12
A Ravin Ma A Zizi
1 Adi vaakilanang ka balas la lia. Ka malasing kari: A ravin ka mamaaus pana a iaas, ma a flan ka iziar lawaana uru xaakna, ma amun patpada xa zangaaflu ma urua xa iziar la waatna malasing a lawilot. 2 A ravin angkanaan ka buxut ma xa raangis pana maazikang panaze naan kana samura luk. 3 Daan 7:7Ma aza vaakilanang tawarak ka balas la lia. Ka malasing kari: Adi zizi laba xa memek, ka rauxin amun paatna xa wizik urua ma xa rauxin amun kum ka zangaaflu ma amun lawilot ka wizik urua lamun paatna. 4 Daan 8:10A zumna xa sor psin fawat a non a zaxai iwana non urul iwana amun patpada la bara xunitiat paanaburut la pira angkari. Ma adi zizi angkanaan ka rur lamarana a ravin ina adu xana samura luk kuna xanomang a nalik sina la notaan mase naan kana luk naan. 5 Aais 66:7, Saam 2:9Ma xa luk a nalik tapti ina xana rasin a lus dikdik laaxur wana amun lemlem aubina vaakdul wana a rol ina di giu wana a aain. Ma fazaaus mase axazak ka vazaak fauzaa naatna xu laaxur zin Nakmai ma xula akin izi xalxaalang sina. 6 Ma a ravin ka valaau xula non bingil ina Nakmai xa ra nimnimanin tasin aaxana xuna dina xatkatong naan pana a raan ka 1,260.
7 Daan 10:13,21, 12:1, Jut 1:9Ma adi varopang ka balas ikula la lia. Maaikal ma amun aangelo zina di varop faraxai wana adi zizi angkanaan, ma adi zizi ma amun aangelo raksaat sina di varop puli varaxai wana naandi. 8 Di waramin adi zizi malasing ma xawit nat faraxas naan faraxai wana amun aangelo raksaat sina dina iziar ikula la lia. 9 Var 3:1, Lk 10:18Ma di psin fawizik adi zizi, naan a zizi in mumua pis ina di vakilaan a Rapti Xai Piaat Faraksaat Axazak, o Saatan, ina xat falos falmur aubina ila pira angkari. Di psin fawizik naan faraxai wana amun aangelo raksaat sina xunitiat la pira angkari.
10 Jop 1:9-11, Zek 3:1Ma ga langarin adi ling axazak ikula la lia xa piaat malasing kari,
“Naari a vaamuzazang iwana zaxot faulinang aubina ma a dikdikang ma a bikabar, nandiaal zin Nakmai zin dia,
ma a burburaaiang sin a Mesaaia zina,
di balas faanong.
Avuna naan ina xat fakor amun taatum sin dia lamaskana Kaarisito,
lamarana Nakmai zin dia lawaanaas ma labung,
di psin fawizik fanong naan.
11 Amun taatum sin dia di ra waramin naan
pana a daraaia Naata Sipsip
ma wana dorang faaratunaan sin naandi ina naadi pitfiaat pana naan.
Ma xawit di saxot dina roting falagot a roroiang sin naandi ziaana maatang.
12 Malasing ma a lia ma nim naagu iziar la lia,
naagu dokdok.
Singsaxai xana raksaat mase wana a pira angkari ma a raas saait,
avuna a Rapti Xai Piaat Faraksaat Axazak ka wizik faanong sunumaa.
Adi boromaazikang sina xa raksaat mase,
avuna xa rexaas adu amun taan sina xawit faras ka.”
13 Araan adi zizi xa raamin adu di psin fawat naan kula pira angkari, xa vut a ravin ina xa ra luk a nalik tapti. 14 Daan 7:25, 12:7Di lis uru bibina maningulaai zin a ravin kuna lif paanang la non Nakmai xa ra nimnimanin tasin aaxana la non bingil, xuna dina xatkatong naan inaan siaana adi zizi wana a maariaas urul ma akbal. 15 Adi zizi xa luaak psin a daanim la balana malasing a daanim laba xa valau lalos naan ma xana vazaak pizin naan. 16 Singsaxai a pira xa vawaal a ravin araan ka ralakas ma xa xanom a daanim ina a zizi xa luaak pizin la balana. 17 Ma adi zizi angkanaan ka boromaazik mase wana a ravin ma xa wa varop faraxai wana azanon funalik tawarak sin a ravin. A funalik angkanaan naandi ina dit falos amun lus sin Nakmai ma dit falos Iesu ma di pitfiaat aizina. 18 Ma a zizi xa irur be laxon.