta nadäwä äpani täŋpäpäŋ mäde api ut tamineŋ.
10 Nadäkaŋ? Nin kuduptagän nanin kubägän. Anutu täŋpäŋ nipmaŋpani kubä ugän. Upäŋ jide unita notniyekät kowat nadäŋ imän tänaŋipäŋ nadäŋ äwaräkuk täk täkamäŋ? Ude täk täkamäŋ uwä topmäk-topmäk Anututä oraniyekät täŋkuko u wärämutpäŋ irepmit täkamäŋ.

*2:2: Sam 81:11-12

*2:4: Nam 3:11-13

*2:5: Nam 25:12

*2:7: 2Ti 2:24-25; 2Ko 5:20; 1Te 4:8

*2:8: Mat 15:2-5, 18:7; Luk 11:46; Rom 2:19-24, 14:21; Tai 2:8