1 Amiye tau dudusa nioteima kumo ourefeidena vene ma gavamani vene di vava gabireri amesi ini ago neidegasa moi gira risi beika moimai buni maka regika amebiyagane. 2 Resi amiye rofu nifafana rena de, idu amiyesa ave nisi auta regasa amena maka rebiyagane, ye mina vegu rama amiye rofu reisa bi amiye oteimago ya bi gokai kana amiye. 3 Una ka sena bi mokena buni yokoi de, ago neidena de, dona auna di moke moke resi ofarosi regamadi ma roaita moi ada regika vegu no yaku una ourefeidegamo. Ma uni mokena no masi amiye be rofu ka maunu nigamafa. Resi amiye be rofu gubuyo resi uniye uniye ka gubuyo regamafa. 4 Idu, uni moi vegu rina amiye, Sei di mokei tora rena ma uka mana amiye rofu di bae ogau niyori, 5 vegu buni ma mokena rorobo reyafa dada, una moi vegu rina de reyo, idu ini uka iriyeduka dudu, bi una moi vegu riyo. Vima kikifa di vava dudu una koiteyo, ma dudusa vata nisi ruaka niyafa, makai dudu una moi vegu riyo. 6 Iesu Keriso uni Moi vegu rina amiye yaku beika reyo dada, Sei yaku ini uka noibanu dudu, ini Vima kikifa una fafau moi urafo reyo. 7 Ye makai dudu, uni vegu bi rorobo niyo, ini buni tora gade dada, ma toga toga ameibobina vegu di uka mokena moinari, bi ini mida mida nigifa. 8 Mina sina bi rama sina.

Gua ura reida ya bi mina sina besa ni, ye kaere Sei rofu mokena vari gira aeyadi vene bi mokena buni dudu, vegu buni kimo rebigedi. Amiye rofu mina moimai buni di sina bi buni ma amiye tau bi ina dudu buni baku regedi. 9 Idu deda kayamo, tutubena ini vata ni baeyadi sina, ita rafu sina ma Jew vene di ago gira dada kayamo rededi mina fere, adina mina sina tau bi beika buni yokoi de rigo ma buni yokoi de moi vata rigo. 10 Ekalesia vene moi etagae risi nanaka redo amiye bi ouresi ago gira ni; ya neidena de regori, bi dudusa ago gira ni. Mina de ya neidegori, bi kaini ferei tavoi re. 11 Minari mamo vei mama regiya mina amiye bi mokena buni feresi vegu no redo amiye; vegu no redo dada, iniye di no yaku moiyo.

12 Artemas o Tychicus ya rofu nifeidegidari, ya bi ida maina resi na rofu Nicopolis taoniri bae, adina mina avari bi mironari amegida mina mokeida.✡Acts 20.4; Eph 6.21–22; Col 4.7–8; 2 Tim 4.12 13 Zenas, kaere bi ago gira oteimana amiye, ma Apollos yaku ini dibo regika regediri, moi aede kumo gugura moi mona reyagane.✡Acts 18.24; 1 Cor 16.12 14 Uni vene moimai buni di mokena moi gira risi ari neinei di gugura fore moi negau risi vare tavoi amei tavoi bi ga reyaganedi.

15 Amiye tau nasa yaku ini yuata ya rofu ka nifeidededi. Kaere vakoi mokena vari gira aeyafa ma una uka madedi, ka yuata nifeidesifa.

Sei di buni tora gade iniye bi ya vene tausa ameyaine.