1 Mina usi, omari ida vena eboka reyo ma veyaka. Ouresi neideyaka goroka yaku bi kibi kana na rofu ago nigasa niyo, “Yominari bae, beika mina usi gabi vata nigedi ya nioteimagida.” 2 Minari maka Vima na ourefeidegi na fafau deyo. Ye omari bi ourefeidena amena fata ma amiye yokoi odoro ameinu reyo ma veyaka.✡Ezek 1.26–28; 10.1 3 Ye mina ameyo amiye di ne uruma bi fore buni roka jasper*jasper: Mina bi vegu o koru kana. ma carnelian†carnelian: Mina bi kaka kiki. kana. Daiduari fore buni roka emerald‡emerald: Mina bi vegu kiki. kana ini ourefeidena amena fata buru riyo. 4 Ma ourefeidena amena fata 24 mina ourefeidena amena fata yokoi buru riyadi. Amiye tora 24 mina odorori ameinu regasa varuka feyo akugamadi, ma ini ada odorori bi goro nufa kini kana ada bou. 5 Kamini mina ourefeidena amena fata yokoi gutuna ayena ma ofu kukuroka yakugamadi ma ini budari ita keroko 7 origamadi; mina bi Sei di vima 7.✡Ex 19.16; Ezek 1.13; Zech 4.2; Rev 1.4; 8.5; 11.19; 16.18 6 Ourefeidena amena fata di budari ka bi garasi davara kana, neva dabu dabu ma garasi rama guta kana.✡Ezek 1.5–10, 22; 10.14

Ye vegu amededi vibani 4 ourefeidena amena fata di berou berou eta rofu are resi buru riyadi; ini nemoko tau ini budari kana ka ini fufutari. 7 Ouresi vegu amedo vibani bi lion kana, ma usi bi boromakau mida kana, ma regode di ne uruma bi amiye kana, ma yokoi bi fururu nido dumo kana. 8 Mina vegu amededi vibani 4, ina yokoi yokoi ini eta 6 ma ini ideri ma ini etofarori nemoko tau yaku bou riyadi. Ariri ma urusari toga toga nigi ferena de regamadi:✡Is 6.2–3; Ezek 1.18; 10.12

9 Kamini vegu amededi vene ourefeidena amena fata ameinu regamo amiye, kaere bi toga toga amedo, ina rofu vabara, kikifa rena ma buni tora gade magamadiri, 10 mina tora vene 24 ourefeidena amena sana ameinu regamo amiye, kaere toga toga amedo di budari nivakesi ini kini kana, ada bou ourefeidena amena sana di budari aegasa nigamadi: