12
Maria Ga Gos Luxangkedek At Ne Iesu Ro Beteni
(Mt 26:6-13; Mk 14:3-9; Lu 7:37-38)
* Jo 11:1,43At lavanna aleng avot ti leluxa at Lovovolo Pe, Iesu gat pas uto Beteni, mo lemenemen ne Lasaro gak lox e. Ni laradi ne Iesu ga lox arooro amlong i basinge lanmet. * Lu 10:40Limixin at ne Lasaro diga lox agagas li leveluxa rin go, la ne Mata ga raba luxa di, la ne Lasaro la leventaba luvuttadi bok diga anan eburu mi ne Iesu. * Lu 7:37-38La ne Maria ga lok ka lubuxom* Na lubuxom tuntu diga xovox i mi luuat bunbun. ga umsu mi laxadan mavak, laasen teren naat. Mo laxadan somavak luunun teren ga silok aleng. La neni ga soli i ro at luxangkedek at ne Iesu, la ga ves amesemes i mi lavatkabinim at lavatlak teren. Losomavak at na laxadan ga umsu go xeneng ap mo loogu.
* Jo 18:3La lara lun pinivu at ne Iesu, ne Judas Iskariot, neni mo lara ga song araba ne Iesu ri limixin kakapmek, ga lok keretna, * Mt 19:21“Kereva, ixo epovo dina sesep mi na laxadan mavak la naba epovo at lavantun sangaun kobot (300) denarias kusu dina raba limixin banbalo min?” Ni ga tong i na, mila neni laradi xipkip pilo la kopmen do ni ga doxoma limixin banbalo, ketla neni ga vara i do neni nam nem kaka i. Neni gak lok tatao lempilas atdi la amisik ni gam nem teren.
* Jo 19:40Ketla ne Iesu ga lok, “Keke mulus na latkin. Na ladan neni ga gagas li i xusu tik mir ia. * Lal 15:11Limixin banbalo dinabat pot pasa amisik nimi xusu minabak lok tooro di, ketla nenia noxo nemen eburu amisik minimi.”
Lavamaasa Diga Puse Ngas Ti Sev Amet Ne Lasaro
* Jo 11:43-44Buaang limixin me Judaia diga ronga i do ne Iesu gak lok to Beteni, kuren la digat pas ugo. Digat pas mila diga vara i do dina ven ne Iesu mi ne Lasaro, mo ne Iesu ga lox arooro amlong i basinge lanmet. 10 Kuren la lavamaasa silok diga tong li levelinga do dinaba sev amet bok ne Lasaro, 11  * Jo 11:45mila buaang nedi limixin me Judaia diga sok tixirixes lavamaasa la diga nunu nga at ne Iesu.
Iesu Ga Beles To Jerusalem
(Mt 21:1-11; Mk 11:1-11; Lu 19:28-40)
12 Ap mo laaleng petpes buaang nedi limixin mo diga vot ti leluxa at Lovovolo Pe la diga ronga i do ne Iesu mo gat pas uto Jerusalem. 13  * Mt 27:42; Jo 1:49Kuren la diga ra ka laxangkakan bisi la diga vas su xusu ti ekip tangarang min. La diga lok,
“Leemi asu ri ne Moroa. Luvukat ti mo laradi it pas mi laasen at Leeme Silok. Luvukat ti Loorong Silok boro Israel.” Sam 118:25-26
14 Iesu ga lok ka lodongki maxat la ga xis teren, kerekngan Lovoang Kaala ga tong i xeretna,
15 “Limixin me Saion. Nemen mita marat. Loorong Silok atnimi nom it pas saparap nimi, it kis at lodongki maxat.” Sak 9:9
16  * Jo 2:22Ap mo laaleng na lavanga ga ravasu, lavaun pinivu di goxo xasep at lavasuun ap mo levelinga. Ketla se at laaleng ne Iesu ga rooro xat amlong digaklen ba i do Lovoang Kaala ga tong asu na lavanga, la mo limixin diga lox i na ri ne Iesu.
17  * Jo 11:43-44La mo limixin diga nemen eburu mi ne Iesu ap mo laaleng neni ga ro asu ka ne Lasaro boro at lamaaut, la ga lox aroo amlong i basinge lanmet. Diga tong asu na lavanga ro Jerusalem. 18 La buaang nedi limixin digat pas kusu ti ekip tangarang min, mila diga ronga i do neni ga lox aroo amlong ne Lasaro. 19  * Jo 11:48Kuren la lubung Parisi diga lok tinedi getgesara, “Mina ven ba i. Ata noxo lox asoxos toxot at levendoxoma atdik. Limixin axap mo dia mumu asu nga ne Iesu.”
Limixin Petpes Diga Lok Do Dina Epaase Eburu Mi Ne Iesu
20 Ap mo laaleng at leluxa, leventaba limixin me Grik diga nemen kantubu ap mo limixin mo digat pas uto Jerusalem kusu ti lotu. 21  * Jo 1:44; Lu 19:3; 23:8Diga vot pasa ne Pilip, neni boro Betsaida at lenep Galili la diga lok tin, “Leeme silok. Ma vara i do mana vot pasa ne Iesu.” 22 Pilip gat pas la ga tong i ri ne Endru, la nedu buru dugat pas la duga tong i ri ne Iesu.
23  * Jo 13:31-32; 17:1La ne Iesu ga lok tidu xeretna, “Loxonaleng mo ia epovo vam kusu ne Moroa na lox asilox ia, Laradi Mevana. 24  * 1 Ko 15:36A tong tuturun i rinumu. Luxuvenit piao, do limixin di noxotlo i, noxo visik. Do i mang la ditlo li i at laxangka, melemu naba visik buaang levempeven piao. 25  * Mt 16:25Do tara i vavara aleng lorooro ren, neni naba sang apkav i. La do tara ixo vara aleng lorooro ren at na lavatbung menemen kopok, neni nabam tebeng amisix i ri lorooro avolo. 26  * Jo 14:3; 17:24Do tara i vara i do na lok lugugu rak, neni na lok kaka be loklok tarak, kusu neni naba lok ngan lasaxaruki rak la na nemen ap mo lenep nenia anak lox e. Ne Tamak naba lox asilox i do neni na lok lugugu rak.”
Iesu Ga Paase Mumu Lanmet Teren
27  * Sam 6:3; 42:5; Mt 26:38La ne Iesu ga lok bok tidi, “Monga labalak ixo xis saga la aba tong ka lavanga salai? Agut aba lok do, ‘Tamak, i epovo do una lok kepe na lumumuat basinge ia?’ Kopmen. Nia aga si ude xusu ti beles at na loxonaleng at losongsongot.” 28  * Mt 3:17La ne Iesu ga sing ne Temen keretna, “Tamak. Una lox asilok laasen taram.”
Melemu laxaka at lara ga si boro vana at laxalibet, ga lok, “Nia ara lox asilok pam i la anaba lox amu box i.” 29  * Gu 23:9La limixin diga tu go diga ronga na levelinga la diga lok, “I mumuat ngan leretepaavat.” La leventaba diga lok, “Laangelo i paase rin.”
30  * Jo 11:42La ne Iesu ga lok tidi, “Na levelinga mi ronga vam i, kopmen ti lok tooro ia, ketla ti lok tooro nimi. 31  * Jo 9:39; 14:30Monga loxonaleng kusu ne Moroa na ila mumu loklok at limixin at lavatbung menemen. La ne Moroa naba lox axap lolos at ne Satan, neni lamgomgo at na lavatbung menemen. 32  * Jo 3:14Do dina vaxarem ia uto vana at laxaba la nia ana urut upana basinge na lavatbung menemen, nenia anaba sat tomtom ka limixin axap saparav ia.” 33  * Jo 18:32Ni ga vaase i na mumu lanmet neni naba ekip tangarang min.
34  * Sam 89:4,36; 110:4; Ais 9:7; Dan 7:14La limixin diga lok, “Laulis Linga atdik i tong i do Lanarong na rooro amisik. Kereva u tong i do Laradi Mevana diba vaxarem i upana? La nege mo Laradi Mevana?”
35  * Jo 7:33; 8:12; 1 Jo 2:10-11Iesu ga vorang i ridi xeretna, “Laxasep at ne Moroa noxo nemen abao eburu minimi. At lavatpas atnimi at na lavatbung menemen, mina nemen at laxasep mila laxasep move i nemen eburu minimi, kusu laxakapmek noxo los kis pavaa nimi ngan lamain. Mila lara do it pas at lamain ixokleklen i do neni it pas ua. 36  * Ep 5:8Laxasep at ne Moroa move i nemen eburu minimi. Kuren la mina nunu ren, kusu nemi minaba nemen ngan limixin at laxasep.” Melemu at na levelinga ne Iesu ga tong i, neni ga vas kaxat la ga lox alipe i basinge di.
Buaang Atdi Limixin Me Judaia Di Goxo Nunu At Ne Iesu
37 Iesu ga lok buaang levempanga sangsangu ro melamgo at leme Judaia, ketla move di goxo nunu ren. 38  * Ro 10:16La kerepmo diga lox aruturun levelinga at leeme vapaase ali ne Aisaia, ni ga lok,
“Leeme Silok, nege ga nunu at levelinga nema maga tong i? Kopmen tara. Leeme Silok ga lox asuusu lolos teren ti nege? La kopmen tara atdi goxo ven kibis i.” Ais 53:1
39  * Mt 13:15Na mun i lavasuun teren la di goxo epovo do dina nunu. Ne Moroa ga paase ali at lungusno ne Aisaia, neni ga lok,
40 “Moroa ira lox amain pam lengkatli atdi, la ira vipe vam levendoxoma atdi xusu lengkatli atdi noxo reven la levendoxoma atdi noxokleklen. La di noxo vot pasa ia xusu nenia anaba lox arooro di.” Ais 6:10
41  * Ais 6:1Aisaia ga tong i na mila neni ga ven lisisixam silok at ne Iesu la ni ga paase ali min.
42  * Jo 7:48; 9:22La buaang luvuttadi amgomgo bok diga nunu at ne Iesu, ketla diga e amarat at lubung Parisi. Kuren la di goxo paase asu lununu atdi ri tentaba vetpes, mila lavanga lubung Parisi dina sep pepe di xusu di noxo pubeles bok ba at loogu singising. 43  * Jo 5:44Diga vavara aleng i xusu limixin dina emi asu midi, la di goxo doma solo mumu leemi asu boro at ne Moroa.
Levelinga At Ne Iesu Naba Vaxaru Limixin At Lavapaase
44  * Mt 10:40Iesu ga vaase silok ti limixin keretna, “Do tara na nunu rak, i nunu bok ap mo lara ga riki ia ude. 45  * Jo 14:9Do neni i ven ia, i ngan do i ven mo lara ga riki ia ude. 46  * Jo 8:12; 12:35Nia aga rupot ti na lavatbung menemen ngan laxasep kusu tara na nunu rak, neni noxo nemen at lamain.
47  * Jo 3:17; 8:15Do tara na ronga levelinga rak la kopmen na ronga res teren, nenia noxo lok li i at lavapaase, mila aga vot ti lox arooro limixin, la kopmen do ti lok li di at lavapaase. 48  * Ib 4:12La do tara i raba rulu ia la kopmen na sisiam ka levelinga rak, neni ira sok ka vam lenep tin, mila levelinga mun tarak naba lok li mo lara at lavapaase at laaleng ete. 49 Anai i ruturun aleng, mila kopmen nenia xusuk mo a paase mi lolos axa rak. Ketla ne Tamak neni ga riki ia, ni ga tong lolos mo levelinga ria do nia anaba tong i, la langas salai nia anaba mu i ri vaase axasev i. 50  * Jo 8:26,28La aklen i do levelinga lolos teren naba lok li limixin at lorooro avolo. Levelinga axap tarak, ni levelinga ne Tamak ga tong i ria xusu ana paase asu i.”

*12:1: Jo 11:1,43

*12:2: Lu 10:40

*12:3: Lu 7:37-38

*12:3: Na lubuxom tuntu diga xovox i mi luuat bunbun.

*12:4: Jo 18:3

*12:5: Mt 19:21

*12:7: Jo 19:40

*12:8: Lal 15:11

*12:9: Jo 11:43-44

*12:11: Jo 11:45

*12:13: Mt 27:42; Jo 1:49

*12:16: Jo 2:22

*12:17: Jo 11:43-44

*12:19: Jo 11:48

*12:21: Jo 1:44; Lu 19:3; 23:8

*12:23: Jo 13:31-32; 17:1

*12:24: 1 Ko 15:36

*12:25: Mt 16:25

*12:26: Jo 14:3; 17:24

*12:27: Sam 6:3; 42:5; Mt 26:38

*12:28: Mt 3:17

*12:29: Gu 23:9

*12:30: Jo 11:42

*12:31: Jo 9:39; 14:30

*12:32: Jo 3:14

*12:33: Jo 18:32

*12:34: Sam 89:4,36; 110:4; Ais 9:7; Dan 7:14

*12:35: Jo 7:33; 8:12; 1 Jo 2:10-11

*12:36: Ep 5:8

*12:38: Ro 10:16

*12:39: Mt 13:15

*12:41: Ais 6:1

*12:42: Jo 7:48; 9:22

*12:43: Jo 5:44

*12:44: Mt 10:40

*12:45: Jo 14:9

*12:46: Jo 8:12; 12:35

*12:47: Jo 3:17; 8:15

*12:48: Ib 4:12

*12:50: Jo 8:26,28