10
Israel kariimet alo lage supuman
Aga singsang, aninga angamang niara biya se guranek Israel alo nunga Kaem kote betesam mu, nu nunga sangaru taukko. Ani nuna wetang te tala nunga balsam, nuna Kaem karo tumonko ninguru sail tagisan, bare nunga karo tua ko munan umu ikia nunguning ko munan te mena.* Paul me giris palagakaso tom te mu nu nunga iwita bagakaso: Acts 22:3. Romans 9:31-32 ago arikko. Nuna munan ningo diram Kaem kote taiso mu ko me sinarman, bore te se nuna nongota nunga ikia te bitakasan ale Kaem ko munan ningo diram ko munan umu bowa ningi me karo tuikasan. Mu awuk, Kristus law ko munan mu menawuram, ale kariimet nongomang ningi nunguning te kariimet ningo diram ko aratamonko munan mu baongam. Kristus kumik te law ko nunguning aratu saparam: Matthew 5:17. Nu kota lage: John 3:18; 14:6.
Moses law ko munan te kariimet ningo diram ko arata mu ko iwita balam: “Kari awiriya law am diram la karo tui saparuk mu nu ningo la law bowa ningi bagarukko.” Leviticus 18:5. Law karo tua ko lage: Romans 7:10; Galatians 3:12. Bare kari gomang ningi nunguning te kari ningo diram ko aratam mu iwita baluwoso: “Ni gemang ningi la me balu, ‘Awiri duruk wonong te nama tarigiruk ale Kristus ilak nangate tai kaparukko? Agi awiri kuera nunga nuguwim te nama kaparuk ale Kristus ilak tai bausokko?’ uwuta me isako.”§ Paul Deuteronomy 30:11-14 ko iki se den imi baluwoso. Kristus maingkala anananga sangukko tairam kueram, ale aking barasam. Mu awuk, mu umu ko iwita baluwoso: “Den ni kerak pingi bagoso; ni gemang motam ningi se ka kiring kamili te aniso.” Se ana borta ko nangamang ningi nunguning aso se pempem la balsan. Se ni ka kiring kamili te balu, “Jesus mu Kari Biya” me, ale kueram bare aking barasam mu gemang motam te gemang ningi nunguning aruk, mu ni ka sangaru taukko. 10 Mu awuk, mu ni gemang motam te ni gemang ningi nunguning aso, se ni kari ningo diram ko ka balso. Ale kiring te balu pagorsam se ka sangaru taso. 11 Batoga te iwita baluwoso: “Awiriya nu te la ira sanami lagoso mu me ta dolurukko.”* Isaiah 28:16. 12 Juda agi sor saki ko kariimet ta wore mu koma suanta. Nu Kari Biya, nu kota suanta, borta tala kariimet awiriya nu kote aisan mu marak sokel ningo ningo mu nungarso. Lage ilagala mena, lage suanta: Acts 15:9-11; Romans 3:28-30; Galatians 3:28; Colossians 3:11. 13 Mu awuk, “Awiriya Kari Biya ko nup te aruso, mu nu sangaru taso.” Joel 2:32.
14 Bare kariimet noko nongomang ningi nunguning mena, mu awuk ta noko nup te arumonko? Ale awuk ta nuna noko dugu duap me ikiman mu ko nongomang ningi nunguning arukko? Ale kariimet bo noko dugu duap me apurok mu, nuna awuk ta noko ikimonko? 15 Ale kariimet den apumonko mu me nunga betemon se namamon mu, nuna awuk ta den apumonko? Mena tala! Batoga bo te aniso iwita: “Amilmil yawara kari den gilalong ago taisan mu nongote namoso!”§ Isaiah 52:7.
16 Israel kariimet den umu ikiman, bare saki la den umu taman ale karo tuman. Se Isaiah ko batoga te iwita balam:
“Bare Kari Biya, awiri ana den
balman umu ko nongomang ningi nunguning aram? Mena.”* Isaiah 53:1.
17 Bare den nadegewa te ikia ko ningo mu iwita, ana Kristus ko den gilalong nadegewa te ikisan, asele nangamang ningi nunguning ko munan umu aratu kererposo ale sanamoso.
18 Bare ani isa bo iwita esesam: Agi nuna den bo nodogawa te me ikiman? Mena. Mu nuna den ikiman. Batoga bo te iwita balam:
“Nunga nuguring ali lilim te geraga saparam;
nunga den mu sor suen la te geragam tala.” Psalm 19:4.
19 Se ani akingtala esesam: Agi Israel kariimet me ko sinarman? Mena. Nuna ko sinarman. Moses giram iwita ko balam:
“Ani kariimet saki, nina motam suanta
bagasan iwita me bagasan, mu
nunga giek ale nina nengemang maguwurikko;
ani kariimet ikia sinar mena mu nunga giek ale nengemang maguwurikko.” Deuteronomy 32:21.
20 Se aking Isaiah nguangara mena, sokel ago iwita balam:
“Ani kariimet ani ago ko nomotam me
bita lagara wore, agarki aga iki gilingiman;
ani kariimet ani ago ko me eseman wore,
nongote aimi wetang te beterem.Ӥ Isaiah 65:1.
21 Bare nu Israel nunga iwita balam:
“Ani kowarkalal maiya kariimet
nodogawa sisira se agiring me ikia ko kariimet nunga,
agiting ulaluwukasam ale agate taimonko nia ai lagakasam.”* Isaiah 65:2.

*10:2: Paul me giris palagakaso tom te mu nu nunga iwita bagakaso: Acts 22:3. Romans 9:31-32 ago arikko.

10:4: Kristus kumik te law ko nunguning aratu saparam: Matthew 5:17. Nu kota lage: John 3:18; 14:6.

10:5: Leviticus 18:5. Law karo tua ko lage: Romans 7:10; Galatians 3:12.

§10:7: Paul Deuteronomy 30:11-14 ko iki se den imi baluwoso. Kristus maingkala anananga sangukko tairam kueram, ale aking barasam.

*10:11: Isaiah 28:16.

10:12: Lage ilagala mena, lage suanta: Acts 15:9-11; Romans 3:28-30; Galatians 3:28; Colossians 3:11.

10:13: Joel 2:32.

§10:15: Isaiah 52:7.

*10:16: Isaiah 53:1.

10:18: Psalm 19:4.

10:19: Deuteronomy 32:21.

§10:20: Isaiah 65:1.

*10:21: Isaiah 65:2.