1 Pita
Lovoang Avot At Ne Pita
Levelinga Loklox Axasep
Lamaares 65 A.D.
Pita ga malagan i na lovoang la na lovoang gat pas tinedi limixin nunu mo diga epeseves at lengkot axap at lavatbung menemen. Na limixin nunu diga nemen at lengkot petpes ngan limixin me xadiong. Ise ne Pita gak lok to Rom, neni ga malagan i na lovoang. Limixin nunu diga ekip tangarang mi lentaba leveloklox asongot boro at lagavaman boro Rom mumu lumumu asu atdi ti ne Iesu Karisito. Pita ga vara i xusu na lox alolos di kusu dina tu atmatkun keneng at lununu atdi. Pita ga vaase aronga bok di mumu loklox arooro atnedi, la mumu bok ne Iesu la dina tu atmatkun amisik at levenmumuat kerepmo, la mumu bok lomlong at ne Iesu, kusu nedi diba doma mumu i na lempanga. Neni ga vaase aronga bok di mi leventaangas i nunuan ua ik mokso xusu ti limixin nunu at ne Iesu Karisito dina mu asu i.
Lengkot silok keneng at na lovoang
1:1-2 Lempapaase momo.
1:3-12 Lavapaase axasep mumu loklox arooro at ne Moroa.
1:13–2:10 Lixitkis atdik eburu mi ne Moroa.
2:11–3:12 Lorooro at limixin nunu.
3:13–4:19 Ataba ekip tangarang mi levesongsongot mumu lununu atnedik.
5:1-9 Lentaba lempapaase bok mumu limixin nunu.
5:10-14 Loklox anarong la lavapaase abeese.
1
Lavapaase Axasep
* Je 1:1; 2 Ti 1:15Nenia ne Pita lun pavang at ne Iesu Karisito. Nia a malagan na lovoang tinemi limixin soksoxolik at ne Moroa. Mi lok ngan limixin kadiong ti na lavatbung menemen la mik lox epeseves to at levennep taba ro Pontas, Galesia, Kapadosia, Asia, la Bitinia. * Ro 8:29; 2 Ts 2:13; Ib 12:24Ganoxa, Moroa ne Temen dik ga doxoma ali i do ni na soxolik ka nimi ngan limixin teren la na lox adadat nemi mi Loroonan Kaala ren, kusu minaba ronga res at ne Iesu Karisito, la neni naba lox adadat nemi mi lada ren.
Letaba nabalamu ren la lenmila na umsu xeneng at lorooro atnemi.
Lodoxoma Voovo
* 2 Ko 1:3Leemi asu ri ne Moroa neni ne Temen Leeme Silok atnedik ne Iesu Karisito, mumu mun lebelen tuntun silok teren tinedik. Neni ga lox arooro xaka amlong ne Iesu Karisito basinge lanmet kusu ti raba nedik mi lorooro maxat. La nai, ik suxa nedik mi lodoxoma voovo ri lorooro avolo. * Kl 1:12La nedik ta epovo xusu tana ven tu at laaleng ua tanaba lok kaka levenapnovos at leveloklox anarong no ne Moroa i gagas li i ri limixin teren to vana at laxalibet, kusu mo leveloklox anarong noxo lok kapmek la na xap gamasa.
* Jo 10:28; 17:11La ne Moroa i gagas li i rinemi limixin nunu la neni ik lok tatao nemi mi lolos teren kusu ti loklox arooro, mo ne Moroa naba lox asuvos i at laxavaxap at na lavatbung menemen. * 1 Pi 5:10; Je 1:2La mik lok momo aleng at na lavanga, keke i do mi ekip tangarang lixilik bok be mi tavanga i lox abulu nemi mumu buaang leveloklok tong pen ik lox asongot nemi. * Jop 23:10; Ler 17:3; Ais 48:10; Sak 13:9; Mal 3:3; Je 1:3Ketla anaa levempanga it pot ti lox asuusu mun i do lununu atnemi i lolos. I ngan bok leven gol ni i epovo xusu dina lok kapmex i, din tin tong pen box i ro at laxao. La lununu atnemi, neni lavanga i silok aleng ti logol, neni dinaba lok tong pen i xusu ti long lenget ka i do i lolos kopla kopmen. Melemu minaba ruuna ka leemi asu, la lasinorong eburu mi loklok ngangao at laaleng ne Iesu Karisito naba ru asuvos.
* Jo 20:29; 2 Ko 5:7Nemi xovisi mina ven tu ren, ketla mi vara aleng i. La monga mixo ven tu ren, ketla mi nunu ren. La mi umsu mi lomomo i silok aleng, la neni mo lomomo nenia axo epovo xusu ana mii poovo i mi tepanga, mila i silok aleng tinotno. * Ro 6:22Lavasuun teren keretna, nemi min tuuna xaka loklox arooro xeneng at labaroonan atnemi, mumu mun lununu atnemi saparav i.
10  * Mt 13:16-17La luvuttadi vapaase ali diga terea mumu avukat tinotno levelinga mumu mun i na loklox arooro. Nedi diga vaase ali mi letaba nabalamu no ne Moroa im taba nemi min. 11  * Sam 22; Ais 53; Lu 24:26-27Diga puse i xusu dinaklen kaka rinotno loxonaleng at lovotpot at ne Karisito la naba vot kereva. La digam doma vupuse do Loroonan at ne Karisito no gak lok keneng atnedi, ga paase ali mi levesongsongot ne Karisito naba ekip tangarang min. Neni naba ru pavaa mo levesongsongot, la melemu ren neni naba lok kaka langsangan lisisixam. 12  * Ep 3:10Ne Moroa ga raba asu na levelinga rinedi na luvuttadi vapaase ali xusu nedi di noxo gugu xusuk tik lok tooro nedi xa, ketla ti lok tooro nemi, at loxonaleng diga vaase mumu mo levelinga. Anaa nemi mira ronga xaka vam i at luvuttadi xipkip linga di vaase asu Lagale Lavavang mi lolos at Loroonan Kaala boro vana at laxalibet. Neni na Lagale Lavavang lubung angelo bok di vara aleng i xusu dinaklen i.
Lavapaase Asu At Lixitkis Kaala
13 Kuren la mina lox agagas levendoxoma atnemi ri lok mo levempanga ne Moroa i vara i. Mina lok tatao avukat luruptuvuk atnimi la mina lok li axap levendoxoma atnemi pana at lorooro avolo, no minaba lok ka i at laaleng ne Iesu Karisito na ru asuvos. 14  * Ro 12:2; Ep 2:3; 4:17-18Minang tonga res at ne Moroa, la nemen gat mi gutam lomlong ti mo lavavara xapmek miga ruuna i gano at levenaleng migak lok at larangtangku. 15 La levempanga minak lox i, minak lox i eburu mi lorooro axap atnemi nan manton tino. Atla ne Moroa neni ga ro xaka nemi, neni in manton tino. 16  * Mas 11:44-45; Mt 5:48I ngan Lovoang Kaala i vaase xeretna, “Mina lok ka loklok in manton tino mila nenia an manton tino.”
17  * Mt 6:9; Ro 2:11; 2 Ti 4:14; Li 2:23La minaklen i do ne Temen nemi no vana at laxalibet, no nemi mi ngising tin, neni i viila mumu luruptuvuk at limixin la i viila mumu loklok atdi mi legesampoovo mun. Kuren la mina raba axap lorooro atnemi at na lavatbung menemen eburu mi loklok ngangao saparav i. 18  * 1 Ko 6:20La nemi miklen luunun, ne Moroa ga un kaka amlong nemi min basinge lorooro etaba ga ravasu at lavalabat atnemi. La mo luunun ixo epovo xusu tara na lok kapmex i, ngan lisiliva xopla logol. 19  * Gu 20:28; Ib 9:12-14; 1 Pi 1:2Ketla ne Moroa ga un ka nemi mi lada, ni luunun silok at ne Karisito kopmen taxakapmek teren la kopmen bok tibira at Lanasip at ne Moroa.
20  * Gu 2:23; Ep 1:4Avot ti luruntudum li at na lavatbung menemen, Moroa ga soxolik ka i xusu ti lok lugugu ren la neni ga ravasu at na levenaleng kavaxap kusu ti lok tooro nemi. 21  * Jo 14:6; Ro 4:24; 5:1-2; 10:9La at na mun langas neni ga lox i la nemi mira nunu at ne Moroa, no ga lox arooro amlong i at lanmet la ga raba box i mi laasen silok. Kuren la lununu atnemi la levendoxoma voovo atnemi i tu rinotno at ne Moroa.
22  * Jo 13:34; Ro 12:10La monga, mira ronga ka vam levelinga ruturun la kerepmo lorooro atnemi ira dadat pam la labalamu ruturun i ravasu at lorooro atnimi ti luvutneton nimi. Kuren la mina ebalamu ela mi lorooro axap atnemi. 23  * Jo 1:13; Ib 4:12Mila miga ruuna xaka livipisik amaxat la na lorooro maxat noxo xap ngan laradi at na lavatkangka, ketla naba nemen amisik. Na lorooro ga ravasu at levelinga at ne Moroa la na levelinga i rooro la naba nemen amisik. 24  * Je 1:10-11I ngan Lovoang Kaala i vaase xeretna,
“Limixin axap di noxo nemen abao ngan levempivilis. La lampeneves atnedi na xap ngan levempusuvus aaxa. Levempivilis naba mang, la levempusuvus naba subu su. 25 Ketla levelinga at Leeme Silok, ne Moroa ik lox amisik la kopmen taxavaxap teren.” Ais 40:6-8
Na levelinga neni Lagale Lavavang nemi miga ronga xaka i.

*1:1: Je 1:1; 2 Ti 1:15

*1:2: Ro 8:29; 2 Ts 2:13; Ib 12:24

*1:3: 2 Ko 1:3

*1:4: Kl 1:12

*1:5: Jo 10:28; 17:11

*1:6: 1 Pi 5:10; Je 1:2

*1:7: Jop 23:10; Ler 17:3; Ais 48:10; Sak 13:9; Mal 3:3; Je 1:3

*1:8: Jo 20:29; 2 Ko 5:7

*1:9: Ro 6:22

*1:10: Mt 13:16-17

*1:11: Sam 22; Ais 53; Lu 24:26-27

*1:12: Ep 3:10

*1:14: Ro 12:2; Ep 2:3; 4:17-18

*1:16: Mas 11:44-45; Mt 5:48

*1:17: Mt 6:9; Ro 2:11; 2 Ti 4:14; Li 2:23

*1:18: 1 Ko 6:20

*1:19: Gu 20:28; Ib 9:12-14; 1 Pi 1:2

*1:20: Gu 2:23; Ep 1:4

*1:21: Jo 14:6; Ro 4:24; 5:1-2; 10:9

*1:22: Jo 13:34; Ro 12:10

*1:23: Jo 1:13; Ib 4:12

*1:24: Je 1:10-11