1 Fol 13:19Wata Mosese me Isileli i veifufudi i vo, Tutuyanina 'Auvea yami Yaubada i na miemi fwayafwayanina 'wa na luvaia, 'aila'a bwaikidi 'adi 7 taunina i na 'wavinedi i na souyedi, kumanidiavo toketokeotogidi mulieta 'omi. 'Aila'anidi 'Auvea i na 'wavinediga side kumanidiavo, me Aiti, me Gegasaiti, me Amolaiti, me Kenani, me Felesi, me Aiviti wata me Iebusaiti. 2 Tutuyanina 'Auvea yami Yaubada tomotoganidi i na 'anivelenedi 'waimie, 'wa na leodi matatabudi 'wa na luvewafadi. Kebu 'wa na veianediga wata kebu 'wa na 'isanuakalikaliediga. 3 Kebu taiadi 'wa na nagiga, kebu natumiavo vevinedi 'wa na tauyedi bega natudiavo iavetadi i na nagidiga, 'alo vevine natumiavo iavetadi i na nagidi. 4 De'e sauluvanina 'wainega natumiavo i na siviladi i na baileku bega mali yaubadavo 'waidie i na 'odu'odu, nika yau a na nuasako-matayo'o a na leomi.

5 VeL 12:3Side bani'odi 'wa na 'idewedi. Yadi 'eba velomu 'wa na tuweawealidi, yadi kileu tabutabudi 'wa na tubaibaidi, Asela 'adi 'ogola 'eba bunumayaga 'wa na talagidi wata yadi kumaea 'ai 'waineye 'wa na kabunidi i na 'alaidi. 6 Sou 19:5; VeL 4:20; 14:2; 26:18; Tai 2:14; 1 Fit 2:9Fai 'omi 'aila'animi 'Auvea yami Yaubada yana tomotoga, i venua'ivinemi wata i yato'idiemi tomia fwayafwaya 'aila'a tulina tulina 'waidiega, 'omi 'asa'aiana yana kukuafou.

7 'Auvea nuanuana 'omi tomotoganimi, i venua'ivinemi kebu 'ami 'aila'a bwaikina faifaina, 'ami wauma saiotogina mulieta 'ifwaidi 'aila'a. 8 We'e mogitana 'Auvea i nuakalikaliemi wata naninidi i vona'awaufaufa taunina 'ana wagavayega tubumiavo 'waidie, i nuanuanidi. Bega yana toketokena bwaikina 'wainega i 'ita'ita'iemi me Itifita yadi kini Felo 'wainega, kumanina i veveimeyemi 'wa vetofolova-maimaiga faifaina. 9 Sou 20:5,6; 34:6,7; Sal 14:18; VeL 5:9,10Begaidi 'wa na 'asetai 'Auvea yami Yaubada kumanina 'aiseotogina, yana tomotogavo kebu i na bailedi 'alo i na venuafanidiga. We'e egavo i na nuakalikalieni wata yana veimea i na vematayakeyakedi, Yaubadanina yana nuakalikali-motoina wata yana veakutagona i na 'eno-vagata 'waidie, i na nagoga lakata 1,000*Nabanina 1,000 'ana 'aseta lakata fueotogidi, lu'iawa-wayoga. i na veluagai. 10 We'e tomotoganidi i vedumwe'ubu'ubseni 'adi vematavuloga faifaina kebu i da 'ivogavogana. 11 Begaidi 'omi i lubwainemi, veimea wata awave'eda'eda matatabuna 'asiau a lu'ivoneyediga 'wa na vematayakeyakedi.”