Me
Galatia
Yai Leta
Paulo Wayahina
Buki Taina Wayahina
Buki taina a tau ginuma vivane Paulo. Ka leta taina omo tau ekalesia imamaei papani Galatia nihenina.
Tau viwavenena tupwai me Iudea wayahia iomo papani Galatia wayahina, ka ekalesia habuhabui wayahia papani‑nana nihenina inaunau‑wahei. Ka ai veimea ivenevenei tau ekalesia aitamoata aitamoata nau‑wawani Mosese ya veimea ivi‑ateteyei. Veimeana nihenina dewa tunina tunina imamaei. Aitam veimea onoto aitamoata aitamoata veimeyei inini idabei. Ka kadu aitam veimea tomotau habuhabui veimeyei aniani tupwai ivihahaiei. Tau viwavene‑naia inaunau‑wahe aituhu avi tau ekalesia Mosese ya veimea taina ivihahaiei, taui eha ai pata ivi‑tau ekalesia‑hoi. Tau viwavene‑naia kadu ivonavona Paulo eha tau hae‑hoina ananina aitam, ka kadu ivonavona Paulo ya nau‑wahe bwagona.
Paulo avaha anamanei yai viwavene‑nana vitupu. Ya nuanua ananina leta taina nihenina me Galatia yai vitumahana na‑vo‑vi‑tunuhi. Wayahina, Paulo me Galatia yai dewa yapoyapoi. Iuna nonova, tutana naona Vaneana Ahiahina ivitumahanei, ivi‑putu ahiahina. Kate munia, ivitumahana aituhu me Iudea yai veimea ivi‑muniei, taui ividoha Yaubada matana deina. Paulo yana vona leta taina nihenina vona panina. Iuna tauna anamanei viwavenena vitupu avaha yai vitumahana tunuhina vi‑goyoi, ka me Galatia nau‑wawani imavi‑havine vitumahana tunuhina wayahina.
1
Nau‑kaiwa
1-2 Yaiau, yami leta taina aginumi omomo itomi tau ekalesia papani Galatia nihenina wayahimia. Yauke Paulo, tau hae ananiu. Tomotau eha ita‑vi‑nua‑dadaneu, ka tomotau eha ita‑vi‑tuneu anau‑wahe. Eha‑ohota! Yaubada Amaka Iesu Tau Ito‑yavuha anigea si‑vi‑mini‑havinei, ka tauna ka Iesu ainua ivi‑nua‑dadaneu, ka au veimea iveneu anau‑wahe, kadu ivi‑tuneu aomo tomotau wayahia, e Vaneana Ahiahina anaunau‑waheyei.
Yauke anau‑kaiwemi, ka vavaneika habuhabui baina nui amamaei kadu inau‑kaiwemi.
Paulo Ya Viama Me Galatia Wayahi
3 Yauke yau viama am‑venena awawaehina kadu nua gomagomanina uvaniahei Yaubada Amaka wayahina ka kadu yaka Kauvea Iesu Tau Ito‑yavuha wayahina. 4 Ataina tuta tanopi taina goyonata, kadu tau maꞌ tanopi yai dewa vivane goyonata. Ka Iesu Tau Ito‑yavuha tauna yanꞌ aniga awaehei, e ya dewana wayahina Yaubada nau‑patei itoka yaka dewa goyona wayahina. Ka tauna ito‑yavuhika tanopi taina wayahina deina. Iesu dewei deina, iuna Yaubada Amana ya nuanua deina.✡Gal 2:20. 5 Wayahina, ataina tuta eha a ito‑vewana wayahina itoka nau‑wawanika Yaubada didigana kavo‑vi‑natei. Ana pata deina.
Paulo Me Galatia Yapoyapoi
6 Tomotau imataedau itomi me Galatia yami dewa wayahina, ka anononi avaha Yaubada yanꞌ am‑venena awawaehina nonova uvaniahei uvo‑kwayavoni uni‑tawanei. Ka tuta ataina itomi viwavenena tunina uvi‑muniei. Ia! Nuau vi‑tupatupa ani‑vainena wayahimia. Yami dewana vivane goyo‑vainena! 7 Eha kadu aitam Vaneana Ahiahina ta‑mamae. Eha‑ohota. Vaneana Ahiahina aitamoata akanai. Yami dewana goyona vinꞌ‑omo, iuna onoto tupwai yai nuanua ivitavitami, ka taui avaha iomo wayahimia. Onoto‑naia yai nuanua Iesu Tau Ito‑yavuha Vaneana Ahiahina ibou‑baneanei.✡Dew 15:1, 24.
8 Tuta ataina wayahina vona panina wayahina anau‑vi‑avinimi. Aituhu aviyaivia vane tunina inaunau‑waheyei, ka aituhu ivitupu ivonavona, “Vane taina vivane Vaneana Ahiahina Yaubada wayahina,” apaina taui bwanata maꞌ‑vavaha Yaubada wayahina ivaniahei akanai. Aituhu yauke vane vitupu anau‑waheyei, o kadi aituhu aitam anelose wahuma wayahina vane vitupu nau‑waheyei, nau‑wawaniai bwanata maꞌ‑vavaha Yaubada wayahina avaniahei aitamoata deina.✡1Ko 16:22. 9 Vonana vona ananina. Wayahina, nau‑wawaniu avona‑havinemi unononi. Avaha Vaneana Ahiahina Yaubada wayahina unau‑kaiwei, kadu uvitumahanei. Ka aituhu aviyaivia vane tunina inaunau‑wahemi, apaina Yaubada tomotaui na‑bwanatai akanai.
10 Tupwai tomotau ivonemi, ivona, “Paulo ya nuanua tomotau ivi‑niana wayahina. Wayahina, tauna eha tomotau vona tunutunuhina ta‑vonevone. Aviani tomotau yai nuanua inononi, akanai tauna vonevonei deina.” Kate tuta ataina wayahina avaha yau vona panina wayahimia unononi yami leta taina nihenina. Akanai ka, yau nuanua‑hoina udueyei. Eha yau nuanua anꞌ‑ana‑dibidibiemi, kavi‑yaiana, e unꞌ‑apa‑vidovidoheu. Eha‑ohota! Yauke yau nuanua Yaubada yau vonana na‑nononi, nꞌ‑awaehei vivane tunutunuhina matana, e tauna nꞌ‑apa‑vidovidoheu wayahina deina. Aituhu yau dewa vivane dewa goyona, tomotau‑naia yai ipupu wayahiu deina, yauke eha Iesu ya tau paisewa aitam. Kate vona ahiahina, yau dewa eha taui yai ipupu deina.✡1Te 2:4.
11-12 Vona tunutunuhina taina. Vavaneiu, yauke yau nuanua unꞌ‑anamanei tuta tuta Vaneana Ahiahina anaunau‑waheyei, kate tomotau eha Vaneana Ahiahina ita‑mataedau. Eha‑ohota! Iesu Tau Ito‑yavuha a heta‑ohota omo wayahiua, e tauna Vaneana Ahiahina vo‑vi‑maheteu.✡Mat 16:17.
Paulo Viviwavina Nau‑viviwavei
13 Yauke anuanua itomi avaha viviwaviu unononi. Kate ataina avona‑havinemi, unuani.
Nonova itoai me Iudea yama dewa tapanono avi‑muni‑waiwaiei. Tuta‑nana wayahina yauke vivane Iesu Tau Ito‑yavuha ya ekalesia a havia aitam, kadu manimaniniu. Ka apaipaisewa toyoina ekalesia‑naia avita‑vovoni.✡Dew 8:3.
14 Ka me Iudea habuhabui iawaehei yama dewa tapanono wayahi, akanai yauke taui au yanaga abagibagi‑tawanei. Iuna yauke apaipaisewa toyoina yau dewa yama tupua‑nenenehi yai dewa vivane aitamoata.✡Dew 22:3. 15-16 Nonova, tutana yauke ayou madia amamaei, Yaubada avaha vi‑nua‑dadaneu avi‑tau paisewa tauna wayahina. Ka munia, tuta‑nana manimaniniu ekalesia wayahina, tauna am‑venena awawaehina veneu, e honeu. Ka tauna ya nuanua yawaiu nihenina Natu‑hoina na‑si‑vinꞌ‑omanei, e taumi eha me Iudea ududueyei. Ka kadu ya nuanua natuna Iesu Tau Ito‑yavuha Vaneana Ahiahina anaunau‑wahemi. Ka tutana yau paisewana avi‑putui, eha ata‑omo aitam onoto wayahina, ka eha ata‑vi‑tanaie paisewana wayahina. Eha.✡Isa 49:1; Gal 2:7.
Paulo Omo Papani Anata Wayahina
17 Ononotoi tupwai avaha ivi‑tau hae anani, ka yauke munia. Taui imamaei Ierusalem wayahina, kate eha ata‑vane taui wayahia anau‑vi‑taui vivane taui avi‑tanatanaie. Eha‑ohota. Yauke avo‑kwayavoni tunuhina papani Arabia wayahina. Ka tenoke amamaei tupwana bana mamanaina. Ka munia, Arabia ani‑tawanei, amavina meagai Damasikusi wayahina.
Paulo Pita Ka Iamesa Ainua Nau‑vi‑taui
18 Ka munia, ponimana aitonu iakwa, avane Ierusalem wayahina, ka yau nuanua KepasiV anau‑vi‑taui, e nui amamaei auyewa ai yau 15 ai heta.aLeta taina nihenina Paulo wava Kepasi tomatomani. Wava taina kadu aitam wava Simoni Pita wayahina. (Edu Kepasi Vona nihenina.) ✡Dew 9:26-27. 19 Ka tutana Ierusalem amamaei, eha kadu aitam tau hae ananina ata‑dueye. KepasiV ka Iamesa, tauna Iesu vaneina, ainuai ai heta adueyei. 20 Ataina tuta Yaubada yau vonana nonononi, ka avonemi tauna matana yau vonana aitamoata aitamoata vivane tunutunuhina.
Paulo Omo Papani Siria Ka Papani Silisia Wayahia
21 Ka KepasiV anau‑vi‑taui iakwa, e aomo papani Siria wayahina kadu papani Silisia wayahina.✡Dew 9:30. 22 Tuta‑nana wayahina tau ekalesia Tau Ito‑yavuha nihenina papani Iudea wayahina eha itꞌ‑anamaneu. Iuna eha aitam tuta tepau ita‑dueye. 23 Taui vaneau ana heta inononi vivane avaha avi‑tau ekalesia, ka kadu avaha yau dewa manimaninina tau ekalesia wayahia abou‑ohoi. Nonova Vaneana Ahiahina anau‑nikonikoiei, kadu adewa‑dadani avita‑vovoni. Kate vaneau inononi avaha avi‑putu Vaneana Ahiahina anaunau‑waheyei. 24 Wayahina, taui Yaubada iawa‑davei, iuna tauna yawaiu vo‑vinei anua‑vinana.
a1:18: Leta taina nihenina Paulo wava Kepasi tomatomani. Wava taina kadu aitam wava Simoni Pita wayahina. (Edu Kepasi Vona nihenina.)