Paul di ouresi bura
Timothy
rofu
Ago di ini adina
Timothy bi Asia keika ekalesia amiye ruaka yokoi. Ini nono bi Jew rema ma ini baba bi Greek amiye. Ina bi Paul di asini ma ini moimairi ini aedena amiye yokoi niyo. Paul di ouresi bura Timothy rofu bi ini ago tora regodenu nufa.
Ini ouresi ago bi duburi ofa ofa nioteimana ago fafau ago gira mana. Mina nioteimana ago bi Jew vene ma tutubena idana vene di sina sina bedakai. Ini mokena bi roaitari, mina kono bi no ma amiye yokoi moi vegu rigi anua rego; nisui nina mokena vabara akeke, o iruku be goro rena o mena de rena dudu maka moi vegu rigo. Mina bura rena ka bi ekalesia vene ourefeidena ma Sei nivakena ni mama ago nufa. Ini ago bi ekalesia vene di ourefeidena vene ma aedena vene di vegu bi gokai reyaganedi. Metona agori, bi Timothy rofu, Iesu Keriso di naivo redo amiye buni, gokai kana ma ini moimai mokena vari gira aededi vene bouna bouna rofu bi gokai kana mina ni mama reyo.
Beika sina ideri
Ago di ini adina 1.1–2
Ni mama rena ago dubu ma ini ourefeidena vene dada 1.3—3.16
Ni mama rena ago Timothy rofu ini moimai dada 4.1—6.21
1
Na Paul, Iesu Keriso di nifeidena amiye, Sei una moi vegu rina amiye ma Iesu Keriso na rofu uka mokena di ago gira maro, mina ya rofu bura reida.
Timothy, mokena vari gira aenari nai mida rama iniye, ya rofu bura reida: Acts 16.1
Baba Sei ma Iesu Keriso uni Varika amiye yaku buni tora gade, iriyeduka ma uka amuta ya maragane.
Ago gira ofa ofa oteimana ago dada
Macedonia urana bogamakari, ya egira regi niyaka kana, Ephesus ri, amesi amiye bedakai bi ekalesia oteimana ofa ago oteimadedi, mina biri riyaganedi ina rofu ago gira ma. Ka bi sisina sina ma bobada vene di roka maina maina rena sina ga mokeyaganedi. Adina mina bi tavoi tavoi rena di kayamo moi vata ridedi ma Sei di moimai mokena vari gira aena dudu bi koina. Idu mina ni mama rena ago di ida bi uka mana uka kino yokoi de nufa gutuna, uka di mokena buni iniye ma mokena vari gira aena rama mini. Makai kana, bedakai vene yaku mina vegu buni fufuta masi tavoi resi nidodi rena ago rofu orefaradi. Ina ura rededi bi Sei di ago gira oteimana vene di moimai regedi, idu beika ago nisi mokededi bi rama iniye bi mina fafau ada yora de.
Ye amiye yokoi yaku ida ramari ago gira neidego vonisi, una una diba mina ago gira bi buni. Yomakai diba nisifa bi ago gira bi mokena rorobo vene rofu de maro, idu ago gira de neidena vene, ago obe rededi vene, Sei kana de vegu rena vene ma vegu no rena vene rofu. Bi kikifa de vene, kino nufa vene, iniye ini nono baba umuyena vene ma amiye umuyena vene rofu. 10 Bi koa rena vene, rumana iniye iniye koa rena vene, amiye moi gira resi sero regi vene, ofa nina vene, kota ideri ofa sina nina vene ma beika baika bi oteimana ago rama rofu de rededi vene rofu. 11 Mina oteimana ago bi Sei buni tora gade mana di ago buni di vabara dudu; ina yaku mina ago na nimaro.
Sei di iriyeduka rofu buni tora gade mana
12 Na bi uni Varika amiye Iesu Keriso rofu buni tora gade maida, kaere bi yeiva na maro. Adina ina yaku mokesi bi mokena vari gira na rofu aego, mina naivo regi na auba reyo. 13 Idu sena na bi Keriso di roka moi no risi esika esika masi nifafana regamaka. Idu Sei yaku na iriyeduka reyo, adina mokena vari gira de aena dudu, beika regamaka mina diba de niyaka. Acts 8.3; 9.4–5 14 Ye Iesu Keriso dudu, mokena vari gira aena ma uka mana dudu, uni Varika amiye di buni tora gade na mai vau reyo. 15 Iesu Keriso bi vegu no rededi vene moi vegu rigika kono tora noibanuri deyo; mina ago rofu mokena vari gira aesi ni vau rei masifa bi rama, ma na bi vegu no iniye rena amiye, amiye idana de kana mini. 16 Idu Sei yaku na iriyeduka reyo, ini adina bi yomini: vegu no iniye rena amiye kana, Iesu Keriso, bi nai ideri ini toro rei mona rena moi ogau rigo, ye makai dudu toga toga ameibobina vegu fafau, amiye yaku mokena vari gira ina rofu aegedi. 17 Ye gua toga toga amedo Kini, kaere muyena de rego, de vesifa ma ina maka bi* Bura bedakai ka mokena vabara nufa di nufa. Sei—kikifa rena ma vabara ina rofu toga toga maraine! Rama.
18 Timothy nai mida, mina ago gira ya maraka bi Sei di ago senagi ya dada niyadi kana, ye makai no rofu ruda buni resi 19 mokena vari gira aena ma uka di mokena buni iniye moi gira ri. Bedakai mina fufuta maradi dudu, bouti davarari rabema tagi masi tomu niyo kana, ini mokena vari gira aena moi no riyadi. 20 Mina kana reyadi vene di fogori bi Hymenaus ma Alexander, kaere bi Satani di vanari aeyaka, Sei di roka dudusa moi no ga riyaganedi, mina diba nigedi.

1:2: Acts 16.1

1:13: Acts 8.3; 9.4–5

*1:17: Bura bedakai ka mokena vabara nufa di nufa.