1 Ema aupe Iawe God Abram mampe auen rua bedewe segalene diene wanase, “Abram mai saitaa, ne e etea enabodawa; ita do unea debamaia winedia eneepa.”

2-3 Tane Abram me sipoasane wanase, “Warere Iawe God, e mai oto da ne neapona, sa baiwa e une debamaia ne neaa mai saunepia rua, dia. Ne ando bonteapo aupanawo Eliesa bola debama Damaskas apanawa ne dunawo nolaledie wandia ne maurana uduudu epo me mampelepi.”

4 Tane Iawe God Abram osowe diene wanase, “E mauraa mai apana sa wadepi, dia. Tane e eba otoaida segasawo maura sa uduudu e manawoa me mampelepi.” 5 Ita Iawe God me diene wanase, “E pewa noe enee pisiwae uba tampe kipora ewamoe mai wisiaitaa rua, dia. Ita epe rua e nosinosia wisiasiawaia uaraia segantopu.”✡Rom 4.18; Ibru 11.12

6 Abram Iawe God sumanaiwaidalena baiwa me nuawa euleno insenase, “Abram ipa dodomanaida ne emanawo.”✡Rom 4.3; Galasia 3.6; Iems 2.23

12 Rawiwa omo pamedio Abram itu awawalen ita iwimpa debamaia nua salalaida me golausan. 13 Ema aupe Iawe God Abram mampe wanase, “Dewa ema atendewaitaa, e nosinosia bola bopawa osowe ware rua waimompe leumpa. Ita ena 400 bedewe bola apanawa mo nolau dewalala wanamopu ita do oniakadisamompa.✡Ekisod 1.1-14; Aposel 7.6 14 Tane bola apanawa mo mai oniadewasamompaa ne mo matangelamopa. Ita do e nosinosia bola sa epue a baiwantompe nitu eubu wineia otepue do antopu.✡Ekisod 12.40,41; Aposel 7.7 15-16 Tane Amori apanawa tauma bola ema bedewe waimoi, mo kadiu debamalempe alempa ne mo matangelamope tanamopo bola sa epue antopu. Ita e nosinosia mai tauwadea leuntopue bola sawo wimopu, dia. Tane e nosinosia andoido muntompa bedewe mo obaampu wimopue wampu.

Ita e Abram ena debamaia wanempe gulauidaite ita bo obasa euda boitawo mo dobosaepu.”

17 Tane omo pameno sala iwinlene dubalena bedewe Abram moia none reresawa nata teamono wineie. Ita onta bedewe ia idia gasuwa odedie ita do siwa idie moia sawanawointa wimone antoio ewamodine. 18 Ita walama sawo Iawe God saua badowa Abram diene wanase, “Tawo ema alene Isibt tawowa moa wadena ita do alene esa debama Eupirates makawa wisena uduudu sa ne e nosinosia wanamodina.”✡Aposel 7.5 19-21 Tane tawo ema ipa ua ebou Kena, Kenisa, Kadimoni, Itai, Perisi, Repai, Amori, Kanaan, Gigasa ita Sebusi apanawa mo tawou.