6
Egavo Iesu i na baileniga 'wa da vo i da tutufwatagi-vaituganeni
1-2 'Omi fai bola 'wa vekwamana-siasiai, ava'ai basenadi 'wa 'asetaiga Keliso faifaina 'asa'aiana bei 'wa miamia, begaidi i lubwaineda venidi safailidi 'waidiega ta na vaganago bega ta na vewavawava ve vitadi ta na 'asetadi. 'Asa'aiana nuanuami ve safaila'avadi, bani'odi sauluvanidi sakoidi 'waidiega wafa i sousouyediga ta na bailedi bega ta na vetumagana Yaubada 'waineye, ve bafitaiso tulina tulina faifaidi, nimayato tomotoga 'unu'unudie bega toketokena i na veluagai 'Anu'anunu Magemagetana 'wainega, ve tovoi-vaitugana faifaina wata tosakona 'adi vematavuloga-vagata Yaubada 'wainega faifaina. Venidi 'atumaidi, siwe basenadiotoga 'wa 'aseta'a'avadi kebu ta na luluvaituganidi. 3 I lubwaineda ta na vaganago ve 'adi 'aseta vitadi ta na 'asetadi, 'ai'edi Yaubada i na tauyeda.
4-5 Mogitana ta na vaganago yada 'aseta Keliso faifaina i na vebwaika bega kebu ta na vedumwe'ai'ai. We'e egavo Yaubada i 'ivaisedi nuadi i magetadi mulieta Natuna Iesu i na vedumwe'ai'aieniga, kebu tamu sai'afo 'adi fata i na nuaviladi. Kumanidiavo basenadi Yaubada yana nuakalikali abamayega i veluagai, 'Anu'anunu Magemagetana i agedi, Yaubada yana Vona 'ana 'atumaina i lutonovi wata Yaubada yana toketokena tutuya i mimai faifaina i vebaedi. 6 Naninidi 'atumaidi i veluagadi mulieta i na vedumwe'ai'aiga, yadi sauluvanina 'wa da vo Yaubada Natuna i da tutufwatagi-vaituganeni 'ai lagalagana 'waineye wata 'wa da vo tomotoga fuedi matadie i da sidibidibieni.
7 Tovedumwe'ai'ainidi wata tovematayakayaka faifaidi a na awatalatutula. 'Ai'edi tomotoga 'ani'ani i na bakulidi, tutuya fuedi i na 'wei'wei bega fwayefwayeye i na sususula, mulieta fwayafwayanina 'wainega tonibakula 'ani'ani 'atumaina i na veluagai. Wata bani'odi egavo Yaubada yana nuanua i vevematayakeyakedi vuagidi ta 'ise'isedi wata Yaubada yana nuakalikali i veveluagadi. 8 Nag 3:17-18We'e tomotoganidi Yaubada i vedumwe'ai'aieni bani'odi fwayafwaya sakoina. 'Ani'ani i na bakulidiga siwe kebu i na taboga, nani sakoidi 'aisedi i na tabo bani'odi tauwafa wata ulaulawa. Bakulanina i na venani-'avo'avovo, bega toni bakula ma yana veimea i na tunuya i na 'alai.
9 'A veveifufuga tomotoganidi Yaubada i vedumwe'ai'aieniga faifaidi, we'e 'omi emavo 'a 'asetami 'akonadi 'ita'ita'i 'wa veluagai Yaubada 'wainega wata 'a nuani mogitana Yaubada yana nuanua 'wa 'i'idewadi. 10 'Omi 'wa folofolovaga Yaubada faifaina wata emiavo tovetumagana 'waidie 'wa 'a'aivaita-vebogi, yami nuakalikali Yaubada 'waineye 'ana 'eba 'isa. Yaubada yana nuanua tonovidi, yami sauluvanidi 'atumaidi i nuanuanidi 'awaie 'ami tutula 'wa na veluagai 'wainega. 11 Mogitana 'akonadi taunimi 'wa tauyemi Yaubada 'waineye, siwe nuanuama bwaikina ma emiavo 'wa na vevenuakalikali yami mia matatabuna 'waidie, bega naninidi faifaidi 'wa nuanuaga 'awaie 'wa na veluagadi Yaubada 'wainega. 12 Kebu nuanuama 'wa na 'idumwe'ai, nuanuama tovetumagana toketokedi 'wa na saladi. Tomotoganidi ma yadi vetumagana wata ma yadi tokemaiga i lulukamata bega naninidi Yaubada i vona'awaufaufa i na velediga 'akonadi i veveluagadi.
Yaubada yana vona'awaufaufa vona-vagata
13-14 Nag 22:16-17Mogitana ta na vetumagana Yaubada yana vona'awaufaufa 'waidie bani'odi basenadi Ebelamo i vetumagana. Basenadiotoga Yaubada i vona'awaufaufa Ebelamo 'waineye, siwe kebu tamu aitoi 'ana wagava i da 'inanai bega yana vona'awaufaufanina i na vetoketoke. Fai kebu tamu aitoi bwaikaotogina taunina bani'odi bega taunina 'ana wagava i 'inanai i vo,
Yau a vona'awaufaufa mogitana a na vesauluva 'atumaina 'waimuye
wata 'amu wauma i na vefue.”
15 Vona'awaufaufanina 'waineye, Ebelamo i vetumagana-vagata i lulukamata mulieta vona'awaufaufanina 'ana mogitana i veluagai, natuna Aisake i tubuga, kumanina 'wainega i nagoga nika wauma i vefue.
16 'Ai'edi aitoi nuanuana yana vona'awaufaufa i na kiavetoketokei tamu tomogo taunina i vebwaika-'iaweni 'ana wagava i na 'inanai bega tomotoga matatabudi i na 'asetai yana vona, vona mogitana nika kebu tamu aitoi i na kwayegeni. 17 Yaubada nuanuana tomotoganidi yana vona'awaufaufa 'ita'ita'i faifaina i na veluagaiga i na 'aseta-'atumaia, kebu yana nuanua i na sivilai, bega taunina 'ana wagava i 'inanai, yana vona'awaufaufanina i kiavetoketokei. 18 We'e yana vona'awaufaufa wata 'ana 'eba kiavetoketoke taunina 'ana wagava, naninidi 'adi 'ailuga kebu 'ana fata i na bailedi wata nuanua tulina i na souyeni. Kebu tamu sai'afo Yaubada i na vekali. Fai ta 'asetai kebu 'ana fata yana vona'awaufaufa 'waideye i na geuya, 'ida ta ve'ilabibina 'waineye nuafouda i kiavevatudi, bega ta nuani mogitana veawai wata 'ita'ita'i ta na veluagadi. 19-20 Vei 16:2; Sam 110:4'Ai'edi kaukau waka i na bewebeweniga tomotoga lomu i na taweni waka i na sitagoni wata tomotoga nuafoudi i na vatu. 'Ida wata bani'odi, fai ta nuani mogitana Yaubada yana vona'awaufaufa 'ada 'ita'ita'i faifaina kebu i na geuyaga, 'wa da vo yada nuanua 'adi lomu i luku Yaubada 'waineye, toketokena wata vitana nuafouda i vatu. Fwayefwayeye me Diu yadi tovelomu bwaikina Tutudaba Tabutabuotogina 'ana saiboda i sisibaleni i lukuluku Yaubada mataneye i vevelu'ui tomotoga faifaidi. Wata bani'odi Iesu faifaida 'akonadi i kumeta i luku abame. Taunina i ve-Tovelomu Bwaikina miamia-vagaina, Melekisadeki i vevelomuga yana 'eda'eda bani'odi.